Ni rixxiꞌa gue bixxudi te lábi Melquisedec
7
Melquisedec ucabi biꞌini rinnabia gue yiesi lá Salem,
ucaguabi bixxudi gue Tata Do Iyyabaaha Benni anque Benni ra xxeni lee.
Atti dedaa Abraham güiabi bitilhabi dequide udábi lo ca nu rinnabia gue ca yiesi seꞌe nía,
Melquisedec biríabi guatsábi Abraham qui unnababi aca len Tata Do Iyyabaaha biꞌiniha.
2 Laniala nna begüee Abraham biꞌiniha tsii gue ttu gayua gue iyába nu beojabi gue ca nu bitilha lenbiha.
Lá Melquisedec dienna innána nu rinnabia runi elha uxtisi tsee.
De ucabi nu rinnabia gue yiesi lá Salem,
nuarca teeguaba lábi nu rinnabia runi riseꞌe tsee len loesi benni.
3 Tsa läganu yuna gue nuxa uca tata nan gue Melquisedec,
niguaba gue nuxa uca benniola guebi lhe.
Nuttuguaba nu yu gue nuca ulbi lhe niguaba gue nucaxa uttibi lhe.
Nuarcala labi ancaguababi attiba Xiꞌin Tata Do Iyyabaaha de ancabi bixxudi do ttu dia liiba.
4 Nnanna nna Gualúnarga,
cattipa nu ra xxeni leni uca Melquisedec,
nuarca axtaba benniola gueri Abraham begüeebi biꞌiniha tsii gue ttu gayua gue iyába nu beojabi gue ca nu rinnabia bitilha lenbiha.
5 Lo ca ley bocaꞌana Moisés rixxiꞌa rá dequi ca benni raca bixxudi datía benni lá Leví labíaba ridícabi tsii gue lo ttu gayua gue iyába nu ridí ca benni gue sina runcana,
masquiba raca ca nua benni datíacabi lhe anca ca nua benni datía Abraham attiba lacabi lhe.
6 Ttiaca Melquisedec masquiba bittu ancabi benni datía Leví,
labi nna uxíbi tsii gue de lo ttu gayua gue nu denoja Abraham.
Melquisedec nna unnababi aca len Tata Do Iyyabaaha Abraham biꞌini chi begüee Tata Do Iyyabaaha tisa unie ttu nu tsee lenbi.
7 Riꞌi nna gua yubari,
benni ra xxeniru leniha liba nua rinnabana aca len Tata Do Iyyabaaha benni ra güexxaru leniha.
8 Ca bixxudi datía Leví ridí tsii gue de lo ttu gayua nu rute benni,
nu re elhutti guebani ancacana,
ttiaca lo ca sitsi gue Tata Do Iyyabaaha rixxiꞌa gue Melquisedec,
biꞌiniha nna do attiba banbabi.
9 Larcala nna guacaba innári,
ca benni datía biꞌini lá Leví ridí tsii gue de lo ttu gayua gue iyába nu ridí benni gue sina runcana,
attisiba labacabi nua utixa tsii gue de lo ttu gayua atti utixa Abraham tsii gue de lo ttu gayua leni Melquisedec.
10 Cumu lania nna lheꞌe reni gue Abrahamba chi yuꞌu benni lá Leví atti biría Melquisedec guatsábi Abraham.
Jesús anque loesi bixxudi uca Melquisedec
11 Ca ley bete Tata Do Iyyabaaha len ca benni Israel,
bocaꞌane que las ná ca bixxudi datía Leví.
Ttirca udába ca bixxudiha utúacabi ca tulha gue ca benni,
lania nna careꞌaba loesi bixxudi uca Aarón tseꞌe,
lärga uca duelha isía attu bixxudi subi loesi bixxudi uca Melquisedec.
12 Cumu gansi otsiacana attu lo bixxudi,
anáguaba raca duelha otsiaguabacana ca ley-na.
13 Bixxudi subi Benni rinne ca sitsi gue Tata Do Iyyabaaha guee-na anque Jesús Benni bananie ri-na.
Lee nna läga anque Benni datía Leví,
sinuqui Ben-na anque Benni datía attu cue benni Israel bittu chi uca ni ttucabi bixxudi.
14 Chiba yuri,
lee anque benni datía attu cue ca benni Israel datía Judá.
Masquiba atti unne Moisés gue nupa aca bixxudi,
tsa lägabi rábi gansi aca ca biꞌiniha bixxudi.
15 Unní nna adíla lhixxa radú leri-na nnanna cumu de chi bisía attu loo bixxudi,
loesi bixxudi uca Melquisedec.
16 Jesús beꞌeyue uque bixxudi,
läga de rá lo ca ley-na labíattiga anque benni datie Leví,
sinuqui bedúe anque bixxudi de anque Benni ra xxeni leni do ttu dia lii.
17 Cumu Tata Do Iyyabaaha rinnee lo ca sitsi guee-na re Jesús:
Lu nna ttu dia liiba ancalu bixxudi,
loesi bixxudi uca Melquisedec.a
18 Anioca nuarca bitúa nu rá ca ley bocaꞌan Moisés,
de bitturu lheaca ancaque,
de bitturu bixuu nu ráque lhe.
19 Cumu ca ley bocaꞌan Moisés tsa läga udáque unque eꞌeyu ca benni acacana nu anca nari lo Tata Do Iyyabaaha.
Denuala nna cuenta gue ca ley-na chi tee attu benni tseeru uxxen leri,
Benniha runi qui ribigari lo Tata Do Iyyabaaha.
20 Atti bodú Tata Do Iyyabaaha Jesús aque bixxudi,
bedetti lee qui bocaꞌan tsitsi tisa guee.
Adí ca bixxudiha nna anátteba beseꞌecabi,
läga bedetti lee qui eyaꞌan tsitsi tisa rugüe.
21 Ttiaca atti bealha ladi Jesús aque bixxudi,
cuinaba Tata Do Iyyabaaha bedetti lee.
Cumu lo ca sitsi gue Ben-na re:
Benni bananie ri-na chi re tsa bittu otsia tisa guee,
cuinaba lee bedetti lee atti begüee tisa re:
“Lu nna ttu dia liiba acalu bixxudi
loesi bixxudi uca Melquisedec.”b
22 Larcala nna Jesús anque benni ribea loe gue ca tisa begüee Tata Do Iyyabaaha.
Lee due re:
gualíba tseeru anca ca tisa-na atti ca ley uxí Moisés.
23 Adí ca bixxudiha nna ixebacabi uca cumu risíaba sá ratticabi,
denua nna läga raca usiguicabi tseꞌecabi acacabi bixxudi.
24 Ttiaca Jesús,
ttu dia liiba anque bixxudi,
cumu de bittu gattie,
nuarcala nna lärga edú attu bixxudi cuenta gue Ben-na.
25 Denua nna raca gue Jesús rodile ca benni ttu tsaba,
ca nu dia ribiga lo Tata Do Iyyabaaha de chi ria lecani Jesús,
Ben-na anque Benni do ttu dia liiba,
satíaba rinnabe aca len Tata Do Iyyabaaha ca benni.
26 Larcala nna Jesús anque bixxudi xeni reasinri.
Lee anque Benni do riesi anca gue Tata Do Iyyabaaha,
Benni bittu runi ni ttu nu lä anca tsee lhe Benni bittu tulha guee te lhe Tata Do Iyyabaaha ulequiesie Benniha lheꞌe ca nu runi tulha.
Labe anque Benni ra xxeniru lee do iyyabaaha.
27 Lee nna läga anque attiba adí ca bixxudi xeniha.
Ca biꞌiniha nna raca duelha rutticabi ca nimala ttuttu sá qui rutecabi úna lo becoa gue Tata Do Iyyabaaha.
Primerba gue ca tulha guecabi rutecabi úna,
lenla nna gue ca tulha run ca benni.
Jesús nna ttu libeba betee úna lo Tata Do Iyyabaaha gue ca tulha gueri atti la labe bete elha nabani guee qui uttie lo ya crusiha.
28 Lo ca ley bocaꞌan Moisés nna rá:
“Ca benni runi nu lä anca tseeba eseꞌe aca bixxudi xeni.”
Ttiaca dequide bete Tata Do Iyyabaaha ca ley bocaꞌane len Moisés,
lee nna bodhaꞌan tsitsie tisa guee,
Xiꞌinie Jesúsba aque bixxudi xeni Benni do ttu dia lii bittu che tulha.