Pas Cha Pol kareꞌe roa
Cha Taitus
1
Nena Cha Pol,
nena wokboi kanapo yaꞌa God,
aposela ya Yesus Krais.
Kasalim nena ke kupuana nanoiy aro bombiam mowmow kamompe kekepi veka aro yaꞌa veku,
ya narao bilip yei nokoi nopako,
ta raꞌa vou minyiao neyarau revo awirai awakai yaꞌa ero.
Awirai awakai en,
emo rara vou pa nepikeo pasin neman veka yaꞌa veku karererow ero.
2 Nena boꞌo en kanao ke noelpim yei aro bombiam ya God ke bilip yei nokupuana,
ya kuinyia iu neropi kupuana ya nekepi oꞌto notei ya nekepikeiya God ke laip vou nekepi revo toratora naroiy.
Tija taim God-a baunke via ao va raꞌa arao okai vatiron,
promis-a karao ven veka keta laip vou nuinyia toratora naromi.
Ya God ve via aokanapon-a airai vai.
3 Kokai kuinyia iu revo taim yaꞌa veku kamompe,
God bia yaꞌa nako memi varu karao awirai yaꞌa kokai vatiron ya boꞌo vou awirai yaꞌa nairirai karona kuinyia eno nena.
4 Ma Taitus,
mema kakemi ma awakai nena,
ta pas en kanenoma.
Bilip kuinyia ima ero korao iu minyiao veka bilip memi.
Cha Tata God eri Krais Yesus,
bia ya nako memi varu ero,
kuinyia iu neraimarimarib poma ya riꞌi mariri neraipoma.
Cha Taitus keta hetman neman vou sios-a namompe
5 Ku vou kanenema kakemi ailan Krit korao veka,
mema keta boꞌo korakora baunke kerinyia ero namaokime nau,
ta raꞌa vou minyiao keta namamompe yei hetman vou sios erinyia mataimon mowmow,
veka tija kanairai noma ero.
6 Mema keta namamompe yaꞌa bia voro aro bombiam-a kepirikeiya veka via rong-a arao iu ine yei.
Bia voro keta om moikera po nako ya mevova yaꞌa keta nebilip pova Krais,
ta via awoꞌo taipo neko pow pasin vou uvonepana ta awirai-ya nepana vai.
7 Ero korao veka,
bio kanoi cha row boꞌo vou sios,
ero bia yaꞌa boꞌo yaꞌa God-a kaorerariu.
Ta via pasin taipo narao,
ke aro bombiam-a rong-a raꞌa nepirikeo iu laip yaꞌa vai.
Korao veka ta,
via naritoro kakei veka lida yei ta awoꞌo pako kako ta narao roiy toro aro bombiam vai.
Ta via ova neiyaroro bereren,
pii kupuana naton naspak,
aro bombiam-a nayei,
ta ketao va nau ao maramara vou meꞌri narererow revo vai.
8 Pasin
neman-a keta narao roiy aro bombiam ekape oꞌro yaꞌa,
ya keta nakei veka bia ya karererore revo ao neman ya God po.
Ya toratora pa va keta narikeo po ruru awakai,
ya pasin niniu po nararao roiy aro bombiam,
ta yaꞌa veku keta naoroa God ya naute naniniu iu ine yaꞌa.
Ya laip yaꞌa veku keta naorerariu revo ya ao taipo via kuinyia iu nerekamap riꞌi ta ruru yaꞌa vai.
9 Awirai awakai ya God-a skul-a kemoa ero keta navo revo kupuana.
Korao veka ta yaꞌa veku kuinyia iu skul-a naroiy aro bombiam ke riꞌi nokokore naiy ya nebilip ya pa nepikeo awirai awakai ve.
Kopei bo ovu ruru taipo nuinyia iꞌiy row awirai awakai ve,
keta nastretim yei ya neyarau ya ruru awakai-ya nokai iꞌiy varu.
Ailan Krit beiyo roporere ovu kekepi ta kepaolim yei aro bombiam ke via nebilip
10 Mema keta wasman neman vou sios-a namamompe yei.
Ero korao veka,
mowmow yei beiyo awirai-ya kepana ta via eperepow awirai awakai,
kekepi bo en.
Inyia keropopei aro bombiam ta awirai kanapon-a kyirirai ta ruru yei kebagarapim.
Aro mowmow pasin veka kepao en,
yei Juda.
Aro vevo inyia keropi kupuana pow ruru nau pasin vou taoc va nyioro.
11 Mema keta namao roꞌo va nyeto.
Aro veka emo inyia kyiutute popore oꞌro yei aro bombiam kebilip ta inyia keropopei ta ruru nau laik yei kebagarapim.
Pasin veka yei emo,
memi aro bombiam via nemao vai.
Inyia kyiutute popore oꞌro ta kei yei beiyo kebagarapim,
ta ketao va keko pei aro bombiam row skul roporere yei.
12 Tija saveman raꞌa yei Krit veku kairai veka,
“Aro Krit,
awirai roporere kyirirai ta ketaipei revo veka aomeꞌe uka.
Yei ta kyioniy ya kekepi aokorom-a kerirou.”
13-14 Awirai em awakai.
Korao veka ta awirai kupuana baunke inyia namairirai naiy ke norao pasin yei nerovoru ya pasin taipo via nepao vova vai.
Ya nebilip pova revo God ta via kuinyia iu pa nepikere awirai roporere kerekare iꞌiy ruru yei Juda veku ero,
ta lo maramara yei aro inyia oreva kepow awirai awakai.
15 Aro bombiam-a nekepi neniniu iu ine ya God,
aokorom mowmow veka kereniniu iu ine yei,
kuinyia iu neko.
Kopei yei aro bombiam sin maramara keparepare iu ine God ta via ebilip pova Krais,
ao mowmow en keretaipo revo iu ine yei.
Ero korao veka,
pasin taipo yei ero korao riꞌi nau ruru yei kotaipo revo ta via kuinyia iu pasin neman-a neyarau o pasin taipo neyarau.
16 Roꞌo yei inyia kyirai veka kesave yaꞌa God.
Ta pasin yei koriritao veka via esave yaꞌa vai.
Oreva kepoa ta awirai-ya kepana ta via kuinyia iu boꞌo neman-a raꞌa nepao vai.