Azusuki a̱ ushuki m Bulusu
2
A̱ya̱ kupa n a̱ na̱shi a lazai,
ɗa m bonoi a Urishelima,
ɗa Baranaba n Taitu a̱ ta̱wa̱i koɓolo nu mpa.
2 M bana ta̱ ɗe adama a na Ka̱shile ko yotsongu mu ta̱ tsalatani u danai m bana.
Mpa ɗe n dansa ta̱ n aza e kelime a aza o Kutoni koci a usokongi.
N ciga ta̱ ma zuwa le e yeve akaka a na mi a kudana Aza̱ka̱yimbi.
N ciga ta̱ o kondo akaka a̱ va̱.
A̱ ushuku baci n ili i na mi a kuyaꞋan ba,
ulinga u va̱ wi ishi ta̱ o kokpo wasasa.
3 Ana kpamu a panai ili i na n danai,
ɗa a̱ ushuki n i ɗa.
Taitu wi ta̱ koɓolo nu mpa a gutsa yi biꞋi sai a kiɗa yi kavaja ba,
ko a na wi Vuza̱ka̱yimbi.a
4 Aza o kutoni a aꞋuwa o yoku a uwa ta̱ wa̱ tsu n ka̱bini.
A̱ uwa ta̱ tsa aza a kasaka adama a na e yeve ukuna wu uba̱ruwi u na Yesu Kirisiti Kishi u nekei tsu.
A ciga ta̱ kubonoko tsu agbashi.
Uma a nan lo a zuwa ta̱ ci yaꞋan kadanshi ku ukuna u kukiɗa ka avaja.
5 Amma ci neke aza o kutoni a aꞋuwa a nan lo uye ba,
ko kenu.
Ci ciga ta̱ mayun a Arabali a Singai o yongo n a̱ɗa.
6 (Aza e kelime a aza o Kutoni a nam pa a ɗika ta̱ ka̱ci ke le adanshi aza a usuɓi a ɗa i,
amma na lo ukuna u ɗa wa̱ va̱ ba.
Yaba dem derere ɗa wi u Ka̱shile.)
Tsu nan lo kpamu,
a sabaꞋa Arabali a Singai a na n dansai ba.
7 E ene ta̱ a na Ka̱shile ke nekei mu ulinga u kuyaꞋanka Aza̱ka̱yimbi kadanshi ka Arabali a Singai,
uteku u na u nekei Biturusu ulinga u kuyaꞋanka Ayahuda kadanshi.
8 Ka̱shile ke neke ta̱ Biturusu utsura u yaꞋan ulinga tsu vuzavusuki adama a Ayahuda.
Tsu nan lo tsu ɗa feu u nekei mu utsura n yaꞋan ulinga tsu vuzavusuki wa aza a na i Ayahuda ba.
9 Yakubu,
m Biturusu,b
n Yahaya (aza a na yaba dem u yevei ele ɗa azagbagbaꞋin) e ene ta̱ a na Ka̱shile ke nekei mu kuneꞋe ku gbayin ku nam pa,
ɗa a̱ ushuki m Baranaba nu mpa tsa aza a ulinga koɓolo n ele.
O dokushi tsu ci lyaꞋa kelime n kuyaꞋanka Aza̱ka̱yimbi kadanshi,
a ayin e te feu ele ɗe a kulyaꞋa kelime n ulinga u le n Ayahuda.
10 Ili i na a danai tsu ci yaꞋan koci i ɗaɗa ci ciɓa n aza a unambi,
mpa ta na mi ta̱ ɗe m mali n yaꞋan nannai!
Bulusu u dansukai Biturusu
11 Ayin o yoku ana Biturusu wi ɗe a Antakiya,
u yaꞋansa ta̱ ili i na i na̱mgba̱i ka̱u.
Ɗa mpa n dansukai ni adama a ili i nam pa e kelime ka aza o Kutoni.
12 Ili i na u yaꞋin i ɗaɗa na:
Ana u yawai biꞋi,
u lyaꞋasa ta̱ n Aza̱ka̱yimbi a na i aza o Kutoni.
Ɗa Yakubu u suki aza o Kutoni a Ayahuda o yoku a Antakiya.
Ana uma a nam pa a yawai,
Biturusu u doku u lyaꞋa ilikulyaꞋa n Aza̱ka̱yimbi kpamu ba,
adama a na wi ta̱ o wovon wi ili i na uma a nam pa a kudana adama a̱ ni.
13 Ɗa aza o Kutoni a Ayahuda a na a buwai o tonoi ni feu a̱ ubuta̱ u kuyaꞋan kapalaka̱shi nannai,
ali ɗa Baranaba u gita̱i kutono le a̱ ubuta̱ u kuyaꞋan ili i wuya i nam pa.
14 Ana me enei i o kutono ili i mayun ya Arabali a Singai ba,
ɗa n yaꞋankai Biturusu kadanshi a̱ ubuta̱ u le ra̱ka̱.
N danai,
“Biturusu,
Kayahuda kaꞋa vi,
amma vi yaꞋan ta̱ ili an Vuza̱ka̱yimbi,
vi yaꞋan tsu Kayahuda ba.
Ta baci nannai,
yi ɗa̱i i zuwai ɗa vi a kugbagbala adama a na vu zuwa Aza̱ka̱yimbi a nam pa o tono Wila̱ wa Ayahuda?
15 “Mpa n avu dem Ayahuda a ɗa a umaci,
ci ta na omoci u Ka̱shile tsu na Aza̱ka̱yimbi i ba.
16 Amma ko n nannai,
ci yeve ta̱ tso okpo ta̱ n usuɓi n Ka̱shile a̱ ubuta̱ wu uneki u ka̱ɗu n Yesu Kishi,
a̱ ubuta̱ u kuyaꞋan ili i na Wila̱ u zuwai ba,
adama a na babu vuza na u kokpo mayin n Ka̱shile a̱ ubuta̱ u kutono Wila̱.
Adama a nannai,
ci neke ta̱ a̱ɗu n Yesu Kishi,
ciya̱ Ka̱shile ku ushuku n a̱tsu adama a uneki u ka̱ɗu u tsu n Kishi.
17 “Ayahuda o yoku o bonoko tsu ta̱ aza a unushi adama a na tsu ushuku ta̱ n Kishi u bonoko tsu mayin n Ka̱shile,
n tsu nan lo kpamu tso kutono Wila̱ wa Ayahuda ra̱ka̱ ba.
Na lo u yotsongu ta̱ a na Kishi ka zuwai tsu ci yaꞋan unushi?
A̱Ꞌa̱,
ta nannai ba!
18 Amma m bono baci ɗa n tonoi Wila̱ kpamu,
ɗaɗa n kunusaka Ka̱shile mayun.
19 Ana mi o kutono Wila̱,
u tuka̱ mu ta̱ n ukpa̱.
Gogo na wila̱ wi o kutono nu mpa kpamu ba,
na lo u zuwa mu ta̱ n yongo uteku u na Ka̱shile ka cigai mu n yongo.
20 “A bapa mu ta̱ koɓolo n Kirisiti Kishi.
Mpa a̱ ka̱ci ka̱ va̱ mi n wuma ba,
amma Kishi kaꞋa ki a wuma wa̱ va̱.
Mpa biꞋi n ikyamba tsu vuma a aduniyan a nam pa,
mu ushuku ta̱ m Maku ma̱ Ka̱shile.
U ciga mu ta̱ ɗa a̱yi a̱ ka̱ci ka̱ ni wu ushuki kukuwa̱ adama a na mpa n yaꞋan wuma.
21 Mi a̱ ka̱tsuma̱ ka aza a na a iwain kasingai ka̱ Ka̱shile ba.
Ka̱shile ki baci a̱ kushuku n a̱tsu a̱ ubuta̱ u Wila̱,
ashe ukpa̱ u Kishi wo okpo ta̱ wasasa.”