Unushi wi n utsura ba
6
Ve ene ta̱ u laꞋa ta̱ n kugaꞋan ci lyaꞋa kelime n kuyaꞋan unushi adama a na Ka̱shile ko doku kasingai ka̱ ni a̱ ubuta̱ u tsu?
2 A̱Ꞌa̱,
ta nannai ba!
Ukuna wu unushi u ɗa baci,
ci ta̱ ukpa̱,
nini ɗai kpamu tsa kulyaꞋa kelime n kuyaꞋan unushi?
3 I cinukpa ta̱ a na ra̱ka̱ vu tsu tso okpoi vi te u Kirisiti Kishi a ayin a na a yaꞋankai tsu kusumbu ka akucina?
Ana a yaꞋankai tsu kusumbu ka akucina,
tsu kuwa̱i tsu na a̱yi u kuwa̱i.
4 Ana a yaꞋankai tsu kusumbu ka akucina,
u yaꞋan ta̱ adanshi ishi ta̱ a̱ ciɗa̱ngu tsu koɓolo n a̱yi,
adama a na a̱tsu feu tsu kuwa̱ ta̱ n a̱yi.
Esheku n tsugbayin ci ni n utsura dem ɗa u zuwai Kishi u yaꞋan wuma kpamu.
Ta kpamu nannai,
u zuwai tsu ci yaꞋan wuma a uye u savu.
5 Tsu bono baci vi te n Kishi a̱ ubuta̱ wu ukpa̱,
mayun ɗa feu tsu bono vi te n a̱yi a̱ ubuta̱ wu wuma feu.
6 Ci yeve ta̱ a una ta̱ uteku u na ci ishi cau a maɗanga ma atakaci koɓolo n Yesu,
adama a na unushi u namba utsura u ni a̱ ubuta̱ wu wuma u tsu.
Ka̱shile ka yaꞋan ta̱ ili i nam pa,
adama a na ikyamba yu unushi i tsu i lyaꞋa kelime n kokpo agbashi a̱ unushi ba.
7 Ta wi nannai a ayin a na uma a̱ kuwa̱i ka̱ta̱ a̱ ciya̱ uba̱ruwi,
unushi wo kudoku wa lyaꞋa utsura u le kpamu ba.
8 Tsu kuwa̱ baci n Kirisiti Kishi,
ci yeve ta̱ ci ta̱ a kuyaꞋan wuma n a̱yi.
9 A̱ ɗengusa̱ ta̱ Kishi n wuma,
ci yeve ta̱ wi o kudoku wa̱ kuwa̱ kpamu ba.
Ukpa̱ wi n ili i na u kuyaꞋan n a̱yi gogo na ba.
10 Ana Kirisiti Kishi u kuwa̱i,
u kuwa̱i kute adama a na u lyaꞋa utsura wu unushi,
wi o kudoku wa̱ kuwa̱ kpamu ba.
Gogo na wi ta̱ n wuma u savu,
wuma u savu u ni wa wi ta̱ koɓolo n Ka̱shile.
11 Ta kpamu nannai,
ye ene ka̱ci ka̱ ɗa̱ adanshi yi ta̱ ukpa̱ n utsura wu unushi,
yi ta̱ e kene ka̱ci ka̱ ɗa̱ kpamu adanshi yi ta̱ n wuma u Ka̱shile adama e Yesu Kirisiti Kishi.
12 Adama a nannai,
ka̱ta̱ i ka̱sa̱kpa̱ unushi u lyaꞋa kaci ka̱ ɗa̱ punu na a aduniyan ba.
Ka̱ta̱ i tono ili i gbani-gbani i na a̱ɗu a̱ ɗa̱ a cikalai kuyaꞋan ba.
13 Ka̱ta̱ i ka̱sa̱kpa̱ ko ukambu wi ikyamba u ɗa̱ u te wo okpo ili i kuyaꞋan kawuya,
adama a na i tono unushi ba.
Amma i kucikpa,
i neke ka̱ci ka̱ ɗa̱ gbende u Ka̱shile adama a na yi ta̱ tsu uma a na ishi ukpa̱,
amma gogo na Ka̱shile ka zuwa ɗa̱ ta̱ i yaꞋan wuma.
Nekei ikyamba i ɗa̱ gbende u Ka̱shile,
adama a na i yaꞋan ili i na yi i ma̱riki,
n ili i na i kuneke Ka̱shile tsugbayin.
14 Unushi u buwa a kulyaꞋa kaci ka̱ ɗa̱ ba.
Kasingai ka̱ Ka̱shile kaꞋa ki a kulyaꞋa tsugono a̱ a̱ɗu a̱ ɗa̱,
amma Wila̱ u ɗa ba.
Agbashi a na a ci yaꞋan ili i na Ka̱shile ka cigai
15 U gaꞋan ta̱ ci yaꞋan unushi ba̱ri,
adama a na kasingai ka̱ Ka̱shile ki a kulyaꞋa tsugono a̱ a̱ɗu a̱ tsu,
amma Wila̱ u ɗa ba?
Ko kenu,
ta nannai ba!
16 I yeve ta̱ a na mayun ɗa ili i na baci i zagbai kutono i ɗa i kokpo vuzagbayin vu ɗa̱.
Yi ta̱ a kufuɗa kuzagba unushi,
ili i na i tsu tuka̱ n ukpa̱,
ko i zagba kutono Ka̱shile ka̱ta̱ yo okpo aza a̱ usuɓi.
17 N ayin a ɗe,
agbashi a unushi a ɗa yi ishi.
Amma n cikpa ta̱ Ka̱shile uteku u na i tonoi mayin kupiꞋisa ku na n yaꞋankai ɗa̱.
18 Ka̱shile ka shikpa ɗa̱ ta̱ a̱ ubuta̱ wu unushi,
ɗa yo okpoi agbashi a̱ Ka̱shile adama a na i yaꞋan ili i ma̱riki.
19 N yaꞋan ta̱ kadanshi n agisana a nam pa,
adama a na i fuɗa i yeve ili i na mi a kudansa babu atakaci.
N ayin a ɗe,
i bonokoi ka̱ci ka̱ ɗa̱ agbashi a unushi n ili i gbani-gbani.
Gogo na mayun ɗa i zagba kokpo agbashi a na o kokpo n usuɓi adama a na yo okpo ciɗa.
20 N ayin a mani-mani,
ana yi ishi agbashi a̱ unushi,
i ci keɓece n kuyaꞋan ki ili i ma̱riki ba.
21 I yaꞋin ili i gbani-gbani,
ɗa gogo na yi a kupana wono u le.
Ili i nan ya i tuka̱ ɗa̱ n ili i singai ba ko kenu,
ukpa̱ u ɗa i tsu tuka̱ koci.
22 Amma gogo na Ka̱shile ku uta̱ka̱ ɗa̱ ta̱ a̱ ubuta̱ wu utsura wu unushi,
a̱ɗa̱ kpamu yo okpo ta̱ agbashi a̱ Ka̱shile.
Gogo na i yaꞋan ili i nan lo i na i tsu zuwa ɗa̱ yo okpo ciɗa,
ali i ɗa i neke ɗa̱ wuma u babu uteku.
23 Vuza u yaꞋan baci unushi,
wi ta̱ a̱ kuciya̱ katsupu,
ɗaɗa ukpa̱,
amma Ka̱shile ke neke tsu ta̱ wuma u babu uteku gbani a̱ ubuta̱ u Yesu Kishi Vuzagbayin vu tsu.