Kadanshi ku ukuna u Kishi n ukpa̱ u ni
2
Uma a̱ va̱,
ana n ta̱wa̱i n danai ɗa̱ akaka a̱ Ka̱shile,
n yaꞋan ulinga n kadanshi ko tsuzogu ko ku ugboji ba.
2 Ana mi koɓolo n a̱ɗa̱,
n dana yaꞋan n cinukpa n ili ra̱ka̱,
sai Yesu Kishi ali ukpa̱ u ni a maɗanga ma atakaci.
3 Ana n ta̱wa̱i wa̱ a̱ɗa̱,
ikyamba i va̱ i kuwa̱ ta̱ ali e kujeꞋe adama o wovon.
4 Ayin a na baci n yaꞋin kuyotsongu n kudana uma Arabali a Singai,
n dansa ta̱ mejege.
N dansa n ugboji ko n leꞋeshe uma ba.
N ka̱sa̱kpa̱ ta̱ Ayinviki a̱ Ka̱shile o yotsongu utsura u ni.
5 N yaꞋan ta̱ nannai adama a na i ciya̱ uneki u ka̱ɗu adama a utsura u Ka̱shile,
amma adama a ugboji u vuma ba.
Ugboji u Ka̱shile
6 Ana mi koɓolo n aza o Kutoni a na a kutsai,
n ci yaꞋan ta̱ kadanshi n ugboji,
amma n icuꞋu yu ugboji ya aduniyan i ɗa ba.
IcuꞋu yu ugboji i nan lo i na aza o tsugono a aduniyan a cigai i ɗa ba,
ele ɗa aza a na utsura u le u tsu na̱mgba̱ gbani.
7 N ci yaꞋan ta̱ kadanshi ku ugboji u Ka̱shile u na wi usokongi,
ka buwa usokongi ali n gogo na ba.
Kafu aduniyan a̱ gita̱,
Ka̱shile ko foɓuso ta̱ ugboji u nam pa adama a na u tuka̱ tsu n tsugbayin.
8 Aza o tsugono a aduniyan a nam pa ko vuza te u yeve ba.
Ishi baci e yeve,
ishi a kuna Vuzagbayin vu na wi n tsugbayin a maɗanga ma atakaci ba.
9 Amma Katagarda ka Ciɗa ka danai:
“Ili i na Ka̱shile ko foɓusokoi uma a na a cigai ni
i laꞋa ta̱ i na e enei n a̱shi e le,
ɗa kpamu i doki i laꞋi i na a panai n atsuvu e le.
Ka̱ta̱ biꞋi i ɗa i uwa a̱ɗu a uma ba!”
10 Amma ci yeve ta̱ ili i nam pa adama a na Ayinviki a̱ Ka̱shile o yotsongu tsu ta̱ i ɗa ɗe ra̱ka̱.
U la̱nsa̱ ta̱ ili ra̱ka̱,
ali n kusheshe ku na ki usokongi daꞋin ku Ka̱shile.
11 Avu ɗa koci vi yevei ili i na yi punu a̱ ka̱ɗu ka̱ nu,
Ayinviki a̱ Ka̱shile a ɗa koci feu e yevei ili i na yi punu a̱ ka̱ɗu ka̱ Ka̱shile.
12 Amma Ka̱shile ke neke tsu ta̱ Ayinviki a̱ a̱ ni.
I ɗaɗa i zuwai ɗa ci sheshe uteku u na uma a aduniyan a nam pa e ci sheshe ba.
I ɗa kpamu i zuwai ɗa tsu kuyeve ili i na Ka̱shile ke nekei tsu ba̱ri.
13 Ana tsu danai ɗa̱ nahannai,
ci yaꞋan ulinga n kadanshi ku ugboji u vuma ba.
Ci ci yaꞋan ta̱ kadanshi ki ili i na Ayinviki a̱ Ka̱shile a danai tsu tsu dansa ayin a na baci tsu dansai hawun ili i mayun wa aza a na i n Ayinviki a̱ Ka̱shile.
14 I ɗaɗa i zuwai vuza na wi n Ayinviki a̱ Ka̱shile ɗa koci u kufuɗa kuyeve ili yi una̱singai ya Ayinviki a̱ Ka̱shile.
Vuza na baci wi n Ayinviki a̱ Ka̱shile ba,
wi ta̱ e kusheshe ka̱ta̱ u dana una̱singai u nam pa ili i wasasa i ɗa.
15 Vuza na baci wi n Ayinviki a̱ Ka̱shile,
ɗa u fuɗai u la̱na̱i ili i nam pa,
amma babu vuza na u kufuɗa wo kondo yi.
16 Katagarda ka Ciɗa ka danai:
“Yayi u yevei ka̱ɗu ka Vuzavaguɗu?
Yayi u kufuɗa kuyaꞋanka yi kadanshi ko odoki?”◊
Amma ci ta̱ a kufuɗa kuyeve ili i nam pa,
adama a na ci ta̱ n ka̱ɗu ka̱ Kishi.