Akaka a Iyain a̱ Bulusu a kubana wa
Aza o Korintiya
Kuɓa̱yuwa̱
1
1-2 Mpa Bulusu n ɗanakai a̱Ꞌisa̱ a aza o Kutoni o Korintiya akaka a nam pa.
Mi ta̱ a̱ kusuku ikya̱shi i va̱,
mpa n Sasatsani.
Ka̱shile ke ɗeke mu ta̱ mo okpo vuzavusuki vi Yesu Kirisiti Kishi adama a na ta Ka̱shile ka cigai nannai.
Ka̱shile ke ɗeke ɗa̱ ta̱ adama a na yo okpo uma a ciɗa a̱ ni.
U bonokoi ɗa̱ ciɗa a̱ ubuta̱ u Yesu Kishi.
U yaꞋan ta̱ nannai kpamu adama a uma ra̱ka̱ a na i a kuyaꞋanka kula ku Vuzagbayin Yesu Kishi tsugbashi a̱ ubuta̱ kakau dem.
Kishi Vuzagbayin vu tsu ɗa n vu le feu.
3 YaꞋan Ka̱shile Dada vu tsu n Vuzagbayin Yesu Kishi e neke ɗa̱ kasingai m ma̱ta̱na̱.
Bulusu u yaꞋankai Ka̱shile ogodiya
4 N ci yaꞋanka ta̱ Ka̱shile ka̱ va̱ ogodiya ayin tutu adama a kasingai ka na u yaꞋankai ɗa̱,
a̱ɗa̱ na gogo na yo okpoi aza o kutono Yesu Kishi.
5 Yo okpo ta̱ aza a̱ uciyi a uye kakau dem,
koɓolo n kadanshi n kuyeve dem adama a na a̱ɗa̱ yi ta̱ vi te n a̱yi.
6 Na va u yotsongu ta̱ a na ili i na n danai ɗa̱ adama a̱ ni mayun ɗa.
7 Adama a nannai,
yi isa ta̱ kuneꞋe kakau ra̱ka̱ ku na i cigai ku na Ayinviki a̱ Ka̱shile e ci neke,
a̱ɗa̱ a kuvana biꞋi Vuzagbayin Yesu Kishi a na wo bono.
8 Wi ta̱ e kuneke ɗa̱ utsura ali a kubana a uteku adama a na Ka̱shile ke neke ɗa̱ unushi wi ili ba a kanna ka na Vuzagbayin Yesu Kishi u kubono kpamu.
9 Mayun ɗa Ka̱shile ki ta̱ a kuyaꞋanka ɗa̱ ili i nam pa adama a na u ci yaꞋan ta̱ ili i na u danai wi ta̱ a kuyaꞋan.
A̱yi ɗa u zagbai ɗa̱ yo okpo koɓolo m Maku ma̱ ni,
Vuzagbayin vu tsu Yesu Kishi.
Uma e pecuki ka̱ci ke le ugboku kakau
10 Uma a̱ va̱,
n folono ɗa̱ ta̱ ra̱ka̱ i panakpanai adama o tsugono tsu Vuzagbayin vu tsu Yesu Kishi.
Ka̱ta̱ i pecuku ka̱ci ka̱ ɗa̱ ugboku kakau ba,
amma ɓolongi ekiye a̱ ɗa̱ a̱ ubuta̱ u te adama a na yo okpo n ka̱ɗu ke te n kusheshe ku te kpamu.
11 Uma a̱ va̱,
uma o yoku a na i a kpaꞋa ku Kulawia a dana mu ta̱ i yongo ta̱ a kanananai uteku u ɗa̱.
12 A danai yaba dem vu ɗa̱ u dansai ili i ni kau.
Vuza te u danai,
“Mi ta̱ o kutono Bulusu.”
Vuza yoku kpamu a kudana,
“Mi ta̱ o kutono Apolosu.”
Vuza yoku kpamu u danai,
“Mi ta̱ o kutono Biturusu.”
Vuza yoku kpamu u danai,
“Mi ta̱ o kutono Kishi.”
13 I ta̱ a kufuɗa e pece Kishi vuza na wi vuza te a ugboku kakau?
A̱Ꞌa̱!
Bulusu u kuwa̱ ta̱ adama a̱ ɗa̱ a maɗanga ma atakaci?
Ko kenu!
A yaꞋanka ɗa̱ ta̱ kusumbu ka akucina adama a na yo okpo mukumitoni m Bulusu?
A̱Ꞌa̱!
14 N cikpa ta̱ Ka̱shile n yaꞋanka ko vuza te vu ɗa̱ kusumbu ka akucina ba,
sai Kirisibu koci n Gayu.
15 Gogo na babu vuza na u kudana n yaꞋanka yi ta̱ kusumbu ka akucina n kula ku va̱.
16 (Kai,
n ciɓa ta̱ gogo na!
N yaꞋanka ta̱ feu Istifanu n limata i ni kusumbu ka akucina,
amma n doku n ciɓa ko n yaꞋanka ta̱ vuza yoku kpamu ba.)
17 Kishi u suku mu n yaꞋanka uma kusumbu ka akucina ba.
U suku mu ta̱ n dana uma Arabali a Singai a̱ ni.
Ayin a na baci n danai Arabali a Singai a,
mi a kuyaꞋan kadanshi n tsuzogu ba,
adama a na n ciga utsura wu ukpa̱ u Kishi a maɗanga ma atakaci wo okpo gbani ba.
Kishi kaꞋa utsura n ugboji u Ka̱shile
18 Ayin a na baci aza a na i a uye u na a̱ kuniꞋwa̱n a panai akaka a̱ ukpa̱ u Yesu Kishi,
wi ta̱ o kokpo le ili yi izoshi.
A ayin a na baci a̱tsu vu na Ka̱shile ki a kisa tsu panai a ɗa,
wi ta̱ o kokpo tsu utsura u Ka̱shile.
19 A ɗana ta̱ punu a Katagarda ka Ciɗa:
“Mi ta̱ a̱ kula̱nga̱sa̱ ugboji wa aza a na a ɗikai ka̱ci ke le i ta̱ n ugboji.
Mi ta̱ a kukpada kuyeve ka aza e kuyeve.”◊
20 Yi ɗa̱i ugaꞋin u na wi punu wa̱ a̱la̱nshi e kuyeve a aduniyan a nam pa,
nu nlum n wila̱,
n aza a kanananai ku ukuna?
Ka̱shile ka zuwa le ta̱ ɗe ra̱ka̱ o okpoi ukuna u tsulau ɗa u zuwai ugboji u le wo okpoi wasasa.
21 Ka̱shile n ugboji u ni u rece ta̱ ili ra̱ka̱ ciya̱ uma a aduniyan a nam pa a̱ kpa̱ɗa̱ kene yi,
o tono baci ugboji u le.
U kucikpa u zagbai kisa aza a na e nekei a̱ɗu e le n akaka a na tsu tuka̱i,
a na o yotsoi ili i tsulau.
22 Ayahuda a ci ciga ta̱ e ene ili i mereve ili i kuyotsongu an Ka̱shile ki a kuyaꞋan ulinga.
Aza̱ka̱yimbi a ciga ta̱ a̱ ciya̱ ugboji.
23 Adama a nannai,
a̱tsu tsu dana baci Kishi u kuwa̱ ta̱ a maɗanga ma atakaci,
ɗa Ayahuda a danai ili unushi i ɗa,
ɗa Aza̱ka̱yimbi a danai na lo va ra̱ka̱ ukuna u tsulau u ɗa.
24 Amma akaka a uma a na Ka̱shile ka zagbai a̱ ka̱tsuma̱ ka Ayahuda n Aza̱ka̱yimbi dem,
a ɗa na:
Kishi,
a̱yi ɗa utsura u Ka̱shile n ugboji u Ka̱shile.
25 Ko an Ka̱shile ka yaꞋin adanshi tsulau tsu ɗa yi,
u laꞋa ta̱ yaba dem vu na u buwai ta na ugboji,
ko a na wi adanshi wi n utsura ba,
u laꞋa ta̱ yaba dem ta na utsura.
26 Uma a̱ va̱,
ciɓai tsu na yi ishi a ayin a na Ka̱shile ka zagbai ɗa̱.
Uma a aduniyan a nam pa e sheshe a na a̱ɗa̱ n a̱bunda̱i yi n ugboji ba.
A̱ɗa̱ na yi azagbagbaꞋin yi gbayin ba.
Aza a na kpamu i umaci u mogono i gbayin ba.
27 Ka̱shile ka kucikpai ka zagbai ili i na uma a aduniyan e yevei i ili i tsulau i ɗa,
adama a na u neke aza a na a danai i ta̱ n ugboji wono.
Ɗa u zagbai aza a na i babu utsura u ciya̱ u neke aza a na i n utsura wono.
28 U zagbai ili i na uma a aduniyan o goyoi ɗa a danai i suɓa̱ ko i gaꞋan ba,
ɗa u yaꞋin ulinga n ili i nan lo ya i na uma e sheshei i ɗa i laꞋi n kugaꞋan,
ɗa u bonokoi i ɗa gbani.
29 Ka̱shile ka yaꞋan ta̱ nannai adama a na ka̱ta̱ vuza u yaꞋan a̱ra̱ɗi e kelime ka̱ ni ba.
30 Ka̱shile a̱yi ɗa u zuwai ɗa̱ i ɓolongi ka̱ci ka̱ ɗa̱ n Yesu Kishi.
Ka̱shile ka zuwai Kishi wo okpo n ugboji adama a̱ tsu.
Adama a̱ ni ɗa Ka̱shile ki isai tsu.
Kishi u zuwai tsu tso okpoi ciɗa,
ɗa u nekei ka̱ci ka̱ ni adama a na wu uta̱ka̱ tsu punu a̱ ubuta̱ wu unushi.
31 Katagarda ka Ciɗa ka danai,
“Vuza na baci u cigai kuyaꞋan a̱ra̱ɗi,
u yaꞋan a ɗa koci n ili i na Vuzagbayin u yaꞋin.”