Nekei ka̱ci ka̱ ɗa̱ u Ka̱shile
12
Uma a̱ va̱,
Ka̱shile ki ta̱ n ugaꞋin ɗaɗa i zuwai ɗa n folonoi ɗa̱ i neke ka̱ci ka̱ ɗa̱ u Ka̱shile tsa alyuka,
ko a na yi biꞋi n wuma.
Nekei ka̱ci ka̱ ɗa̱ a̱ ubuta̱ u kuyaꞋanka yi tsugbashi n kuzuwa yi u pana uyoꞋo.
Na va ɗaɗa uteku u na u yotsoi i cikpa Ka̱shile a̱ a̱ɗu a̱ ɗa̱.
2 Ka̱ta̱ i lyaꞋa kelime n kuyaꞋan ili i na uma a aduniyan a nam pa a ci yaꞋan ba,
amma i kucikpa i ka̱sa̱kpa̱ Ka̱shile ke neke ɗa̱ a̱ɗu a savu.
Ayin a nan lo i kuyeve ta̱ ili i na Ka̱shile ki a kuciga i yaꞋan:
yi ta̱ e kuyeve ili i singai,
n ili i na i yokpoi ni,
n ili i na yi derere mayin.
3 Ka̱shile ko yotsongu mu ta̱ kasingai,
adama a nannai,
mi ta̱ a kudana yaba dem vu ɗa̱:
ka̱ta̱ vi ɗika ka̱ci ka̱ nu vu laꞋa tsu na vi ba,
amma kucikpa vi sheshe tsu na u yotsoi ka̱ta̱ vi gisanku ka̱ci ka̱ nu n uteku u na Ka̱shile ke nekei nu uneki u ka̱ɗu.
4 Ci ta̱ n ukambu n a̱bunda̱i a ikyamba i te,
ukambu wi ikyamba u nam pa kpamu u ci yaꞋan ta̱ ulinga u ni kakau.
5 Ta kpamu nannai,
ci ta̱ n a̱bunda̱i,
amma a̱tsu dem ukambu wi ikyamba i Kishi u ɗa,
dem vu tsu feu ci ta̱ uɓolongi a ikyamba i te.
6 Ka̱shile feu ke neke ta̱ yaba dem vu tsu kuneꞋe kakau ku na u kuyaꞋanka ulinga.
U neke tsu baci utsura u kudansa kadanshi ka̱ ni,
mayun ɗa ci yaꞋan kaꞋa n uneki u ka̱ɗu u na ci n u ɗa ra̱ka̱.
7 U neke tsu baci utsura u na ci yaꞋan tsugbashi,
ci yaꞋan.
U neke tsu baci utsura u na ci yaꞋan kuyotsongusu,
ci yaꞋan.
8 U neke tsu baci utsura u na tsu dokusu aza o yoku utsura wa̱ a̱ɗu,
ci yaꞋan nannai.
Ci baci n utsura u kuneke,
ci neke ba̱ri.
Ka̱shile ka zuwa wu baci vuza vi kelime,
gbagbala ka̱ta̱ vi yaꞋan ulinga u nu mayin.
U neke wu baci utsura u na va kupana asuvayali a aza o yoku,
vi yaꞋan nannai m ma̱za̱nga̱.
Kuyongo ku ma̱riki
9 Cigai uma n ucigi u mayun.
Iwain ili i gbani-gbani,
ka̱ta̱ i ka̱na̱ gbam-gbam ili i singai.
10 Ciganai uteku u ɗa̱,
tsu na u gaꞋin vuza n vuza ni a ciganai.
I yaꞋan kataci a̱ ubuta̱ u kucikpanai.
11 Ka̱ta̱ i yaꞋan tsurogo ba,
amma i yaꞋan ulinga n kataci.
Nekei ka̱ci ka̱ ɗa̱ gbende a̱ ubuta̱ u kuyaꞋanka Vuzagbayin tsugbashi.
12 LyaꞋi kelime n kuyaꞋan ma̱za̱nga̱,
adama a na yi ta̱ n a̱pa̱Ꞌa̱.
Yi baci n atakaci,
remei a̱ɗu i yaꞋansa avasa ayin dem.
13 Nekei uma a̱ Ka̱shile ili i na a nambai.
Rabasai omoci o Kutoni a iꞋuwa i ɗa̱.
14 Uma a takacika wu baci adama a na vi vuza vu Kutoni,
ka̱ta̱ vi yaꞋanka le una̱ u wuya ba,
amma vu kucikpa vi yaꞋan kavasa Ka̱shile ka zuwaka le una̱singai.
15 YaꞋin ma̱za̱nga̱ n aza a na i m ma̱za̱nga̱,
ka̱ta̱ i shika̱ n aza a na i a̱ ma̱shi.
16 Yongoi m ma̱ta̱na̱ n itoku i ɗa̱.
LyaꞋi cija̱Ꞌa̱ n aza a na i ili ba.
Ka̱ta̱ vu ka̱ga̱,
ko vi ɗika ka̱ci ka̱ nu vi ta̱ n ugboji ba.
17 Vuza yoku u nusaka wu baci,
ka̱ta̱ vu tsupa yi n kagbani-gbani ba.
Gbagbala vi yaꞋan ili i na yaba dem u kene yi ta̱ derere.
18 YaꞋan kataci ka na va kufuɗa ka̱ta̱ vi yongo m ma̱ta̱na̱ n yaba dem.
19 A̱ja̱Ꞌa̱ a̱ va̱,
a nusaka ɗa̱ baci ka̱ta̱ i gbagbala adama a na i takacika le feu ba,
amma i vana Ka̱shile ka takacika le n wupa u ni.
Vuzavaguɗu u dana ta̱ a Katagarda ka Ciɗa,
“Mi ta̱ a kutakacika aza a na a nusai.
Mi ta̱ e kuneke le katsupu ke le adama a ili i na a yaꞋin.”
20 Kucikpa i yaꞋan ili i na Katagarda ka Ciɗa ka danai:
“Vurala vu nu vi baci n kambulu,
lyaꞋatangu yi.
Wi baci n kakuli,
neke yi mini mo kusoꞋo.
Ayin a nan lo u kupana ta̱ wono wi ili i na u yaꞋankai nu.”
21 Ka̱ta̱ i ka̱sa̱kpa̱ kawuya ka lyaꞋa utsura u ɗa̱ ba,
amma i kucikpa i lyaꞋa utsura u kawuya n kuyaꞋan ili i singai.