Mema keta skul-a namoiy revo aro bombiam ke pa nepikere pasin God-a karererow
2
Ta mema ma Taitus,
keta skul-a namoiy aro bombiam row pasin vou pa korikeo revo awirai ya God.
2 Mema keta awirai-ya namairai namaonao moiy revo aro beiy ke
nyiorepariu revo pasin yei veku.
Ya pasin neman-a keta nepao ya awoꞌo neman-a neko,
ya pa nepikeo po ruru awakai.
Ya keta nesave revo ya nebilip pova revo God,
ya pasin vou neperepoiy aro ovu po nepao,
ta pasin vou neropi kupuana ya nai-ya nepoi.
3 Korao veka ta mema keta namairai more aro bom beiy ya skul-a namore revo,
ke pa nererikeo revo pasin God-a karererore.
Viake nereyiraikakare aro ovu
ta via nererin pii kupuana nobosim laip rere ya nerekamap veka wokmeri kanapon vou pasin en vai.
Keta skul-a nererore aro bom ovu ke pasin neman neman po nererao.
4 Bo aro bom beiy pasin veka nererao,
kuinyia iu skul-a nererore aro bom yangpla am-a kererunai ero,
ke nerereroiy revo am ta meꞌe rere.
5 Raꞌa vou minyiao,
aro bom yangpla ve am-a kererunai emo keta
pa nererikeo po ruru awakai,
ya nerekeri nereniniu revo iu ine ya God.
Ya nereyorerariu revo oꞌro rere,
ya pasin neman po nererao roiy aro mowmow.
Ya nerekeri roko iꞌiy am rere ya awirai-ya nererivo roiy.
Taim pa nererikeo ao mowmow en,
aro bombiam mowmow via kuinyia iu netereo awirai ya God vai.
Cha Taitus pasin neman-a keta narao roiy aro biam yangpla ke kuinyia iu pa nepikeo
6 Korao veka ta mema ma Taitus,
awirai-ya namairai moiy aro biam yangpla ke ova noraiko ya pa nepikeo po ruru awakai.
7 Ao mowmow namaremare,
mema veku keta pasin neman po namiritai ke nepirike ya pa nepikeo.
Taim skul-a namoiy,
via namaropomei o namabikhet o pianorerema.
Keta boꞌo awakai-ya namao ya awirai awakai-ya namairai.
8 Pasin raꞌa keta namao moiy ya pa nepikeo korao veka,
taim skul-a namoiy,
awirai awakai po namairai ya via kuinyia iu rong-a raꞌa nyiorenao iu awirai memi.
Bo namao veka,
aro ine epemitrotropu via kuinyia iu pianepari pow awirai memi vai,
keta reka noyoe row ruru taipo yei.
Yei wokboi keta pa nepikeo awirai yei bosman yei
9 Mema keta skul-a namoiy wokboi kanapo ke nepeikepi roko bosman yei.
Boꞌo yei keta nepao revo ke bos yei oꞌto notei roiy revo.
Ta via roꞌo nepeikokao bosman yei vai.
10 Via aokakana nepao voiy bosman yei vai.
Awirai yei bosman keta pa nepikeo,
ya bosman yei keta ova noroꞌoi row pasin yei.
Korao veka ta,
ao neman mowmow wokboi kanapon-a kepake neparepare ero,
keta noraipai aro mowmow awoꞌo pako nepow awirai en inyia kemirirai ero.
Awirai awakai em yaꞌa God,
Bia ya nako memi varu.
11 Kanairai noma skul-a namoiy aro bombiam yaꞌa God rore ao prumo God-a kararerare,
ke aro ovu ova noroꞌoi row pasin yaꞌa God.
Ero korao veka,
marimari yaꞌa God,
kokai ven vatiron romi aro bombiam mowmow.
Ya marimari en kuinyia iu noko memi varu.
12 Marimari ya God inyia skul-a koromi ke pasin vou oreva nemoa God ta pasin vou nemeremore ao vou meꞌri en nememeoki.
Awakai,
memi kekemi romoiy aro bombiam vou meꞌri en,
ta marimari ya God inyia skul-a koromi ke pa nemikeo ruru awakai ya pasin neman po nemao iu ine ya God.
13 Memi keta nemao bilip memi nokupuana ya nekemikeo ao neman keta nokai ya nemipirike ya ova noromi.
Ao neman en,
em Yesus Krais yaꞌa God kupuana memi.
Bia yaꞌa nako memi varu keta nakai pa nau glori pako yaꞌa.
14 Laip ya veku karereo ya karai ya kako memi varu ta sin mowmow memi kapereoki.
Karao romi veka,
ero korao veka,
kuinyia iu nekemi nemininiu iu ine yaꞌa ya nemao veka aro bombiam awakai yaꞌa veku.
Ya kekemi kemiredi po ke boꞌo vou pasin neman po nemao.
15 Mema namba kuinyia ima ero keta awirai kupuana namairai moiy aro bombiam ke nokokore naiy ya pa nepikeo.
Raꞌa vou minyiao,
namairai naiy aro voro oreva kepow awirai ve,
pasin yei nepao noniniu.
Ta via namin beiyo awirai mema nepyevope vai.