Ka̱ta̱ i yaꞋanka uma afada ba
14
Rabasai aza o Kutoni a Vuzagbayin ra̱ka̱,
ali n aza a na uneki u ka̱ɗu u le u tsurakpai ba.
Ka̱ta̱ i yaꞋan kanananai n ele adama a ili i na a ɗikai derere ɗa ko unushi u ɗa ba.
2 Agisana,
vuza yoku wu ushuku ta̱ derere ɗa a lyaꞋa icuꞋu yi ilikulyaꞋa dem.
Amma vuza yoku,
vuza na uneki u ka̱ɗu u ni u tsurakpai ba,
u tsu takuma inyama ba,
ko kenu.
3 Vuza na baci u cikalai kulyaꞋa icuꞋu yi ilikulyaꞋa dem,
ka̱ta̱ u goyo vuza na u tsu kpa̱ɗa̱ kutakuma inyama ya ba.
Vuza na kpamu u tsu takuma inyama ba,
ka̱ta̱ u ɗika adanshi vuza na u tsu ci lyaꞋa ilikulyaꞋa dem u nusa ta̱ ba,
adama a na Ka̱shile ku ushuku ta̱ ɗe n vuma vu nan lo.
4 U gaꞋan vi yaꞋanka kagbashi ka vuza yoku afada ba.
VuzakpaꞋa ɗaɗa u ci sheshe ko kagbashi ka ki a kuyaꞋan ulinga u singai ko wi a kuyaꞋan ulinga u singai ba.
Utsura u Vuzagbayin wi ta̱ a̱ kuɓa̱nka̱ agbashi a̱ ni a yaꞋan uteku u na u yotsoi.
5 Aza o Kutoni a Vuzagbayin o yoku e sheshe ta̱ adanshi kanna ko yoku ka laꞋa ta̱ ko yoku n ciɗa,
aza o yoku tamkpamu e sheshe ta̱ adanshi kanna dem derere ɗa.
Yaba dem vu ɗa̱ u zagbaka ka̱ci ka̱ ni.
6 Aza a na i e kene kanna ko yoku ka laꞋa ta̱ ko yoku,
a ci yaꞋan ta̱ nannai adama a na a ciga ta̱ kuneke Vuzagbayin tsugbayin.
Aza a na a ci lyaꞋa icuꞋu yi ilikulyaꞋa dem,
a ci yaꞋan ta̱ nannai adama a na e neke Vuzagbayin tsugbayin,
adama a nannai a ci cikpa ta̱ Ka̱shile kafu a lyaꞋa.
Aza a na kpamu a ci iwan kulyaꞋa icuꞋu yi ili dem,
a ciga ta̱ a saꞋa Vuzagbayin ka̱ɗu,
ka̱ta̱ kpamu a cikpa Ka̱shile.
7 Ci a kuyongo n wuma adama a̱ ka̱ci ka̱ tsu koci ba,
tsu tsu kuwa̱ kpamu adama a̱ ka̱ci ka̱ tsu koci ba.
8 Ci baci n wuma,
adama a Vuzagbayin a ɗa ci n wuma,
tsu kuwa̱ baci kpamu,
adama a Vuzagbayin a ɗa tsu kuwa̱i.
Adama a nannai,
ko ci n wuma ko tsu kuwa̱,
a̱tsu aza a Vuzagbayin a ɗa.
9 Ili i na zuwai ɗa Kishi u kuwa̱i ɗa u ɗenga̱i n wuma,
i ɗaɗa adama a na wo okpo Vuzagbayin va̱ a̱kpisa̱ n aza a wuma dem.
10 Adama a nannai yi ɗa̱i i zuwai ɗa vi a kuyaꞋanka aza o Kutoni a Vuzagbayin o yoku afada?
Yi ɗa̱i ɗa vu tsu goyo vuza nu?
Kanna ki ta̱ lo a̱ kuta̱wa̱ a na Ka̱shile ka kuyaꞋanka ra̱ka̱ vu tsu afada.
11 Punu a Katagarda ka Ciɗa,
Ka̱shile ka danai:
“Mpa a̱ ka̱ci ka̱ va̱ n kuyaꞋanka ɗa̱ ta̱ uzuwakpani
a na yaba dem u kukuɗa̱ngu wa̱ va̱.
Yaba dem u kudansa ta̱ sakaɗi
a na mpa ɗa Ka̱shile.”◊
12 Yaba dem sai u dana Ka̱shile ili i na u yaꞋin,
n ili i na i zuwai ɗa u yaꞋin nannai.
Ka̱ta̱ i zuwa uma kuta̱ɗa̱tsa̱ ba
13 Sai tsu ka̱sa̱kpa̱ kuyaꞋankpanai afada.
I kucikpa i sheshe punu a̱ a̱ɗu a̱ ɗa̱ uteku u na i kukpa̱ɗa̱ kuzuwa uma kuta̱ɗa̱tsa̱ ko a̱ yikpa̱ a̱ ubuta̱ wu unushi.
14 Mpa mi ta̱ uɓolongi n Vuzagbayin Yesu,
adama a nan lo kpamu n yeve ta̱ ilikulyaꞋa yi lo i na̱mgba̱i kulyaꞋa ba.
Amma vuza wu ushuku baci n ka̱ɗu ili i na̱mgba̱ ta̱,
ili i nan lo ta na ta yo okpo ta̱ nannai wa̱ ni.
15 Vi lyaꞋa baci ilikulyaꞋa i nan lo ɗa i zuwai vuza vu Kutoni vi yoku kpamu u ciya̱i atakaci punu a̱ ka̱ɗu ka̱ ni adama a ili i na vi lyaꞋi,
vi o kuyotsongu ucigi ba.
Ka̱ta̱ vu ka̱sa̱kpa̱ ilikulyaꞋa i na va kulyaꞋa i la̱nga̱sa̱ vuza na Kishi ka̱ kuwa̱i adama a̱ ni ba!
16 Ka̱ta̱ vu ka̱sa̱kpa̱ ili i na vi ɗikai i singai i ɗa yo okpo ili i na aza o yoku e kene i gbani-gbani i ɗa ba.
17 Vuza u yaꞋan baci kadanshi ko tsugono tsu Ka̱shile,
wi a kadanshi ka̱ wila̱ u kulyaꞋa n kusoꞋo ba,
amma wi ta̱ a kadanshi ku ukuna wu usuɓi,
m ma̱ta̱na̱,
m ma̱za̱nga̱ ma na Ayinviki a̱ Ka̱shile e ci neke.
18 Vi yaꞋanka baci kpamu Kirisiti Kishi tsugbashi a uye u nam pa,
vu saꞋa ta̱ Ka̱shile ka̱ɗu ka̱ta̱ uma kpamu a̱ ushuku n avu.
19 Adama nan lo ta na,
sai tsu gbagbala ayin tutu ci yaꞋan ili i na i tsu tuka̱ m ma̱ta̱na̱ n i na i tsu ɓa̱nka̱ a̱ ubuta̱ u kunekenei katsura.
20 Ka̱ta̱ i la̱nga̱sa̱ ulinga u Ka̱shile adama a ili i na i kulyaꞋa ba.
IlikulyaꞋa ra̱ka̱ i gaꞋan ta̱ kulyaꞋa,
amma u gaꞋan vu zuwa vuza u yaꞋan unushi adama a ili i na va kulyaꞋa ba.
21 Ka̱ta̱ vu takuma inyama ko vu soꞋo ma̱ra̱ ko vi yaꞋan ili i yoku kau ba,
ili i nan lo yi baci a kuzuwa vuza vu Kutoni vi yoku u ta̱ɗa̱tsa̱.
22 Ili dem i na vi yaꞋin a̱ ubuta̱ wu ukuna u nam pa avu ɗa n Ka̱shile ka̱ nu koci.
Uma a ci yaꞋan ta̱ ma̱za̱nga̱ i baci a kuyaꞋan ili i na e sheshei i gaꞋan ta̱,
babu kuyaꞋan munla̱i adama a ili ya.
23 Amma i baci a̱ munla̱i wu ukuna wi ili i na i a kulyaꞋa,
Ka̱shile ka̱ tsu ilukpa̱ le ta̱ a lyaꞋa baci i ɗa,
adama a na a̱ ushuku a na derere ɗa a yaꞋin ba.
Vi yaꞋan baci ili i na vu ushuki yi derere ba,
vi ta̱ a kuyaꞋan unushi.