Okpoi ci Yesu
2
Yi ta̱ n utsura u ka̱ɗu adama a na yi ta̱ koɓolo n Kirisiti Kishi?
Yi ta̱ n ida̱shi i yuwu a̱ ka̱tsuma̱ ka̱ ɗa̱ adama a ucigi u ni?
Ayinviki a̱ Ka̱shile o ɓolongu ɗa̱ ta̱ koɓolo?
I tsu pana ta̱ asuvayali ɗa yi kpamu o motononoi sawu?
2 Adama a na n yeve ta̱ ta ki nannai,
n ciga ta̱ i zuwa mu m pana ma̱za̱nga̱ n a̱bunda̱i.
Ili i na i kuyaꞋan i ɗa na:
i panakpanai mayin,
i ciganai kpamu,
ka̱ta̱ i yaꞋan ulinga koɓolo n kusheshe ku te n kuyaꞋan ili i te.
3 Ka̱ta̱ i yaꞋan ili adama e cisheꞋe ba,
ka̱ta̱ kpamu i yaꞋan ili adama a̱ a̱ra̱ɗi ba.
Amma i goyo ka̱ci ka̱ ɗa̱ yi baci a kuyaꞋan ili,
ka̱ta̱ vi sheshe adanshi tovu u laꞋa wu ta̱.
4 Ka̱ta̱ vi sheshe adama a ukuna u ka̱ci ka̱ nu koci ba,
amma yongo m mali n uma o yoku n ili i na i a kuyaꞋan dem.
5 A wuma u ɗa̱,
u gaꞋan ta̱ i sheshe ka̱ta̱ i yaꞋan ili uteku u na Yesu Kishi u sheshei ɗa u yaꞋin ili kpamu.
6 Yesu wi ta̱ derere n Ka̱shile ayin tutu.
Amma ko n nannai a̱yi u sheshe u ka̱na̱ tsugbayin derere n Ka̱shile ba.
7 Ɗa u kucikpa u kpa̱ɗa̱i kubonoko ka̱ci ka̱ ni ili.
Ɗa wo okpoi derere n kagbashi.
Ɗa a matsai ni tsu vuma,
8 ɗa u yongoi tsu vuma.
Ɗa u panakai Ka̱shile ali ɗa u goyoi ka̱ci ka̱ ni kaca-kaca,
ɗa u nekei ka̱ci ka̱ ni u kuwa̱ a maɗanga ma atakaci.
9 Adama a nannai,
ɗa Ka̱shile ka̱ ɗengusa̱i ni a̱ ubuta̱ u tsugbayin
u na u laꞋi n tsugbayin dem,
ɗa Ka̱shile ke nekei ni kula ku na ku laꞋi ku yaba dem.
10 Adama a nannai kpamu,
yaba dem wi ta̱ a̱ kukuɗa̱ngu
u pana baci kula ku Yesu.
Yaba dem vu na wi na a aduniyan n gaɗi wi ta̱ a kuyaꞋan nannai.
11 Ta kpamu nannai,
kelentsu dem ki ta̱ a kudansa e keteshe
a na Yesu Kishi Vuzagbayin ɗa,
na va ta na wi ta̱ e kuneke tsugbayin u Ka̱shile Dada.
Akanai tsa azangata
12 A̱ja̱Ꞌa̱ a̱ va̱ a ucigi,
i panaka ta̱ Ka̱shile ayin tutu ayin a na mi ishi n a̱ɗa̱.
Gogo na a na mi lo n a̱ɗa̱ ba,
u gaꞋan ta̱ i laꞋa n kupanaka yi.
LyaꞋi kelime n kuyaꞋan ulinga u na u kuyotsongu a na a isai ɗa̱,
ka̱ta̱ i yaꞋan nannai n kucikpa ili n kupana ku wovon kpamu.
13 Ka̱shile ki ta̱ a kuyaꞋan ulinga wa̱ ɗa̱,
u kuzuwa ɗa̱ ta̱ i ciga kupanaka yi,
ɗa wi e kuneke ɗa̱ utsura u na i yaꞋan ili i na i yokpoi ni.
14 Ka̱ta̱ i yaꞋan mololo,
ko kanananai yi baci a kuyaꞋan ili ba.
15 Tsu nan lo tsa babu vuza na u kudansuka ɗa̱ adama a ili i yoku ko kenu.
I yongo ciɗa,
n wuma u babu ili yi ishikushi tsu muku n Ka̱shile.
I yongo n wuma u kutashi tsa azangata punu a aduniyan a̱ ka̱yimbi a na i tukpa n uma a na i n kawuya,
aza a na a ci yaꞋansa unushi ayin tutu.
16 Ka̱na̱i kpan-kpaꞋan,
kadanshi ka wuma,
adama a na Kishi u bono baci n fuɗa n dana mpa n lyaꞋa ta̱ malamanai ma,
ulinga u va̱ kpamu wo okpo gbani ba.
17 Uneki u ka̱ɗu u ɗa̱ u Vuzagbayin n tsu na yi o kutono yi,
wi ta̱ tsa alyuka wa̱ ni.
Gogo na n kuwa̱ baci kpamu u kokpo ta̱ adanshi a̱ tsuwa̱n ta̱ mpasa n va̱ ɗa o doki n ɗa a̱ ubuta̱ wa alyuka a̱ ɗa̱.
Ta baci nannai mi ta̱ a kupana ma̱za̱nga̱,
mi ta̱ kpamu o kuɓolongu n a̱ɗa̱ adama a na m pana uyoꞋo.
18 U gaꞋan ta̱ feu i pana uyoꞋo adama a ukuna u nam pa,
ka̱ta̱ i yaꞋan ma̱za̱nga̱ koɓolo nu mpa.
Bulusu u suki ili i kuɓa̱nka̱
19 Vuzagbayin Yesu wu ushuku baci,
n sheshe ta̱ kusuꞋuku ɗa̱ Timoti gogo na.
U bono baci wa̱ va̱,
mi ta̱ a kupana ma̱za̱nga̱ adama a arabali a̱ ɗa̱.
20 Mi n vuza ci ni ba,
u tsu pana ta̱ asuvayali adama a̱ ɗa̱ a na a laꞋi a yaba dem vu na wi na.
21 N dansa ta̱ nahannai adama a na yaba dem wi ta̱ e kusheshe adama a ili i na a̱yi a̱ ka̱ci ka̱ ni u cigai koci,
a na we sheshe adama a ukuna u na Yesu Kishi u cigai.
22 Amma i yeve ta̱ tsu na Timoti u yotsongi ɗe ka̱ci ka̱ ni mayin wo okpo an maku n esheku a̱ ni.
U ɓa̱nka̱ mu ta̱ n kudana uma Arabali a Singai.
23 Adama a nannai,
ɗa baci n ta̱wa̱ n yevei ili i na a kuyaꞋanka mu,
n sheshe ta̱ n suku yi wa̱ ɗa̱.
24 Mpa feu n keɗe ta̱ a̱pa̱Ꞌa̱ Vuzagbayin wi ta̱ a̱ kuka̱sa̱kpa̱ mu n ta̱wa̱ wa̱ ɗa̱ babu megeshe.
25 I suku ta̱ Abafaroda tsu kalingata ka̱ ɗa̱,
u ɓa̱nka̱ mu ta̱ n i na mi a kuciga.
A̱yi vuza va̱ ɗa a̱ ka̱tsuma̱ ka̱ Kishi,
u yaꞋan ta̱ ulinga koɓolo nu mpa,
ɗa kpamu wo okpoi an kosoji koɓolo nu mpa.
Gogo na,
me ene ta̱ u gaꞋan ta̱ n ka̱sa̱kpa̱ yi u bono wa̱ ɗa̱.
26 Ili i na i zuwai i ɗaɗa u ciga ta̱ u yongo n a̱ɗa̱ ka̱u.
U pana uyoꞋo ba,
ana i panai u ka̱na̱ ta̱ mɓa̱la̱.
27 Mayun ɗa u yaꞋan ta̱ mbanaki.
Kenu ɗa wi ishi a̱ kukuwa̱.
Amma Ka̱shile ka panai asuvayali a̱ ni,
ana u potsokpoi ni,
ɗa kpamu u sa̱nka̱i mu ma̱shi adama a una̱mgbi u ka̱ɗu wa̱ a̱bunda̱i.
28 Ili i na nam pa i ɗaɗa i zuwai ɗa n laꞋi n kuciga n suꞋuku ɗa̱ a̱yi.
A ayin a na baci ye ene ni kpamu yi ta̱ a kupana ma̱za̱nga̱ tsu nan lo tsu ɗa ta na una̱mgbi u ka̱ɗu u va̱ u kujebe.
29 Kya̱sa̱i ni n uye u Vuzagbayin ka̱ta̱ i pana ma̱za̱nga̱ ka̱u.
Nekei ni tsugbayin tsu na i kuneke uma a na i ci ni.
30 YaꞋin nannai adama a na kenu ɗa wi ishi a̱ kukuwa̱ adama a ulinga u Kishi.
U ta̱wa̱ ta̱ u ɓa̱nka̱ mu n ulinga u na a̱ɗa̱ a̱ ka̱ci ka̱ ɗa̱ i kpa̱ɗa̱i kufuɗa kuyaꞋan.