Mi ta̱ a kuɗanaka nkoshi m gba̱ra̱-gba̱ra̱ n a̱ɓa̱nki n uma ra̱ka̱ a Filibi aza a na Ka̱shile ka zagbai.

2 Ka̱sa̱kpa̱ Ka̱shile Esheku a̱ tsu n Vuzagbayin Yesu Kishi u yotsongu ɗa̱ kasingai ka̱ ni ka̱ta̱ u neke ɗa̱ ma̱ta̱na̱.

3 N ci cikpa ta̱ Ka̱shile ayin dem a na n ciɓai n a̱ɗa̱.

4 N ci shana ta̱ m ma̱za̱nga̱ mi baci a kuyaꞋan kavasa adama a̱ ɗa̱

5 adama a na a̱ɗa̱ ɗa i ɓa̱nka̱i mu a̱ ubuta̱ u kuka̱ra̱Ꞌa̱ka̱ n Arabali a Singai adama a̱ Kishi.

I gita̱ ta̱ kuyaꞋan nannai a ayin a na i panai arabali a nam pa,

ɗa i lyaꞋi kelime n kuyaꞋan nannai ali n gogo na.

6 Ka̱shile kaꞋa vuza na u gita̱i ulinga u singai u nam pa wa̱ ɗa̱,

n yeve ta̱ kpamu mayun wi a̱ kuka̱sa̱kpa̱ ba,

sai ulinga u nam pa u kotso cika a kanna ka na Yesu Kishi u kubono.

7 Derere ɗa m pana nahannai adama a̱ ɗa̱ ra̱ka̱.

Yi ta̱ n ubuta̱ u singai punu a̱ ka̱ɗu ka̱ va̱ adama a na ci ciya̱ ta̱ ɗe una̱singai u Ka̱shile koɓolo.

Ci yaꞋan ta̱ nannai a ayin a na mi a ugbashi n ayin a na mi uba̱ruwi,

ɗa mi a kudakaka adama a na n dansa ili i mayun adama a Arabali a Singai.

8 Ka̱shile ke yeve ta̱ tsu na n cigai ɗa̱ ka̱u n ucigi u Kishi.

U yeve ta̱ kpamu tsu na n cigai n yongo n a̱ɗa̱ ka̱u.

9 N vasa ta̱ maciganai ma̱ ɗa̱ ma yimkpa ka̱u ali ma laꞋa nannai.

N vasa ta̱ i lyaꞋa kelime n kugbonguro a̱ ubuta̱ u kuyeve n ugboji.

10 N vasa ta̱ tsu nam pa adama a na n ciga ta̱ i yeve ili i na i gaꞋin mayun,

ka̱ta̱ i ciya̱ i yongo n wuma u ciɗa n u babu ishikushi ali Kishi ko bono.

11 Ka̱ta̱ kpamu wuma u ɗa̱ u shana n icuꞋu yi ili i na Ka̱shile ku ushuki n i ɗa ka̱ta̱ ta na i tuka̱ n tsugbayin ka̱u n ucikpi u Ka̱shile.

Ili i singai ya i ɗaɗa ili i na Yesu Kirisiti Kishi u zuwai a wuma u ɗa̱.

12 Uma a̱ va̱,

n ciga ta̱ i yeve ili i na a yaꞋankai mu i zuwa ta̱ Arabali a Singai a lyaꞋi kelime.

13 Gogo na yaba dem punu na u yeve ta̱ a na a shiyai mu n ikani adama a na mi a kuyaꞋanka Kishi tsugbashi.

Ko osoji a na i a kindi e kefeku e yeve ta̱ a na mi a kuyaꞋanka Kirisiti Kishi tsugbashi.

14 Adama a ugbashi u va̱ ta na,

aza o Kutoni n a̱bunda̱i punu na a̱ ciya̱ ta̱ utsura u ka̱ɗu ɗa gogo na i a kudana aza o yoku ukuna u Kishi babu wovon.

15-16 Uma o yoku i ta̱ lo a na a tsu dansa kadanshi ka̱ Ka̱shile adama a na a cigai mu,

ɗa kpamu i a kuciga kuyaꞋan ili i na yi derere.

Uma a nam pa a tsu dansa ta̱ kadanshi ka̱ Ka̱shile adama a na e yeve ta̱ Vuzagbayin u tuka̱ mu ta̱ na,

adama a na m gbagbala kudansa ili i mayun ya Arabali a Singai.

17 Amma mayun ɗa feu,

uma o yoku i a kudansa kadanshi ka̱ Ka̱shile n kusheshe ku na ki derere ba.

A tsu dansa ta̱ kadanshi ka̱ Ka̱shile n kusheshe ku ucigi u ka̱ci ke le adama a na a cikpa le.

I a kuyaꞋan ili i makara ba.

A ciga ta̱ kudoku mɓa̱la̱ mi ikani i va̱.

18 Amma ko a̱ɗu e le i ciɗa ko babu,

i ta̱ a kudansa akaka adama a̱ Kishi.

Adama a ili i nam pa,

mi ta̱ a̱ ma̱za̱nga̱.

Mi ta̱ kpamu a kulyaꞋa kelime n kuyaꞋan ma̱za̱nga̱

19 adama a na n yeve ta̱ avasa a̱ ɗa̱ n kuɓa̱nka̱ ku na ku tsu uta̱ wa Ayinviki e Yesu Kishi,

i ta̱ a̱ kuta̱ka̱ mu.

20 N ciga ta̱ n yongo ayin tutu tsu na n kukpa̱ɗa̱ kuyaꞋan ili i na i kuzuwa mu m pana wono,

amma n kucikpa n yaꞋanka Kishi tsugbashi babu wovon ayin tutu.

Mi n wovon n ayin a na a lazai ɗe ba,

n ciga ta̱ kpamu n yaꞋan n utsura gogo na n kelime feu adama a na n neke Kishi tsugbashi ayin tutu,

ko mi n wuma ko n kuwa̱.

21 Mi baci n wuma,

adama a̱ Kirisiti Kishi a ɗa,

n kuwa̱ baci ta na,

mi ta̱ a̱ kuciya̱ katsupu ka̱ a̱bunda̱i.

22 Amma n lyaꞋa baci kelime n kuyongo n wuma wi ikyamba i nam pa,

mi ta̱ a kufuɗa kulyaꞋa kelime n ulinga u Kirisiti Kishi.

N yeve ili i na n kuzagba ba.

23 Ugboku u re dem wi ta̱ a kusaꞋwa mu ka̱ɗu ka̱u.

Kataci ka̱ va̱ kaꞋa m bana n da̱sa̱ngu koɓolo n Kishi,

adama a na nannai ɗa u laꞋi n kugaꞋan ka̱u,

24 amma mpa n yeve ta̱ yi ta̱ a kunamba ili i yoku,

i ɗa i zuwai ɗa n kudoku mo yongo n a̱ɗa̱.

25 Adama a na n yeve ta̱ ili i nam pa,

n kushamgba ta̱ ciya̱ i gbonguro a uneki wa̱ a̱ɗu u ɗa̱ ka̱ta̱ tsu nan lo kpamu yi isa ma̱za̱nga̱ ma na mi punu.

26 Nannai,

n ta̱wa̱ baci wa̱ a̱ɗa̱ kpamu,

yi ta̱ a kuyaꞋan ma̱za̱nga̱ adama a ili i na i ciya̱i mu ka̱ta̱ kpamu i ciya̱ ili n a̱bunda̱i i na i kudana Yesu Kirisiti Kishi u gaꞋan ta̱.

27 Amma ili i na baci i ta̱wa̱i dem,

mayun ɗa i yongo tsu na u kutuka̱ tsugbayin a̱ ubuta̱ wa Arabali a Singai adama a̱ Kishi.

Ko n ta̱wa̱ me ene ɗa̱ kpamu ko m pana baci uteku u na yi ɗe koci,

mi ta̱ e kuyeve a na yi kashani koɓolo,

a kugbagbala adama a na i ciya̱ aza o yoku e neke a̱ɗu n Arabali a Singai a.

28 Ka̱ta̱ i pana wovon adama a irala i ɗa̱ ba.

Nannai ɗa u kokpo urotu we le a na Ka̱shile n ka̱ci ka̱ ni wi ta̱ a kuna le ka̱ta̱ wi isa ɗa̱.

29 Adama e Yesu Kishi,

Ka̱shile ke neke ta̱ ili i singai i kuneke ka̱ɗu n a̱yi,

ɗa feu u nekei ɗa̱ ili i singai ya atakaci adama a̱ ni.

30 I yeve ta̱ tsu na a takacikai mu ɗa gogo na i panai ta a ɗa a buwai nannai.

A̱ɗa̱ feu i yeve ta̱ atakaci a nan lo a.