Pas Cha Jut kareꞌe
1
Nena Cha Jut,
raꞌai mentan ya Cha Jems,
wokboi kanapon ya Yesus Krais.
Pas ve kaneꞌe nopu aro bombiam God-a veku kairipu ke nokepi veka aro bombiam ya veku.
Ta God Cha Tata,
karereropu revo ta kaoreraripu ke nokepi nonoi nuinyia iu revo taim Yesus Krais-a nararo varu.
2 Beten-a inyia kanao noa God ke naokoku ropu ta riꞌi mariri naropu ta raꞌa vou minyiao keta nopuyarau revo pasin yaꞌa karereropu ero.
Ya ao en keta nere kupuana revo laip mopu.
Aro ine kepetrotropu awirai neman kekape sios aꞌari
3 Aro Kristen raꞌai awere rou neman nena,
okoranako revo ke pas-a naneꞌe nanairai nopu revo vatiron row boꞌo God-a inyia karao ke nako memi varu aro mowmow.
Ta mare,
kanayarau veka keta pas ve naneꞌe ya kupuana nanopu veka,
nopu revapana ke noporepariu bilip em God-a karomi eno memi aro yaꞌa ke nemoremamiu.
Ta mopu via awirai yei aro inyia ine kepetrotropu awirai neman nopu rivo poiy vai.
God-a rara moikerao vou bilip po karao ta bio raꞌa via kuinyia iu bilip memi narovoru vai.
4 Aro ovu kekape kakana ven sios aꞌari.
Tija awakai,
God-a kayarau ven ta karao beiyo okoraiko ta awirai-ya kepeꞌe veka,
beiyo veka keta neropi kot ya God.
Ta rara voro kot-a netawo ero keta nowaun.
Em aro oreva keupoa God ta awirai vou marimari ya God-a kerovoru kepao veka ao vou tok orait-a koromi ke pasin taipetaipe maramara iu ine ya God-a nemao.
Aro ve oreva keupoa bio anoi romi cha,
Biapako memi Yesus Krais.
5 Israel-a kenopi kekepi meꞌri koraꞌa yei kantri Isip ta Biapako karainyai reo varu bo vere.
Ya kopei taim karainyiaka upuo,
ovu yei bilip yei kepepeo ta via ebilip pova.
Korao veka ta karovoru ya kabagarapim yei revo aro via ebilip pova ero.a
Awirai vou ao en mopu kopuyarau ven.
Ta kanake awirai ve tare nanairai nopu nopurivo vova.
6 Mopu kopuyarai ven ensel,
tija via ekepi revo bo yeib ta boꞌo voro God-a karoiy ero kepao vai.
Biapako sen vou uinyia toratora karonai ya kararai keparo revo boꞌo rorokeo awakai.
Ya kekepikeo de pako vou kot ya God-a nokamap.
7 Veka tija,
aro bombiam vou mataimon Sodom ta Gomora ta rere mataimon ovu kerinyia kaku iu mataimon riepin emo,
pasin taipetaipe awakai-ya keparepare.
Pasin pamuk-a kepao ta pasin maramara ovu keretaipo revo minyiao kepapao.
God-a aiyerao va kasalim koraro kokirariy ta kobagarapim yei nau aro bombiam ta mataimon em minyiao.
Ya ao taipetaipe ve aro bombiam vou mataimon ve epao emo,
korao iu revo veka pasin yei ensel-a epao ero.
Korao veka ta ao en koriritao veka,
God-a ao veka keta narao roiy aro bombiam voro kot yei via ewinim ero,
keta nekepi aiyerao vou uinyia toratora.
8 Ta aro ve kepake ruru mopu nerovoru,
yei aro pa kepikeo pasin em.
Pa va ta kepikere ao voro yei veku keyiyonare ero,
ao en inyia kererao okoraiko ta pasin taipetaipe voro kererao rere veku kerorokeo revo iu ine ya God.
Aro emo awirai ya God-a kyioniy ta via pa epikeiya Biapako ta keterei minyiao nambawan ensel vou heven.
9 Ta nambawan ensel Maikel awirai-ya kairai wararoa Satan row bia nape koka yaꞌa Cha Moses kako taim karai kainyia.
Ta Cha Maikel via abikhet ta poko taipo airai roa Satan vai.
Baun ben.
Kairai veka,
“Biapako veku keta natovema ya nairai roma roꞌo va namaito.”
10 Aro ve inyia ketereo ao voro yei veku ku vou via eyarau vai.
Kepao veka aome uka ruru awakai-ya kowaun rei ta kyiutute kyiararao po pa kepikeo laik vou reka yei.
Pasin yei emo inyia kobagarapim yei veku.
11 Aro veka God-a keta nabagarapim yei revo.
Pasin veka kepao emo,
korao iu veka pasin Cha Kein karao tija.c
Ta pa kepikeo bereren pasin taipo veka Cha Balamd karao tija ero,
karitoro veka ao mowmow ketao po kebaim.
Kebikhet ta awirai ya God-a via erivo veka pasin Cha Kora karao tija ero,e
kabikhet ta awirai ya God-a kapana.
Ya rara emo po,
aro ve rara yei nenopi ero kowaun ya keta nerepiroki nau.
12 Taim kopokeo lotu ta aokorom-a kopa minyiao ke nopiritao veka mopu aro bombiam ya God,
kokepi rimoꞌo moikerao ya koperepow mopu veku.
Ta aro veka ve inyia kekape aokorom ve kebagarapim veka rip-a kuinyia nao ta kobagarapim rere bot-a nau wua taim nerekare iu kakuke.f
Aro ve via kuinyia iu reka noyoe taim aokorom-a nepa romoiy aro mowmow ta ao mowmow neraipao nokai roiy yei po.
Aro ve kepao veka uteno via ororokeo revo ke a va noai ta puꞌu va koavovore kerenori tintin.
Raꞌa vou minyiao kepao veka aꞌai-ya kerekore kererori kanapo,
taim rere via akai-ya nereave vai.
Kepao veka aꞌai-ya kere urura ven ta beiyo kaꞌa rere keparatao.
Aꞌai veka ta beiyo veka keviri nau ven.
13 Aro ve nai-ya inyia keparepare.
Kepao veka nao ipipo kereraoko revo.
Ta yei via reka oyoe row pasin taipo epao ero vai.
Kekape vatiron veka nao ropi.
Raꞌa vou minyiao,
kepao veka kamoꞌo via pa ererikeo revo rara rere uteno nake.
Korao veka ta God-a bo rorokeo kareirao ke nekepi toratora bo em.
14 Cha Enok,
yaꞌa namba 7 apo tii ya Cha Adam.
Taim kakei,
awirai profet-a kairai veka,
“Kana pirikeiya Biapako kararo nai holi ensel mowmow yaꞌa via kuinyia iu nemi kauntim yei vai.
15 Kot-a keta narimirao revo aro mowmow.
Keta narao roiy toro aro voro via pa epikeiya ero,
keta neyarau revo nai vou pasin taipo yei epao ero.
Beiyo ovu sin-a kepao ero,
via eperepova revo God ta oreva keupoa.
Korao veka ta,
karake narao aro voro poko taipo kyirai poa ero taipo vou neyarau.”g
16 Aro em,
riꞌi taipo inyia kokokorenai bereren,
ta kevuivui pore ao voro inyia kerekare iꞌiy ero.
Inyia pa kepikere ao taipetaipe voro riꞌi yei kokokorenai row nepao ero.
Piakorerei kyiararao.
Yei veku ku awakai vou awoꞌo pako nepoiy beiyo ta gris-a nepaopoiy ke pa nepikeo laik yei.
Mopu keta nopao bilip-a norao noropi kupuana
17 Ta mopu aro Kristen raꞌai awere rou neman nena,
mopu keta ova nopukinao pow awirai yei aposel ya Biapako memi Yesus Krais kyirirai pore ao voro keta nerekare pa ero.
18 Inyia kyirai popu veka,
“Taim vou las de,
aro yei awirai-ya kepana ta kebikhet ta piakorerei ero,
keta nekape.
Aro ve via kuinyia iu neperepova God ta pa va keta nepikeo laik yei veku kepitoro veka koneman iꞌiy.”
19 Beiyo ve,
pa kepikeo po ruru vou meꞌri ve ta kuinyia iu beiyo neraipaiy ya ruru nepeirovoru ke neraipapu nopawetari.
Ero korao veka,
Holi Spirit-a via akei iꞌiy vai.
20 Ta mopu aro Kristen raꞌai awere rou neman nena,
bilip mopu keta nopao nuinyia nokupuana row laip neman ve God-a veku karopu ero.
Ya taim beten-a nopao,
keta nopin Holi Spirit-a kupuana eri ruru neman-a naropu.
21 God bia ya karereropu revo.
Korao veka ta mopu nokepi iya revo kakuke,
ke kuinyia iu narao ropu revo ya nokepi keiya Biapako memi Yesus Krais-a keta naokoku ropu ya narainyiapu nonopi nokepi roki laip vou uinyia toratora.
22 Mopu keta nopu okoku poiy revo aro bilip yei inyia kokoi korei ta via okupuana revo vai.
23 Ovu yei aro veka,
korao veka kekepi rovo ven aiyerao.
Korao veka ta boꞌo kuinyia ipu ke nopuko yei varu ya nopu rainyiaka peo aiyerao.
Ya taim ovu yei nopu okoku poiy,
keta nopu riri poiy revo pasin yei ya veku noporeparipu ya nokepi pere revo rarapa ao mowmow kere rorokere iu ine ya God.
Ero korao veka kenopi revo pasin kuro vou riꞌi tora ta kepao ao va kere rorokeo revo kuinyia iu noreka yei minyiao kere rorokeo revo iu ine ya God.
Awoꞌo pako konoi roa God
24 God-a kuinyia iu naoreraripu revo ta via kuinyia iu norepi vai.
Keta narainyiapu nonopi roki bo neman awakai yaꞌa ero ya noropi revo ine yaꞌa,
ya oꞌto notepu ta via nai-ya raꞌa nuinyiatapu vai.
25 God moikerao po kakei ta bia yaꞌa kako memi varu row boꞌo ya Biapako memi Yesus Krais karao ero.
Awoꞌo yaꞌa nemavoko kuinyia iu nakei king memi ta ao mowmow keta nereinyia roko kupuana yaꞌa veku po.
Kakei ato tija ta mare ta pa ere minyiao keta nakei po veka.
Awakai no.