Ka̱shile ka panai asuvayali a aza a Israila
11
YaꞋan biꞋi n yaꞋan keci:
Ka̱shile ka iwan ta̱ uma a̱ ni,
Ayahuda?
Ko kenu!
Mpa a̱ ka̱ci ka̱ va̱ Kayahuda kaꞋa.
Mpa matsukaya mi Ibrahim maꞋa,
mpa kpamu kelentsu ka Bayami kaꞋa.
2 Ka̱shile ka zagbai aza a Israila o okpo uma a̱ ni m mani-mani va ɗe,
ka̱ta̱ kpamu u iwan le ba.
I ciɓa ta̱ n ili i na Katagarda ka Ciɗa ka danai adama a ukuna a nam pa?
Keneki Iliya u sa̱la̱ka̱i Ka̱shile adama a uma a Israila,
ɗa u danai,
3 “Vuzavaguɗu,
a una ta̱ ɗe eneki a̱ nu,
ɗa kpamu a̱ la̱nga̱sa̱i atalyalyuka a̱ nu.
Mpa ɗa keneki ka na ko okpoi endeꞋen,
gogo na kpamu i ta̱ a kataci adama a na a una mu feu.”◊
4 I ciɓa ta̱ wo tsu na Ka̱shile ku ushuki?
U danai,
“Avu ɗa vo okpoi endeꞋen ba.
Mi ta̱ n uma a̱kpa̱n e cindere (7,000) a na a̱ kpa̱ɗa̱i kukuɗa̱ngu u ka̱ma̱li BaꞋalu!”
5 Ta ki nannai gogo na.
Uma ukeci a ɗa i lo a na Ka̱shile ka zagbai adama a kasingai ka̱ ni.
6 U zagba le baci kpamu,
adama a kasingai ka̱ ni kaꞋa,
amma adama a ili i na a yaꞋin ba.
O okpo baci uma a̱ Ka̱shile adama a ili i na a yaꞋin,
kuneꞋe ku kasingai ku Ka̱shile ki a kuyaꞋan kuneꞋe ku mayun ba.
7 Na va wi ta̱ a kudana uma ukeci a ɗa koci a̱ ka̱tsuma̱ ka aza a Israila,
aza a na Ka̱shile ka zagbai a̱ ciya̱i ili i na ra̱ka̱ vi le i a̱ kula̱nsa̱.
Ele na a buwai tamkpamu a yaꞋin ugbamukaci.
8 Tsu na Katagarda ka Ciɗa ka danai:
“Ka̱shile ke nekei uma ka̱ɗu ku unashi.
U pala ta̱ a̱shi e le ɗa a̱ kpa̱ɗa̱i kene,
ɗa kpamu u votsuki atsuvu e le ɗa a̱ kpa̱ɗa̱i kupana.
Ili i nam pa i lyaꞋi kelime ali anana.”◊
9 Ɗa Dawuda u danai:
“YaꞋan ka̱ɗiva̱ kakau ke le ka aza le,
adama a na a̱ ta̱ɗa̱tsa̱
ka̱ta̱ a isa atakaci adama a ili i na a yaꞋin.
10 YaꞋan a̱shi e le a̱ yimba̱na̱ ka̱ta̱ a̱ kpa̱ɗa̱ kene,
ka̱ta̱ a ɗika ucanuku wa̱ a̱miki wa atakaci u le ali ayin a babu uteku.”◊
11 YaꞋan biꞋi n yaꞋan keci:
Ana Ayahuda a̱ yikpa̱i,
uyikpi wa wu una le ta̱?
Ko kenu!
Adama a na a nusai,
wishi u ta̱wa̱ ta̱ wa Aza̱ka̱yimbi,
na va kpamu u kuzuwa ta̱ uma a Israila a yaꞋan cisheꞋe.
12 Ayin o yoku Ka̱shile ka cigai kisa Ayahuda,
amma ɗa a iwain.
Na lo va u nekei Aza̱ka̱yimbi ka̱ba̱nga̱ ɗa a̱ ciya̱i una̱singai n a̱bunda̱i.
Ayin i ta̱ lo a̱ kuta̱wa̱ a na Ayahuda a̱ kuta̱wa̱ a kisa wishi u nan lo,
ka̱ta̱ ta na aza a na a̱ kuciya̱ una̱singai a̱ ciya̱ n a̱bunda̱i ka̱u.
Wishi wa Aza̱ka̱yimbi
13 Gogo na mi ta̱ a kuyaꞋanka ɗa̱ kadanshi a̱ɗa̱ vu na yi Aza̱ka̱yimbi.
Ka̱shile ka zagba mu ta̱ tsu vuzavusuki wa Aza̱ka̱yimbi,
mi kpamu a kuyaꞋan a̱ra̱ɗi adama a ulinga u gbayin u na u nekei mu n yaꞋan.
14 N ciga ta̱ kula̱nsa̱ uye u na n zuwa Ayahuda a cikala ili i na a̱ɗa̱ Aza̱ka̱yimbi i ciya̱i,
ka̱ta̱ tsu nan lo n ciya̱ mi isa ele vi yoku.
15 Ana Ka̱shile ka̱ shirikpa̱ka̱i Ayahuda kucina̱,
ɗa wo okpoi ka̱ja̱Ꞌa̱ ka Aza̱ka̱yimbi.
Adama a nannai Ka̱shile ka lyaꞋa baci kpamu cija̱Ꞌa̱ n Ayahuda,
wi ta̱ o kokpo an kuɗengusa̱ a̱kpisa̱ a̱ ukpa̱.
16 E neke baci Ka̱shile kawanshi ka tsuwaꞋa ka iyain,
ashe burodi va ra̱ka̱ vi ni ɗa feu.
E neke baci Ka̱shile kpamu aralu a maɗanga,
ashe acaka a a̱ ni a ɗa feu.
17 Wi ta̱ adanshi a gbatya ta̱ acaka o yoku a maɗanga ma zaitun.
A̱ɗa̱ Aza̱ka̱yimbi yi ta̱ tsa acaka a maɗanga ma zaitun ma na mo gbonguroi a kakamba ma na a gbaɓanki m maɗanga ma iyain ma.
Gogo na yi isa ta̱ ili i singai ya Ayahuda uteku u na kacaka ka savu ko tsu soꞋo mini ma̱ ni a̱ ubuta̱ u maɗanga.
18 Adama a nannai ka̱ta̱ i goyo acaka a na a gbatyai va ba.
Ciɓai,
a̱ɗa̱ ɗa yi a̱ kuɓa̱nka̱ aralu a maɗanga a ba.
Aralu a̱ ni a ɗa i a̱ kuɓa̱nka̱ ɗa̱.
19 U gaꞋan ba i sheshe ta̱ a gbatya ta̱ acaka a nan lo a,
adama a na o bonoko ɗa̱ una̱ u le.
20 Na lo mayun ɗa.
A gbatya le ta̱ adama a na e neke a̱ɗu ba,
ɗa a̱ɗa̱ tamkpamu i shamgbai ɗe adama a na i neke ta̱ a̱ɗu.
Ka̱ta̱ i ka̱ga̱ ba,
amma i pana wovon wi ili i na i kuta̱wa̱ ya yaꞋan.
21 Ka̱shile ka gbatya baci acaka a iyain a,
ashe tsu nan lo feu wi ta̱ a kufuɗa wa gbatya ɗa̱.
22 Ashe ye ene ta̱ Ka̱shile ko yotsongu ta̱ asuvayali,
ɗa feu u kpa̱ɗa̱i kucana.
U takacika ta̱ aza a na a̱ ka̱sa̱kpa̱i kutono yi.
I lyaꞋa baci kelime n kuyongo a uye u na u kuyaꞋanka ɗa̱ kasingai,
wi ta̱ o kuyotsongu ɗa̱ ugaꞋin u ni.
I yaꞋan baci nannai ba,
wi ta̱ a kugbatya ɗa̱ a maɗanga ma.
23 Ayahuda i baci kpamu o kudoku kuneke a̱ɗu n Ka̱shile,
wi ta̱ o kudoku wa zuwa le kpamu a̱ ubuta̱ u na ishi cau.
Wi ta̱ n utsura u na u kuyaꞋan nannai.
24 A̱ɗa̱ Aza̱ka̱yimbi yi ta̱ tsu kacaka ka maɗanga ma zaitun ma kakamba ma na a gbatyai,
ɗa a gbaɓanki m maɗanga ma singai ma zaitun.
Na va ɗaɗa uteku u na a ci yaꞋan ili ba!
Amma tsu na Ayahuda a nan lo i tsu kacaka ka na ko gbonguroi a̱ ubuta̱ u maɗanga ma singai,
mayun i ta̱ a kufuɗa o doku a gbaɓa le a maɗanga me le kpamu.
Ka̱shile ka panai asuvayali a uma ra̱ka̱
25 Uma a̱ va̱,
n ciga ta̱ i yeve ili yu usokongi i nam pa,
adama a na i yeve a na i yevei ili dem ba,
ka̱ta̱ feu i ka̱ga̱ ba.
Ayahuda o yoku i ta̱ n ugbamukaci,
amma na va u kulyaꞋa ta̱ kelime koci ali sai ayin a na a shatangi ka̱bunda̱i ka Aza̱ka̱yimbi,
aza a na Ka̱shile ka zagbai,
a̱ ta̱wa̱ u Kirisiti Kishi.
26 Na ɗa kpamu uteku u na Ka̱shile ka kisa aza a Israila ra̱ka̱.
Tsu na Katagarda ka Ciɗa ka danai:
“Kishi ki ta̱ a̱ kuta̱ a Sihiyona,
ka̱ta̱ u takpa asuvawuya ra̱ka̱ a̱ ubuta̱ ntsukaya n Yakubu.
27 Mi ta̱ a kuyaꞋan uzuwakpani u nam pa n ele
a ayin a na baci n takpai unushi u le.”◊
28 Ayahuda a iwain kushuku n Arabali a Singai,
ɗa o okpoi irala i Ka̱shile.
Ili i nam pa i yaꞋan ta̱ nannai adama a na a̱ ɓa̱nka̱ a̱ɗa̱ vu na yi Ayahuda ba.
Amma Ayahuda uma a ɗa a na Ka̱shile ka zagbai ali n gogo na,
ɗa wi kpamu a kuciga le adama a uzuwakpani u na u yaꞋankai ikaya i le Ibrahim,
n Ishaku,
n Yakubu.
29 Ka̱shile ka tsu sabaꞋa ka̱ɗu ka̱ ni adama a uma a na u ɗekei n ili i na u nekei le ba.
30 N ayin a cau a̱ɗa̱ Aza̱ka̱yimbi i iwan ta̱ kupanaka Ka̱shile.
Amma ayin a yawai ana Ayahuda a iwain kupanaka yi,
ɗa Ka̱shile ko yotsongi ɗa̱ asuvayali a̱ ni.
31 Ko n gogo na Ayahuda a iwan ta̱ kupana,
adama a nannai Ka̱shile ki ta̱ a kufuɗa kuyotsongu le asuvayali a̱ ni tsu na u yotsongi ɗa̱.
32 Ka̱shile ka zuwa ta̱ uma ra̱ka̱ o okpo tsa aza a na i a̱ ubuta̱ wu ugbashi adama a na a iwain kupanaka yi,
ciya̱ u yotsongu asuvayali we le ra̱ka̱.
Kucikpa u Ka̱shile
33 Yayi u kufuɗa kugisanku uciyi,
n ugboji,
n kuyeve ku na Ka̱shile ki n ku ɗa?
Yayi u kufuɗa kuyeve kusheshe ku ni?
Yayi u kufuɗa wa dansa sakaɗi ili i na u ci yaꞋan ra̱ka̱?
34 Uteku u na Katagarda ka Ciɗa ka danai,
“Yayi u yevei ka̱ɗu ka Vuzavaguɗu?
Yayi u kufuɗa wa yaꞋanka yi odoki?”◊
35 “Vuza yoku u saꞋwa ta̱ ɗe kukopuku Vuzavaguɗu
ili i na sai u tsupa yi?”
36 Ka̱shile ka yaꞋan ta̱ ɗe ili dem.
A̱yi ɗa u tsu zuwa ili ra̱ka̱ i lyaꞋa kelime.
Ili ra̱ka̱ yi ta̱ o kokpo adama a na i neke yi tsugbayin.
Mayun ɗa ci cikpa Ka̱shile ko wanai!
Ta nannai.