Ka̱ta̱ vi yaꞋan ili i na i kuyokpo wu koci ba
15
A̱tsu na uneki u ka̱ɗu u tsu u tsurakpai,
ci reme ka̱ɗu n aza o Kutoni a Vuzagbayin a na uneki u ka̱ɗu u le u kpa̱ɗa̱i kutsurakpa.
Tsu dakaka tsu zuwa le a pana ma̱za̱nga̱ a na tsa dakaka kuzuwa ka̱ci ka̱ tsu kupana ma̱za̱nga̱.
2 Ci cikala ili i singai adama e le ka̱ta̱ tsu dakaka kuɓa̱nka̱ le a̱ ubuta̱ u kuyaꞋan ili i na i yo okpoi le.
3 Ko Kishi ka dakaka adama a na u panaka ka̱ci ka̱ ni uyoꞋo ba.
Amma uteku u na Katagarda ka Ciɗa ka danai,
“Uma a na a shikai nu a shika mu ta̱ feu.”◊
4 Ili dem i na a ɗanai a Katagarda ka Ciɗa ka a ɗana ta̱ i ɗa adama a na o yotsongusu tsu.
Katagarda ka Ciɗa ke ci neke tsu ta̱ uremi u ka̱ɗu,
n kudokusu katsura,
ciya̱ ci yaꞋan n a̱pa̱Ꞌa̱.
5 Ka̱shile kaꞋa ke ci neke tsu uremi u ka̱ɗu n utsura u ka̱ɗu.
N vasa ta̱ u ɓa̱nka̱ ɗa̱ i yongo m ma̱ta̱na̱ n itoku i ɗa̱,
a uye u kutono Kirisiti Kishi.
6 Ka̱ta̱ ra̱ka̱ vu ɗa̱ i ɓolongu koɓolo a̱ ubuta̱ u te n ka̱la̱ka̱tsu ke te,
e kuneke kucikpa n tsugbayin u Ka̱shile,
Esheku a Vuzagbayin vu tsu Yesu Kishi.
Arabali a Singai adama a uma ra̱ka̱
7 Kirisiti Kishi wu ushuku ta̱ n a̱ɗa̱,
adama a nannai kpamu ushuki n itoku i ɗa̱.
Ka̱ta̱ Ka̱shile ki isa tsugbayin.
8 N dana ɗa̱ ta̱ a na Kishi wo okpoi kagbashi ka Ayahuda adama a na u yotsongu a na uzuwakpani n a̱bunda̱i u na Ka̱shile ka yaꞋankai ikaya i le mayun ɗa.
9 U ta̱wa̱ ta̱ adama a na Aza̱ka̱yimbi feu e neke Ka̱shile tsugbayin adama a asuvayali a na u ci yotsongu le.
Wi ta̱ tsu na Katagarda ka Ciɗa ka danai:
“Mi ta̱ a kucikpa wu e mere ma Aza̱ka̱yimbi.
Mi ta̱ a kucanana ishipa i kucikpa kula ku nu.”◊
10 Katagarda ka Ciɗa ka danai kpamu:
“YaꞋin ma̱za̱nga̱,
a̱ɗa̱ Aza̱ka̱yimbi,
koɓolo n uma a̱ ni,
Ayahuda.”◊
11 Ɗa kpamu Katagarda ka Ciɗa ka danai:
“Cikpai Vuzavaguɗu,
a̱ɗa̱ Aza̱ka̱yimbi ra̱ka̱.
Cikpai ni a̱ɗa̱ uma ra̱ka̱ a aduniyan.”◊
12 Ɗa keneki Ishaya u danai:
“Vuza yoku e kefeku ko Mogono Dawuda wi ta̱ a̱ kuta̱wa̱,
wi ta̱ a kulyaꞋa tsugono a̱ ubuta̱ wa Aza̱ka̱yimbi,
ka̱ta̱ e keɗe a̱pa̱Ꞌa̱ e le wa̱ ni.”◊
13 N yaꞋan ta̱ kavasa adama a na Ka̱shile,
ka na ke ci neke a̱pa̱Ꞌa̱,
ka shatangu ɗa̱ m ma̱za̱nga̱ ka̱u m ma̱ta̱na̱ adama a uneki wa̱ a̱ɗu u ɗa̱.
Ka̱ta̱ a̱pa̱Ꞌa̱ a̱ ɗa̱ a lyaꞋa kelime n kugbonguro n utsura wa Ayinviki a̱ Ka̱shile.
Bulusu u yaꞋin kadanshi adama a ulinga u ni
14 Uma a̱ va̱,
n yeve ta̱ a na yi ushani n kasingai.
N yeve ta̱ a na yi n kuyeve ku na u yotsoi i ciya̱,
ɗa n yevei yi kpamu a kufuɗa kuyotsongusu itoku i ɗa̱.
15 Amma n ɗanaka ɗa̱ ta̱ sakaɗi adama a ukuna wi ili i yoku i na n cigai ɗa̱ i ciɓa.
N yaꞋan ta̱ nahannai adama a na Ka̱shile ki ta̱ n kasingai wa̱ va̱,
16 ɗa u nekei mu ulinga u na mo okpo kagbashi ke Yesu Kishi wa̱ Aza̱ka̱yimbi.
N yaꞋanka ta̱ Ka̱shile tsugbashi a̱ ubuta̱ u kuyotsongusu Arabali a Singai a̱ ni.
Mi ta̱ tsu ganu ciya̱ Aza̱ka̱yimbi o okpo tsa alyuka a na Ka̱shile ka kisa;
ɗaɗa,
alyuka a na Ayinviki a̱ Ka̱shile a̱ za̱Ꞌi ciɗa ciɗa.
17 Adama a nannai,
n yaꞋan ta̱ ma̱za̱nga̱ adama a ili i na n yaꞋin adama a̱ Ka̱shile a̱ ubuta̱ u Yesu Kishi.
18 Mi a kuyaꞋan kadanshi ki ili i yoku ba,
sai ili i na Kirisiti Kishi u yaꞋin a̱ ubuta̱ u va̱ ana n tonoi n Aza̱ka̱yimbi adama a na a panaka Ka̱shile.
O tono ta̱ Ka̱shile adama a ili i na n danai ɗa n yaꞋin kpamu.
19 Ele feu a panaka ta̱ Ka̱shile adama a utsura wi ili i mereve n ili i gbagbaꞋin i na e enei,
n adama a utsura wa Ayinviki a̱ Ka̱shile.
N yaꞋan ta̱ kadanshi ka Arabali a Singai a Urishelima ɗa n ɗikai a kubana daꞋin sai Ilikurumu,
tsu nan lo ɗa ta na n kotsoi kuyaꞋan kadanshi ka̱ Ka̱shile a̱ ubuta̱ dem.
20 N ci ciga ta̱ kuyaꞋan kadanshi ka Arabali a Singai a̱ ubuta̱ u na ka̱ta̱ uma a panai ukuna u Kishi ba,
adama a na n ciga kuyaꞋan kumaꞋa a ulinga u na vuza u gita̱ngi ɗe ba.
21 Wi ta̱ tsu na Katagarda ka Ciɗa ka danai:
“Aza a na uma a danai ukuna u ni ba,
i ta̱ e kene,
aza a na kpamu a panai ukuna u ni ba,
i ta̱ e kuyeve.”◊
Bulusu u ciga ta̱ kene aza o Roma
22 Ulinga u nam pa u kpadasa mu ta̱ kubana kene ɗa̱.
23 Gogo na n kotso ta̱ ulinga u va̱ a̱ ubuta̱ kakau u nam pa.
M megeshe ma ɗe ɗaɗa n cigai kene ɗa̱.
24 Mi ta̱ ofoɓuso a na n kubana Asubaniya,
a ayin a na baci n ɗenga̱i nwalu ma,
mi ta̱ a kuɓanuku n Roma.
Ayin a na baci m panai uyoꞋo u kuyongo n a̱ɗa̱ kenu,
ka̱ta̱ i yeve i soku mu n ka̱na̱ uye a kubana ɗe.
25 Amma kafu me ene ɗa̱,
sai m bana biꞋi a Urishelima adama a na m banka n kuneꞋe wa aza o Kutoni a na i ɗe.
26 A̱Ꞌisa̱ a aza o Kutoni a Makidoniya n Akataya e sheshe ta̱ n ucigi u ka̱ci ke le ɗa e nekei ikebe adama a na a̱ ɓa̱nka̱ aza a unambi a̱ ka̱tsuma̱ ka uma a̱ Ka̱shile a Urishelima.
27 Aza̱ka̱yimbi a̱ ciya̱ ta̱ ɗe asuvayali a̱ ubuta̱ u Ka̱shile adama a Ayahuda.
Na u zuwa ta̱ kuneꞋe ku le ko okpoi adanshi i ta̱ a kutsupa kutan,
amma i ta̱ a̱ ma̱za̱nga̱ adama a na e neke kuneꞋe ku le n ekiye e re.
28 Ayin a na baci n kotsoi kuneke ikebe i nam pa,
mi ta̱ e kene ɗa̱ ka̱ta̱ n laza n kelime a kubana a Asubaniya.
29 N yeve ta̱ kpamu n yawa baci wa̱ ɗa̱,
Kirisiti Kishi wi ta̱ e kuneke mu una̱singai ka̱u adama a na n neke ɗa̱.
30 Uma a̱ va̱,
n folono ɗa̱ ta̱ n kula ku Vuzagbayin vu tsu Yesu Kishi i ɓolongu nu mpa a̱ ubuta̱ wu ulinga u va̱ a̱ ubuta̱ u kuyaꞋan kavasa u Ka̱shile adama a̱ va̱.
YaꞋin nannai adama a ucigi u ɗa̱ adama a̱ va̱ u na Ayinviki a̱ Ka̱shile e nekei ɗa̱.
31 YaꞋin kavasa adama a aza a na i a uɓon u Yahuda,
aza a na e nekei ka̱ɗu n Yesu Kishi ba,
ka̱ta̱ a uka mu muna ba.
YaꞋin feu kavasa adama a na aza o Kutoni a na i a Urishelima a yaꞋan ma̱za̱nga̱ adama a ili i na n yaꞋin ka̱ta̱ n ciya̱ m ɓa̱nka̱ le.
32 Ka̱shile ku ushuku baci,
n kuta̱wa̱ ta̱ wa̱ ɗa̱ m ma̱za̱nga̱,
ka̱ta̱ ida̱shi i va̱ n a̱ɗa i zuwa mu m pana uyoꞋo ka̱ta̱ wo okpo mu wuvuki.
33 Gogo na kpamu,
yaꞋan Ka̱shile,
vuza na u ci neke tsu ma̱ta̱na̱,
u yongo n a̱ɗa̱ ra̱ka̱.
Ta nannai.