Agisana o yolo
7
Uma a̱ va̱,
ra̱ka̱ vu ɗa̱ i yeve ta̱ Wila̱ u Musa.
I yeve ta̱ ta na a na mayun ɗa Wila̱ wa wi a kulyaꞋa tsugono u uma koci a ayin a na i n wuma.
2 Agisana,
vuka vi yaꞋan baci yolo,
wila̱ u shiya yi ta̱ a vali vi ni wi baci n wuma.
Amma vali va vu kuwa̱ baci,
wila̱ u yolo u doku u shiya yi kpamu ba.
3 Amma wo olo baci vali vi yoku,
vali vi ni biꞋi n wuma,
Wila̱ u danai u yaꞋan ta̱ tsugbani.
Amma vali vi ni vu kuwa̱ baci,
u ba̱ruwa̱ ta̱ a̱ ubuta̱ u wila̱ u yolo,
ko wo olo vali vi yoku u yaꞋan kpamu tsugbani ba.
4 Uma a̱ va̱,
ta ki nannai n a̱ɗa̱.
Wila̱ u buwa a kulyaꞋa tsugono wa̱ ɗa̱ ba,
adama a na i kuwa̱ ta̱ a̱ ubuta̱ wu utsura u ni,
ana i kuwa̱i koɓolo n Kishi a maɗanga ma atakaci.
Gogo na kpamu yi ta̱ koɓolo n vuza na a̱ ɗengusa̱i a̱ ukpa̱,
adama a na ci yaꞋanka Ka̱shile tsugbashi.
5 N ayin a mani-mani,
ukambu u wuma u tsu u na wi n unushi u lyaꞋa ta̱ tsugono wa̱ tsu.
Wila̱ u zuwa tsu ta̱ ci ciga kuyaꞋan ili yu unushi i na i lyaꞋi tsugono a ikyamba i tsu.
Adama a nannai ɗa ili dem i na ci yaꞋin i tuka̱i tsu a̱ ubuta̱ wu ukpa̱.
6 Amma Wila̱ u buwa a kulyaꞋa tsugono wa̱ tsu ba.
Ci ta̱ an a̱kpisa̱,
Wila̱ kpamu u kuciya̱ utsura wa̱ tsu ba.
Gogo na ci ta̱ a kuyaꞋanka Ka̱shile tsugbashi n uye u savu a̱ ubuta̱ u kupanaka Ayinviki a̱ ni,
amma n uye u kuku u kupanaka Wila̱ u na a ɗanai ɗe ba.
Wila̱ n unushi
7 I kusheshe ta̱ adanshi mi ta̱ a kudana unushi n Wila̱ ili i te i ɗa.
Ta nannai ba,
amma Wila̱ u ɗa u zuwai mu n yeve tsu na unushi wi.
Agisana,
mi ishi e kuyeve ili i na a̱ ciya̱i n kuciga ki ili i vuza yoku kau ba,
sai Wila̱ u dana mu ka̱ta̱ n yaꞋan nannai ba.
8 Unushi u ɗa u yaꞋin ulinga n wila̱ u nam pa,
wi ta̱ a kuzuwa mu n cikala ili kakau n a̱bunda̱i.
Wila̱ wi baci lo ba,
unushi wi ishi a̱ kuciya̱ utsura u nan lo ba.
9 M muɗa̱ ka̱ɗu n ukuna u yoku ba,
kafu n yeve ili i na Wila̱ u danai n yaꞋan.
Amma ana n yevei i ɗa,
ɗa n yevei a na n nusai ɗe,
ɗa kpamu mi vuza vu unushi vu na u kukuwa̱.
10 Wila̱ u na wi ishi a na wa zuwa mu n yaꞋan wuma,
ɗa u kucikpa u zuwai mu n kuwa̱.
11 Unushi u la̱nsa̱i ka̱ba̱nga̱ ka na u kuya̱nsa̱ mu,
ɗa u yaꞋin ulinga n wila̱ adama a na wu una mu.
12 Ko a na nannai wi mayun,
wila̱ n iɗani wi ta̱ ciɗa,
n derere,
n ugaꞋin kpamu.
13 Mi ta̱ a kudana ili i singai i ɗa yi a kuzuwa mu n kuwa̱?
Ko kenu!
Unushi u ɗa u ɗikai ili i singai ɗa u yaꞋin ulinga n i ɗa adama a na u tuka̱ n ukpa̱ u va̱.
Ili i nam pa i yaꞋan ta̱ adama a na me ene uteku u na unushi wi mayun.
Ili i na i zuwai ɗa Wila̱ n iɗani i ni yi lo ɗaɗa adama a na u yotsongu a na unushi ili i wuya i ɗa ka̱u.
Kugbagbala adama a na vu nusa ba
14 Ci yeve ta̱ a na Wila̱ u gaꞋin.
Wila̱ u ɗa u tuka̱i n atakaci ba,
amma mpa ɗa,
adama a na vuma ɗa mi koci.
Adama a nannai,
unushi wi ta̱ a kulyaꞋa tsugono wa̱ va̱ adanshi mpa kagbashi ka̱ ni kaꞋa.
15 N yeve ili i na i zuwai ɗa mi a kuyaꞋan ili i na mi a kuyaꞋan ba.
Mayun n ciga ta̱ kuyaꞋan ili i na yi derere,
amma n yaꞋan i ɗa ba.
Kucikpa,
ɗa mi a kuyaꞋan ili i na n iwain.
16 N yeve ta̱ a na ili i na mi a kuyaꞋan derere ɗa ba,
na va ta na u yotsongu ta̱ a na mu ushuki Wila̱ wi ta̱ n ugaꞋin.
17 Adama a nannai mpa ɗa mi a kuyaꞋan ili i kawuya i nam pa ya ba.
Unushi u na wi o kuyongo nu mpa u ɗa wi a kuyaꞋansa i ɗa.
18 Ukambu u va̱ u na wi u kuku ɗa kpamu wi n unushi u ka̱sa̱kpa̱ mu n yaꞋan ili i na i gaꞋin ba.
Ko n ciga kuyaꞋan ili i na i gaꞋin,
mi a kufuɗa ba.
19 N ciga baci kuyaꞋan ili i singai,
n ci yaꞋan ba.
M gbagbala baci kpamu ka̱ta̱ n nusa ba,
ɗaɗa n tsu kucikpa n yaꞋan.
20 Amma mi baci a kuyaꞋan ili i na n cigai kuyaꞋan ba,
mayun mpa ɗa vuza na wi a kuyaꞋan ili ya ba.
Unushi u na wi punu wa̱ va̱ u ɗa wi a kuyaꞋan i ɗa.
21 Kuyeve ku ukuna u wuma ku yotsongu mu ta̱ a na ili i yoku yi punu wa̱ va̱,
i ɗa i sa̱nka̱i mu kuyaꞋan ili i na n yevei yi derere.
22 Ka̱ɗu ka̱ va̱ ka yaꞋan ta̱ ma̱za̱nga̱ adama a̱ wila̱ u na wu uta̱i a̱ Ka̱shile.
23 Amma a̱ ubuta̱ dem punu a asuvu a̱ va̱ n cina ta̱ ili i na yi a̱ vishili n ili i na ka̱ɗu ka̱ va̱ ka cigai kuyaꞋan,
ɗaɗa i zuwai ɗa mo okpoi kagbashi ku unushi ka na ki o tsugono a ili i na n yaꞋin dem.
24 Adama a nannai asuvu a̱ va̱ a̱ da̱sa̱ngu ba!
Yayi u kisa mu a̱ ubuta̱ wi ikyamba i nam pa i na yi a kuzuwa mu n kuwa̱?
25 N cikpa ta̱ Ka̱shile adama a na Yesu Kirisiti Kishi a̱yi ɗa vuza na u kisa mu.
Ta mi nahannai:
a̱ ka̱ɗu ka̱ va̱,
n ciga ta̱ mo tono wila̱ u Ka̱shile,
amma ukambu u va̱ u na u ci ciga n yaꞋan unushi,
u tsu zuwa mu ta̱ mo okpo kagbashi a̱ ubuta̱ wu unushi.