A lazai a kubana o Tosolonika
17
Bulusu n Sila o tonoi n Amifiba n Apoloniya,
ɗa a yawai o Tosolonika,
a̱ ubuta̱ u na kunu ka avasa ka Ayahuda ki.
2 Ɗa Bulusu u uwai uteku u na u kiwanai a̱ kunu ka avasa ali Ashibi a tatsu ele a kudansa koɓolo adama a ili i na yi punu uɗani a kadanshi ka̱ Ka̱shile.
3 U ka̱na̱i kuyaꞋanka le kadanshi u danai eneki a danai mayun ɗa i ta̱ e kuneke Kishi atakaci,
ka̱ta̱ u kuwa̱ ali u ɗenga̱.
Ɗa u danai le kpamu,
“Yesu Kishi vu na mi a kuyaꞋanka ɗa̱ kadanshi ka,
a̱yi ɗa vuza na u kisa uma.”
4 Aza o yoku a̱ ka̱tsuma̱ ka Ayahuda e nekei a̱ɗu e le.
Aza e Helene n a̱bunda̱i o tonoi Ka̱shile n a̱ma̱ci a na i e kuneke tsugbayin kpamu,
ɗa a̱ ushuki n kadanshi ka̱ Bulusu n Sila ɗa o ɓolongi kaci n ele.
5 Amma Ayahuda a yaꞋankai le tsurala,
ɗa o ɓolongi aza a̱ ida̱shi i gbani a na o ci yongo e kuden,
adama a na a̱ ɗengusa̱ vishili.
Ɗa a sumai a kubana a kpaꞋa ku Yason,
ɗa a̱ ka̱na̱i kula̱nsa̱ Sila m Bulusu,
adama a na o rono le a kubana u uma.
6 Adama a na koɓolo ka uma ka kene Bulusu n Sila lo ba,
ɗa a̱ uta̱ka̱i Yason n aza o Kutoni o yoku,
ɗa a ɗikai ni a kubanka a̱ ubuta̱ wa aza e kusheshe a̱ likuci.
Ɗa koɓolo ka uma ka ko orukpoi le,
“Bulusu n Sila o fitikpo ta̱ a̱ɗu a uma a aduniyan a,
ɗa o okpoi mozoro,
ɗa kpamu i na a̱ likuci i tsu adama a na a yaꞋan nannai.
7 A̱yi Yason kpamu ɗa u rabasai le a kpaꞋa ku ni.
Ra̱ka̱ vi le ɗa o goyoi wila̱ u Mogono Kaisa,
ɗaɗa a danai vuma vi yoku Yesu mogono maꞋa.”
8 Kadanshi ka nam pa ka ka zuwa ta̱ uma a̱ likuci a n azagbagbaꞋin a̱ likuci a namba ma̱riki,
ɗa a̱ na̱mgba̱i a̱tsuma̱.
9 Ɗa aza a̱ likuci a a zuwai anan Yason a tsupa ikebe,
ɗa e yevei a̱ ka̱sa̱kpa̱i le a laza.
Bulusu u banai a Biriya
10 Gogo lo,
ana kanna ka̱ yikpa̱i,
aza o Kutoni a̱ suki Bulusu n Sila a bana Biriya.
Ana a yawai,
ɗa a banai a̱ kunu ka avasa ka Ayahuda.
11 Aza a Biriya i ta̱ a kuciga kupana ka̱u,
ali a laꞋi aza a Tosolonika.
Ɗa a zuwai atsuvu mayin a na a kupana kadanshi ka̱ Bulusu.
Kanna n kayin o ci yongo ta̱ a̱ kula̱na̱sa̱ Kadanshi ka̱ Ka̱shile adama a na a̱ la̱na̱ ko ili i mayun a ɗa.
12 Uma n a̱bunda̱i e nekei a̱ɗu e le a̱ ubuta̱ u Vuzagbayin Yesu,
n a̱ma̱ci a tsugbayin a aza e Helene o yoku n ali kpamu n a̱bunda̱i.
13 Ana Ayahuda a̱ Tosolonika a panai Bulusu wi ta̱ ɗe a kudana uma kadanshi ka̱ Ka̱shile a Biriya,
ɗa a banai ɗe,
ɗa a̱ ka̱na̱i kukushangu uma a̱ ɗengusa̱ vishili.
14 Aza o Kutoni a̱ la̱nga̱sa̱ ayin ba,
ɗa a bankai Bulusu a̱ ka̱kina̱ ka mala,
amma Sila n Timoti o okpoi ɗe a Biriya.
15 Aza a na i koɓolo m Bulusu o okpoi ɗe koɓolo n a̱yi,
ali a yawai a̱ likuci i Atina,
ɗa o bonoi a Biriya n akaka a kubana u Sila n Timoti.
U danai wi ta̱ a kuciga a yaꞋan moloko a cina yi ɗe a Atina.
Bulusu a Atina
16 Bulusu ɗe a kuvana le Atina ka̱ɗu ka̱ ni ka̱ na̱mgba̱ ta̱ ka̱u,
adama a̱ a̱ma̱li a na wi e keneshe a̱ ubuta̱ dem a̱ likuci ya.
17 Ɗa u banai a̱ unu a avasa a Ayahuda.
Ta punu u ci cina aza a Ayahuda n Aza̱ka̱yimbi a na i o kutono Ka̱shile adama a na u yaꞋanka le kadanshi.
Ayin dem u ci yaꞋan ta̱ kadanshi n aza a na u cinai e kuden dem.
18 Ɗa kpamu u ka̱na̱i kuyaꞋan kanananai n a̱la̱nshi e kuyeve e Epikuriya n Sitokiya.
Ana u ka̱na̱i kudana le ukuna u Yesu n uɗengi u ni a kasaun,
ɗa a danai,
“Kalau ka nam pa ka̱ tuka̱ ta̱ n ili i savu.”a
Aza o Sitokiya ele ayin tutu o ci yongo ta̱ e kusheshe adama a̱ ka̱ci ke le,
a ci ciga kpamu ili i na i kutuka̱ n uyoꞋo ba.
Uma o yoku a danai “Wi ta̱ a kuciga kuɗengusa̱ kutoni ka̱ a̱ma̱li o yoku.”
19 Ɗa a ɗikai Bulusu a bankai u yaꞋan kadanshi n aza e kusheshe a̱ likuci,
e ci ɗeke le ta̱ AzagbagbaꞋin a Arasa,
ɗa e ecei ni,
“Dana tsu ili i na kuyotsongusu ku savu ka ku danai.
20 Tsu panaka wu ta̱ a kudansa ili i savu i na ci yevei ba,
ci ta̱ a kuciga ci yeve.”
21 (Aza a Atina n omoci a na a̱ da̱sa̱ngi ɗe adama a na a dansa ukuna u savu i ta̱ kpamu a kuciga e yeve ili i savu i na yi lo dem.)
22 Ɗa Bulusu u ɗenga̱i ɗa u danai:
“A̱ɗa̱ aza a Atina,
me ene ta̱ yi ta̱ a kuciga yo tono a̱ma̱li n a̱bunda̱i.
23 Ana mi a̱ kuka̱ra̱Ꞌa̱sa̱ likuci i nam pa,
me ene ta̱ yi ta̱ n atalyalyuka a̱ ubuta̱ dem.
A̱ ka̱tsuma̱ ke le katalikalyuka ko yoku a ɗana ta̱ ili i nam pa gaɗi vi ni,
‘Vuza Yoku vu na Ci Yevei Ba.’
Ka̱shile ka na yi a kuyaꞋanka tsugbashi yi ishi i yeve kaꞋa ba.
Amma mpa mi ta̱ a kudana ɗa̱ ili i na ka̱ta̱ i yevei ba.
24 “Ka̱shile ka nam pa ka,
a̱yi ɗa u yaꞋin gaɗi n iɗika n ili i na yi punu ra̱ka̱.
An wo okpoi a̱yi ɗa Vuzavaguɗu vu gaɗi,
u ci yongo a̱ ubuta̱ u na uma a maꞋi adama a na o tono yi ba.
25 Ekiye a vuma kpamu a kufuɗa e neke yi ili i na u nambai ba.
Mayun a̱yi u namba ili ba.
A̱yi ɗa u ci neke ili dem ayinviki,
u ci neke le ta̱ dem ili i na i a kuciga.
26 A̱ ubuta̱ u vuma vi te ɗa Ka̱shile ka yaꞋin uma a na yi e kene na ra̱ka̱.
Kafu a yaꞋan ili dem,
ɗa u zuwakai uma uteku wi iɗika,
n a̱ya̱ a na o kuyongo punu.
27 “U yaꞋan ta̱ nannai,
adama a na uma a aduniyan a̱ la̱nsa̱ Ka̱shile,
ka̱ta̱ a papa yi adama a na a̱ ciya̱ yi.
Ko an wi daꞋin n ele ba.
28 Wi ta̱ koɓolo n a̱tsu,
a̱yi ɗa kpamu u tsu zuwa tsu ci yongo n wuma,
ka̱ta̱ tsu wala,
ɗa tso okpoi ili i na anana ci.
Uteku u na aza a ishipa i ɗa̱ a danai,
‘A̱tsu muku n ni n ɗa.’
29 “Adama a na ta nannai,
ka̱ta̱ ci yaꞋan kadanshi adanshi Ka̱shile ka̱ma̱li kaꞋa ka na uma a ci yaꞋan n ekiye e le ba,
aza a na a tsu maꞋa ili n azanariya n azurufa n atali ba.
30 N ayin a na a lazai Ka̱shile ka ci cinukpa ta̱ n ili i nam pa ra̱ka̱,
adama a na e yeve i na i a kuyaꞋan ba.
Amma gogo na wi ta̱ a kudana yaba dem u ka̱sa̱kpa̱ a̱ma̱li a̱ ni u bono u tono yi.
31 “U zuwa ta̱ ɗe kanna ka na u kuyaꞋanka aduniyan a nam pa afada uteku u na u gaꞋin.
Vuma vu na u zagbai u kuyaꞋanka uma afada,
u yotsongu tsu ta̱ vuma va a ayin a na u ɗengusa̱i ni a kasaun.”
32 Ana a panai Bulusu u yaꞋin kadanshi ka vuza na a̱ ɗengusa̱i a kasaun,
aza o yoku o zosoi,
amma aza o yoku a danai,
“Ci ta̱ a kuciga tsa pana kadanshi ka nam pa ka a kubana megeshe.”
33 Ta kadanshi ka ko kotsoi nannai.
34 Ɗa aza o yoku o tonoi ni,
ali ɗa o okpoi aza o Kutoni.
Ɗa Donisiya vuza na wi feu punu a̱ ka̱tsuma̱ ka azagbagbaꞋin a,
n vuka vi yoku kula ku ni ku ɗa Damarisa,
n aza o yoku o okpoi aza o Kutoni.