Akaka e Ire a̱ Bulusu a kubana wa
Aza o Tosolonika
Kuɓa̱yuwa̱
1
A̱tsu anan Bulusu n Sila koɓolo n Timoti a̱tsu ɗa tsu ɗanai akaka a nam pa a kubana wa aza o Kutoni a na i o Tosolonika u uma a̱ Ka̱shile Dada vu tsu koɓolo n aza a na i aza a Vuzagbayin Yesu Kirisiti Kishi.
2 N yaꞋin kavasa ɗa n folonoi Dada Ka̱shile n Vuzagbayin Yesu Kishi u yotsongu kasingai ka̱ ni a kubana wa̱ ɗa̱,
ka̱ta̱ u zuwaka ɗa̱ una̱singai m ma̱ta̱na̱!
Kavasa ko ogodiya
3 Uma a̱ va̱,
u gaꞋan ta̱ ayin tutu ci cikpa Ka̱shile adama a̱ ɗa̱,
a̱tsu ci cikpa ta̱ Ka̱shile adama a na uneki wa̱ a̱ɗu u ɗa̱ wi ta̱ o kugbonguro n utsura,
yaba dem feu u doku ta̱ ucigi a kubana wa aza a̱ ni.
4 Ana ci yaꞋin kadanshi adama a̱ ɗa̱ a̱ ubuta̱ wa aza o Kutoni a̱ Ka̱shile a̱ ubuta̱ kakau,
ci yaꞋan ta̱ ma̱za̱nga̱ tsu na i lulukpa̱i,
ali ɗa i buwai n uneki wa̱ a̱ɗu ko a na yi o kusoꞋo atakaci n kawuya kakau.
5 Atakaci a nam pa o yotsongu ta̱ a na Ka̱shile ki a kuyaꞋanka yaba dem afada derere.
Adama a nannai Ka̱shile ki ta̱ e kukece ɗa̱ a̱ ka̱tsuma̱ ka aza a̱ ma̱riki adama a na i uwa o tsugono ci ni,
ɗa i ta na a kutakacika ɗa̱ gogo na adama o tsugono tsu nan lo tsa.
6 Ka̱shile ayin tutu u ci yaꞋan ta̱ ili i na yi derere.
Wi ta̱ a kutakacika aza a na a tsu zamaka ɗa̱ kadama.
Wi ta̱ kpamu e kuneke ɗa̱ kuvuka ka atakaci a̱ ɗa̱.
7-8 A ayin a na baci Vuzagbayin Yesu wu uta̱i gaɗi n alingata a utsura a̱ ni m melentsu ma akina,
wi ta̱ a̱ kutuka̱ tsu n wuvuki kpamu.
Vuzagbayin vu tsu Yesu wi ta̱ a kutakacika yaba dem vu na u kpa̱ɗa̱i kuyeve Ka̱shile koɓolo n uma ra̱ka̱ a na a iwain kutono Arabali a Singai a Vuzagbayin vu tsu Yesu.
9 Atakaci a na a kisa a ɗaɗa a ukpa̱ u babu uteku.
I ta̱ e kupece le n Vuzagbayin koɓolo kpamu n tsugbayin tsu utsura ci ni tsu na ci babu uteku.
10 Ili i nam pa yi ta̱ a̱ kuta̱wa̱ a kanna ka na Vuzagbayin u kuta̱wa̱ kisa ucikpi n tsugbayin wa aza a na i n uneki wa̱ a̱ɗu a kubana wa̱ ni ra̱ka̱ ɗa i kpamu uma a̱ ni.
N a̱ɗa̱ ɗa dem adama a na i neke ta̱ a̱ɗu n ili i na tsu danai.
11 Ka̱shile ka zagba ɗa̱ ta̱,
ɗa ci lyaꞋi kelime n kuyaꞋan kavasa Ka̱shile ko bonoko ɗa̱ mayun a̱ ubuta̱ wi ili dem tsu na i yawa kokpo uma a̱ ni.
Ci yaꞋan ta̱ kavasa adama a na utsura u Ka̱shile u ɓa̱nka̱ ɗa̱ i yaꞋan ili i singai i na i cigai kuyaꞋan ra̱ka̱.
Uneki wa̱ a̱ɗu u ɗa̱ u ɗa u zuwai i ciga ili i nam pa.
12 Tsu nam pa feu yaba dem u kuneke ta̱ tsugbayin u kula ku Vuzagbayin vu tsu Yesu adama a̱ ɗa̱,
ka̱ta̱ e neke ɗa̱ tsugbayin koɓolo n a̱yi.
Ka̱shile ka̱ tsu n Vuzagbayin vu tsu Yesu Kishi wi ta̱ a kuzuwa ili i nam pa ra̱ka̱ i yaꞋan,
adama a kasingai ke le.