Zuwai a̱ɗu a̱ ɗa̱
3
A̱ɗa̱ alau a Galatiya!
Yayi u ya̱nsa̱i ɗa̱ n ugboji u ni?
N yotsonku ɗa̱ ta̱ mayin ili i na i zuwai ɗa Yesu Kishi u kuwa̱i a maɗanga ma atakaci.
2 Mi ta̱ a kuyaꞋanka ɗa̱ keci ku te:
Yi isa ta̱ Ayinviki a̱ Ka̱shile a̱ ubuta̱ u kutono Wila̱?
A̱Ꞌa̱,
ta nannai ba!
Ayinviki a̱ Ka̱shile a̱ ta̱wa̱ ɗa̱ ta̱ adama a na i neke ta̱ a̱ɗu n akaka a na i panai adama a̱ Kishi.
3 Yi n aci ba?
I gita̱i kuyongo adama a̱ Kishi punu a̱ ubuta̱ wa Ayinviki a̱ Ka̱shile,
amma gogo na i ciga ta̱ kulyaꞋa kelime n kuyongo n utsura u ɗa̱.
4 I takacika ta̱ ka̱u adama a Arabali a Singai.
N ciga atakaci a nam pa o okpo ukuna u gbani ba.
5 Ana Ka̱shile ke nekei ɗa̱ Ayinviki a̱ ni,
ana kpamu u yaꞋin ili i mereve e mere ma̱ ɗa̱,
u yaꞋan ta̱ nannai adama a na i tonoi Wila̱ u Musa?
Ta nannai ba!
U yaꞋan ta̱ ili i nam pa adama a na i neke ta̱ a̱ɗu n akaka a na i panai adama a̱ Kishi.
6 Na ɗaɗa ili i na Katagarda ka Ciɗa ka danai:
“Ibrahim u nekei ka̱ɗu ka̱ ni u Vuzavaguɗu.
Adama a nannai ɗa ta na Ka̱shile ke kecei ni a̱ ka̱tsuma̱ ka aza a̱ usuɓi.”
7 Na va u yotsongu ta̱ a na muku m mayun mi Ibrahim ele ɗa uma ra̱ka̱ a na e nekei a̱ɗu e le n Ka̱shile.
8 M mani-mani va ɗe,
Katagarda ka Ciɗa ka danai Ka̱shile ki ta̱ a kisa Aza̱ka̱yimbi adama a uneki u ka̱ɗu u le.
Ka̱shile ka yaꞋin uzuwakpani wa Arabali a Singai a nam pa wi Ibrahim mani-mani va ɗe,
ana u danai,
“Mi ta̱ a kuzuwaka uma a aduniyan ra̱ka̱ una̱singai adama a̱ nu.”◊
9 Na va u yotsongu ta̱ yaba dem vu na wi n uneki u ka̱ɗu wi ta̱ a̱ kuciya̱ punu ili a̱ ubuta̱ wu una̱singai u na e nekei Ibrahim adama a uneki u ka̱ɗu u ni.
10 Vuza na dem u sheshei kutono ku Wila̱ ki ta̱ o kubonoko yi mayin n Ka̱shile,
wi ta̱ a kuyaꞋanka yi una̱ u wuya.
Na va ɗaɗa adama a na Katagarda ka Ciɗa ka dana ta̱,
“Vuza na dem wi o kutonoso ili dem i na yi punu a Katagarda ka̱ Wila̱ ba,
wi ta̱ kisa una̱ u wuya u Ka̱shile.”◊
11 Wi ta̱ e keteshe,
vuma u kubono mayin n Ka̱shile a̱ ubuta̱ u kutono Wila̱ ba,
adama a na Katagarda ka Ciɗa ka dana ta̱,
“Ka̱shile ki ta̱ e kuneke wuma u vuza na wi n uneki u ka̱ɗu.”
12 Kutoni ku Wila̱ ili i bura ku ɗa n uneki u ka̱ɗu ba,
adama a na Katagarda ka Ciɗa ka dana ta̱,
“Vuma vu na wu ushuki n Wila̱ sai u yongo tsu na u ɗa u danai.”◊
13 Amma Kishi wi isa tsu ta̱ a̱ ubuta̱ wu una̱ u wuya u na Wila̱ u yaꞋin.
Ana a bapai ni,
wi isa ta̱ una̱ u wuya a na u yotsoi u ka̱na̱ tsu.
Ili i na i zuwai i ɗaɗa Katagarda ka Ciɗa ka dana ta̱,
“Ka̱shile ka tsu zuwaka ta̱ yaba dem vu na a bapai a maɗanga una̱ u wuya.”◊
14 Adama a na Yesu Kishi u yaꞋin nannai,
ɗa Ka̱shile ka zuwakai Aza̱ka̱yimbi una̱singai uteku u na u yaꞋankai Ibrahim uzuwakpani,
tsu nan lo tsu ɗa ta na a̱tsu aza o Kutoni ci ciya̱i Ayinviki a̱ Ka̱shile a na Ka̱shile ka yaꞋin uzuwakpani adama a uneki u ka̱ɗu.
Ukuna u Wila̱
15 Uma a̱ va̱,
agisana a ɗa na adama a uteku u na ci o kuyongo:
Uma e re a yaꞋan baci uzuwakpani a uye u na u yotsoi,
vuza wi lo o kukoɗo ko u sabaꞋa uzuwakpani u nan lo wa ba.
Ta feu ki nannai n uzuwakpani u nam pa u Ka̱shile.
16 Ka̱shile ke neke ta̱ Ibrahim uzuwakpani wa m matsukaya ma̱ ni.
U yaꞋanka ntsukaya n a̱bunda̱i uzuwakpani wa ba,
amma sai vuma vi te koci,◊
vuma vi te vu nan lo va a̱yi ɗa Kishi.
17 Ili i na n ciya̱i i ɗaɗa na:
Ka̱shile ka yaꞋan ta̱ uzuwakpani n Ibrahim,
ɗa Ka̱shile yaꞋin uzuwakpani u kuka̱na̱ ta̱ u ɗa.
A̱ya̱ amangatawa̱na̱shi n kamankupa (430) a lazai,
ɗa u yevei u nekei Wila̱.
Wila̱ u nan lo u kusabaꞋa uzuwakpani wa ba.
U yaꞋan baci nannai,
wi ta̱ a̱ kula̱nga̱sa̱ uzuwakpani u na Ka̱shile ka yaꞋin n a̱yi.
18 Wila̱ wi baci e kuneke tsu una̱singai u na Ka̱shile ka yaꞋin uzuwakpani n Ibrahim,
ashe Wila̱ wa wi ta̱ a kulaꞋa uzuwakpani wa.
Amma ki a kuyaꞋan nannai ba,
adama a na Ka̱shile ke neke ta̱ Ibrahim una̱singai u ni gbani a̱ ubuta̱ wu uzuwakpani u na u yaꞋin.
19 Yi ɗa̱i i zuwai ɗa Ka̱shile ke nekei Wila̱?
U yaꞋan ta̱ nannai adama a na uma i ta̱ a kuyaꞋansa unushi.
U zuwa ta̱ Wila̱ u yongo lo,
sai vuma vi te vu na u danai u kuta̱wa̱ va u yawa.
U zuwai alingata a̱ ni e neke Wila̱ u ni u Musa,
ɗa Musa u nekei u ɗa u uma a Israila.
Tsu nan lo Musa wo okpo ta̱ kaꞋuwi ke mere.
20 KaꞋuwi ke mere ka ci yaꞋanka ta̱ ukambu dem kadanshi,
amma Ka̱shile a̱ ka̱ci ka̱ ni kaꞋa ka zuwai uzuwakpani u ni.
21 Ka̱shile ki ta̱ a tsurala n uzuwakpani u ni ana u nekei Wila̱ wa?
Ta nannai ba!
I baci a̱ kuciya̱ wuma u babu uteku a̱ ubuta̱ u Wila̱,
ashe ishi ta̱ o kubonoko ka̱ci ke le aza a̱ usuɓi n Ka̱shile a̱ ubuta̱ u kutono ku Wila̱.
22 Amma Katagarda ka Ciɗa ka dana tsu ta̱ unushi u shiya ta̱ uma dem adama a na a̱ kpa̱ɗa̱ kufuɗa kutono Wila̱.
Adama a nannai uye u na Ka̱shile ke kuneke vuma ili i na u yaꞋin uzuwakpani koci ɗaɗa vuma vu nan lo u neke baci ka̱ɗu n Yesu Kishi.
23 Wila̱ wa u ka̱na̱ tsu ta̱ ɗa u zuwai tsu tso okpoi tsa agbashi ɗaka vu utsura u ni,
sai ayin a yawa a na tsa̱ kuciya̱ uneki u ka̱ɗu.
24 Wila̱ wa u ɗaɗa vuzagbayin vu tsu,
ali sai ayin a na Kishi ka̱ ta̱wa̱i.
A ayin a na Kishi ka̱ ta̱wa̱i u bonoko tsu ta̱ aza a usuɓi n Ka̱shile ana ci nekei a̱ɗu n a̱yi.
25 Gogo na a na ci ta̱ n uneki u ka̱ɗu n a̱yi,
Wila̱ wi a kulyaꞋa tsugono wa̱ tsu ba.
A̱ɗa̱ muku n Ka̱shile n ɗa
26 A̱ɗa̱ ra̱ka̱ muku n Ka̱shile n ɗa adama a uneki u ka̱ɗu u ɗa̱ u Yesu Kishi.
27 Ana a yaꞋankai ɗa̱ kusumbu ka akucina,
wo okpo ta̱ adanshi i uka ta̱ Kishi tsu na i tsu uka ntogu n savu.
28 Uneki u ka̱ɗu n Yesu Kishi ɗaɗa ili i na i bonokoi yaba dem vu ɗa̱ vi te:
Kayahuda ka baci vi ko Mehelene,
kagbashi ka baci vi ko vuma vu ka̱ci ka̱ nu,
vali ɗa baci vi ko vuka,
yaba dem vu ɗa̱ vi te ɗa yi.
29 Adama a nannai uma a̱ Kishi a ɗa baci yi,
gogo na yi ta̱ a̱ ka̱tsuma̱ ka umaci wi Ibrahim,
i ta̱ kpamu e kuneke ɗa̱ agadu a na Ka̱shile ka yaꞋin uzuwakpani.