Yesu u potsokpoi ka̱yimba̱
9
Ana Yesu wi a nwalu,
ɗa we enei vuma vu na wi ka̱yimba̱ ali n ayin a na a matsai ni.
2 Mukumitoni n ni me ecei ni,
“Malum,
yi ɗa̱i i zuwai ɗa vuma vu nam pa wi ka̱yimba̱ ali n ayin a na a matsai ni?
Adama a na u yaꞋin unushi u ɗa ko adama a na isheku i ni i nusai?”
Jesus heals a blind man (Yahaya 9:1-41)
3 Ɗa wu ushuki,
“Vuma vu nam pa,
uyimba̱ u ni adama a unushi u ni ko wi isheku i ni u ɗa ba.
Ta a matsai ni nannai adama a na Ka̱shile ko yotsongu utsura u ni a kubana wa̱ ni.
4 N kanna kaꞋa,
tsa kulyaꞋa kelime n kuyaꞋan ulinga u vuza na u suki mu.
Kayin ki ta̱ lo a̱ kuta̱wa̱,
babu vuza na u kufuɗa kuyaꞋan ulinga.
5 A na mi biꞋi na a aduniyan,
mpa ɗa vuza na u tsu zuwa kutashi a̱ ubuta̱ u uma punu na a aduniyan.”
6 Ana u danai nannai,
ɗa u cikpa̱i ntsa̱n a iɗika,
ɗa u na̱na̱i n kayala.
Ɗaɗa u surai kayala ka̱ ntsa̱n a̱ a̱shi a vuma a.
7 Ɗaɗa u danai vuma va,
“Bana vu saꞋa a̱shi a̱ nu a kadaɓa ka na e ci ɗeke Suluwamu.”
(“Suluwamu” ɗaɗa “Usuki.”)
Ɗaɗa vuza va u banai ɗa u saꞋi a̱shi a̱ ni ɗe.
Ɗa u bonoi a kpaꞋa n kene.
8 Ɗaɗa uma a̱ ubuta̱ u nan lo n aza o yoku a na e yevei ka̱yimba̱ kaꞋa wi ishi n kofoloni kpamu,
ɗa e ecei,
“Vuma vu nan lo vu ɗaɗa na va,
vuza na wi ishi ida̱shi a kuyaꞋan ufolu?”
9 Aza o yoku a danai,
“A̱yi ɗa.”
Amma aza o yoku a danai,
“A̱Ꞌa̱.
Iyotsonoi i ɗa.”
Ɗa kofoloni ka ka̱na̱i kudana,
“Mpa ɗa biꞋi de va!”
10 Ɗa e ecei,
“Nini ɗai ɗa gogo na vi e kene?”
11 Ɗa wu ushuki,
“Vuma vu na e ci ɗeke Yesu a̱yi ɗa u na̱na̱i ntsa̱n n kayala ɗa u surakai mu a̱ a̱shi.
Ɗa u danai mu m bana Suluwamu n saꞋa a ɗa.
Ɗaɗa m banai ɗa n saꞋi,
ɗa ta na n ka̱na̱i kene.”
12 Ɗa e ecei ni,
“Te ɗai vuma va wi?”
Ɗa wu ushuki,
“N yeve ba.”
Afarishi a piyai kula̱nsa̱ ili i na i zuwai
13 Ɗaɗa uma a ɗikai vuza na wi ishi ka̱yimba̱ ka a bankai a̱ ubuta̱ wa Afarishi.
14 Kanna ka na Yesu u na̱na̱i ntsa̱n n kayala ɗa u potsokpoi a̱shi a vuma a,
n Ashibi a ɗa.
15 Ɗaɗa Afarishi e ecei vuma va,
“Nini ɗai vi ciya̱i kene?”
Ɗa wu ushuki,
“U surakai mu kayala ka̱ ta̱ku a̱ a̱shi,
ɗa n saꞋi a ɗa,
ɗa gogo na mi e kene.”
16 Afarishi o yoku a danai,
“Vuma vu nam pa Yesu u Ka̱shile u ɗa wu uta̱i ba,
adama a na u tono wila̱ wa Ashibi ba.”
Amma aza o yoku a danai,
“Vuma vu na baci wi vuza vu unushi wi a kufuɗa kuyaꞋan urotu wi ili i mereve nahannai ba.”
A fuɗa ta na a panakpanai ba.
17 Ɗa e ecei vuma va kpamu,
“Yi ɗa̱i va kudana adama a vuma vu na u potsokpoi a̱ a̱shi a̱ nu a?”
Vuma va wu ushuki,
“Keneki kaꞋa.”
18 Ayahuda a iwain kuneke a̱ɗu a na vuma va wi ishi ka̱yimba̱,
amma gogo na wi ta̱ e kene.
Ɗaɗa a̱ suki le a bana e ɗeke vuma va isheku i ni.
19 E ecei le,
“Maku ma̱ ɗa̱ ma na va?
I dana ta̱ wi ishi ta̱ ka̱yimba̱ ana i matsai ni.
Nini ɗa̱i ɗa gogo na wi e kene?”
20 Isheku i ni yu ushuki,
“Ci yeve ta̱ a na maku ma̱ tsu maꞋa,
ci yeve ta̱ kpamu ka̱yimba̱ kaꞋa wi ishi ana tsu matsai ni.
21 Amma ci yeve ko nini ɗai gogo na u ka̱na̱i kene ba.
Ci yeve kpamu vuza na u potsokpoi uyimba̱ u ni ba.
Ecei ni.
U yawa ta̱ u yaꞋan kadanshi n ka̱ci ka̱ ni.”
22 A dansai tsu nam pa adama a na i ta̱ a kupana wovon wa Ayahuda.
Ayahuda a nam pa a dana ta̱ ɗe vuza na baci u danai Yesu Kirisiti Kishi kaꞋa,
wi o kudoku kuꞋuwa a̱ kunu ka avasa kpamu ba.
23 I ɗaɗa i zuwai ɗa isheku i ni i danai,
“U yawa ta̱ u yaꞋan kadanshi n ka̱ci ka̱ ni.
Ecei ni.”
24 Ayahuda e ɗekei vuma va u doku u ta̱wa̱i ire ɗa a danai ni,
“Kucina n Ka̱shile ka̱ta̱ vu dansa mayun!
Ci yeve ta̱ vuma vu na u potsokpoi nu va wi ta̱ n unushi.”
25 Wu ushuki,
“Mpa n yeve ko a na vuza vu unushi ɗa wi ba.
Ili i te i na yevei i ɗa na:
Mi ishi ta̱ ka̱yimba̱,
amma gogo na mi ta̱ e kene.”
26 E ecei,
“Yi ɗa̱i u yaꞋin n avu?
Nini ɗai u potsokpoi a̱shi a̱ nu?”
27 Ɗa wu ushuki,
“N dana ɗa̱ ta̱ ɗe,
amma yu ushuku ba.
Yi ɗa̱i ɗa i cigai i doku i pana kpamu?
I ciga ta̱ yo okpo aza o kutoni a̱ ni feu?”
28 Ɗa a dansukai ni a danai,
“Avu ɗa makumitoni ma̱ ni,
amma a̱tsu mukumitoni m Musa n ɗa.
29 Ci yeve ta̱ a na Ka̱shile ka yaꞋin kadanshi m Musa,
amma ali n gogo na ci yeve ko likuci ye ne i ɗai vuma vu nam pa wu uta̱i ba.”
30 Vuma va wu ushuki,
“Ili i mereve i ɗa na va!
U potsokpoi a̱shi a̱ va̱,
amma i yeve ubuta̱ u na wu uta̱i ba.
31 Ra̱ka̱ vu tsu ci yeve ta̱ a na Ka̱shile ka tsu panaka aza a̱ unushi ba,
amma u tsu panaka ta̱ vuza na u tsu tono yi ka̱ta̱ u yaꞋan ili i na u danai.
32 Ali n ayin a na Ka̱shile ka yaꞋin aduniyan,
babu vuza na u fuɗai u potsokpoi a̱shi a vuza yoku vu na wi ishi ka̱yimba̱ ali n ayin a na a matsai ni.
33 Ka̱shile ka̱ suku baci vuma vu nam pa ba,
wi a kufuɗa kuyaꞋan ili ba.”
34 A danai ni,
“Vuza vu unushi ɗa vi ali n ayin a na a matsai nu!
Vi sheshe ta̱ vi ta̱ a kufuɗa kuyotsongusu tsu ili?”
Ɗaɗa a danai ni u kuꞋuwa a̱ kunu ka avasa ka kpamu ba.
Uyimba̱ wa Afarishi
35 Ana Yesu u panai ili i na yi lo,
u la̱nsa̱i vuma va ɗa we ecei ni,
“Vi neke ta̱ ka̱ɗu ka̱ nu u Maku ma Vuma?”
36 Ɗa wu ushuki,
“Vuzagbayin,
dana mu a̱yi ɗa ya,
adama a na n neke ka̱ɗu n a̱yi!”
37 Yesu u danai ni,
“Ve ene yi ta̱ ɗe,
a̱yi ɗa vuza na wi a kadanshi n avu gogo na.”
38 U danai,
“Vuzagbayin,
n neke ta̱ ka̱ɗu.”
Ɗaɗa vuma va u kuɗa̱ngi u cikpai Yesu.
39 Yesu u danai ni,
“N ta̱wa̱ ta̱ keꞋwe uma a aduniyan a nam pa.
N ta̱wa̱ ta̱ kuneke kene wa̱ a̱yimba̱,
ka̱ta̱ n yotsongu aza a na kpamu e sheshei ele a̱yimba̱ a ɗa ba,
a na a̱yimba̱ a ɗa i.”
40 Afarishi a na i kashani ɗe a panakai ni,
ɗa e ecei,
“Vi ta̱ a kudana a̱tsu a̱yimba̱ a ɗa ci?”
41 Yesu wu ushuki,
“Ishi baci a̱yimba̱ a ɗa yi,
yi ishi a kuyaꞋan unushi ba.
Amma a na i danai yi ta̱ e kene,
na va u yotsongu ta̱ a na i buwai n unushi u ɗa̱.”