Jesús mteyac thìb mbiꞌ cheꞌn yèez Betesda, mbiꞌ coꞌ mque no thìb yíiz coꞌ nac yíiz bech.
5
Ngolo nguriꞌth conꞌa, mzin huiz lni coꞌ nac huiz lni cheꞌn mèn nación Israel. Làth xtauꞌa, Jesús mbere ngua par ned leꞌn ciuda Jerusalén. 2 Leꞌn ciuda Jerusalén, ndoo thìb puert coꞌ ngroꞌ lèe Puert cheꞌn Mbacxilꞌ. Ngoꞌth thìb tanc nít tya. No tanca ngroꞌ lèe diꞌstèe hebre Betesda. Ro tanca nziriꞌ thìb corredor coꞌ mque no gaꞌy portal coꞌ ngòc gaꞌy arc. 3 Ro portal cheꞌn corredora ngureriꞌ huax mèn yíiz, mèn sieu, mèn renc, no mèn coꞌ mque no yíiz bech. Mèna nzi bed par huin nít. 4 Tac thìb angl ndryoꞌ leꞌn béꞌ no ndlyàa angl loo béꞌ cad pól no ncuin angl nít. No mèn yíiz coꞌ nerlequeꞌ ndlyàa leꞌn níta láth ngüin nít, ndxac mèna loo chol yíiz coꞌ mque no mèna. 5 Ngo thìb mbiꞌ làth rye mèn yíiza tya. Mbiꞌa ndxàcleꞌ gal psiꞌ pxon línꞌ ndyac len. 6 Coꞌseꞌ gunèe Jesús nax mbiꞌa no non Jesús ndxàcleꞌ línꞌ ndyac len mbiꞌa, ndxab Jesús loo mbiꞌ:―¿Chéꞌ ndlyaꞌsl yacl, càꞌ, ey?
7 Mbiꞌ mcàb loo Jesús. Ndxab mbiꞌ:
―Aa, Tad, per yende chó mèn lyath no daa par làa mèn daa leꞌn tanc coꞌseꞌ ngüin nít. Tac coꞌseꞌ ndlyazen làan leꞌn tanc, no ndooreꞌ zin daa ro tanc, tedib mèn ngulàaleꞌ leꞌn tanc. Cona, ngue niin loo Uꞌ: Neꞌlide thidten gan par làan leꞌn tanc, Tad.
8 Jesús ndxab loo mbiꞌ:
―Goo che. No fthùuz dáal coꞌ ndxàaꞌl. No fxen ned. Byàa par lizl.
9 Leque hora, chàa, mbyac mbiꞌ. Mthùuz mbiꞌ dáa mbiꞌ. Mxen mbiꞌ ned. Ndyàa mbiꞌ par liz mbiꞌ. No leꞌxqueꞌ huiz coꞌ mbyac mbiꞌa ngòc huiz sabd coꞌ ngòc huiz descans tiempa. 10 Sya, ndxab mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel loo mbiꞌ coꞌ mbyaca:
―Mbiꞌ, nalze nac huiz sabd coꞌ nac huiz descans. Indxàalte hueꞌl dáa baꞌ.
11 Per mbiꞌ coꞌ mbyaca mcàb loo mèna. Ndxab mbiꞌ:
―Xaꞌ coꞌ mteyac daa, yub xaꞌ gunee loon: Fthùuz dáa. No byeꞌ dáa. Byàa par lizl.
12 Sya, mnibdiꞌs mèna loo mbiꞌ. Ndxab mèna:
―¿Chó mbiꞌ nac mbiꞌ coꞌ gunee lool: Fthùuz dáal no byeꞌ dáa no byàa, àꞌ?
13 Per mbiꞌ coꞌ mbyaca neꞌndaꞌde cuent no inonte mbiꞌ chó nac mbiꞌ coꞌ mteyac mbiꞌa tac anzeꞌf thìb mèn ngureriꞌ tya. Nde nxonꞌ, mbiileꞌ Jesús làth mèna, ne. 14 Ngoloa, mzyálꞌ Jesús mbiꞌ leꞌn templ. Ndxab Jesús loo mbiꞌ:
―Huiꞌ nexa. Lùu mbyacleꞌ nalleꞌ. Chó Diox chó neel. Ya neꞌtolode cuaꞌnl xquinl. Tac yiloa más nazab gàca lool.
15 Sya, mxen mbiꞌ ned. Ndyàa mbiꞌ. Ngua taꞌ mbiꞌ cuent loo mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel leꞌ Jesús nac xaꞌ coꞌ mteyac mbiꞌ. 16 Ante por mbli Jesús conꞌa huiz sabd coꞌ ngòc huiz descans tiempa, mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel mtlo mdub nguꞌs Jesús. Anzeꞌf mblyaꞌs mèna guth mèna Jesús. 17 Per com leꞌ Jesús nonqueꞌ xal nac xtùuz mèna, ¿léꞌ?, coꞌseꞌ ngòc nayiꞌ mèna loo Jesús, sya, mcàb Jesús loo mèna. Ndxab Jesús:
―Axta nareꞌ ngue li xuden Diox thìb zinꞌ. Daa, ne, ngue li zinꞌ.
18 Leꞌ sya, por cona sate más mbli mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel fuerz par guthxùꞌ mèna Jesús. Tac iante de indlide Jesús cas huiz sabd xal nac costumbr coꞌ mque no mèn nación Israel huiz sabd coꞌ ngòc huiz descans tiempa, mblyaꞌs mèna guth mèna Jesús. Ndxeꞌlequeꞌ, por mbez Jesús leꞌ xudpeꞌ Jesús nac Diox no por lalqueꞌ ndxàc Jesús con Diox, cona, mblyaꞌs mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel guth mèna Jesús.
Jesús coꞌ nac xganꞌ Diox ngue luꞌ leꞌ Jesús ndxàp conꞌ laꞌs nii Jesús no laꞌs yaꞌ Jesús par ñibeꞌpeꞌ Jesús loo mèn loo izlyoꞌ ndxèꞌ.
19 Leꞌ sya, ndxab Jesús loo mèna:
―Lìcpeꞌ baꞌi, na nii loo guꞌ: Leꞌ daa, coꞌ nac xganꞌ Diox, neꞌgácte lin nec thìb conꞌ ante xal nee lezon. Ndxeꞌlequeꞌ, daa coꞌ nac xganꞌ Diox, ndlin conꞌ coꞌ ñèen ndli xuden Diox. Tac ryete conꞌ coꞌ ndli xuden Diox, daa coꞌ nac xganꞌpeꞌ Diox ndlii, ne. 20 Tac Diox coꞌ nac xuden nqueꞌ lezoꞌ xganꞌpeꞌ Diox coꞌ nac daa. No ndluꞌ Diox ryete conꞌ coꞌ ndli Diox loon, daa coꞌ nac xganꞌ Diox. Rsinꞌ Diox coꞌ nac más conꞌ roo conꞌ xèn leque conꞌ ndxèꞌ, Diox luꞌreꞌi loon, daa coꞌ nac xganꞌpeꞌ Diox. No por cón cheꞌn conꞌ coꞌ huiꞌ guꞌ coꞌ li xuden Diox yiloa, conꞌa li par ante huiꞌ guꞌ no ante ñaa guꞌ loon yiloa, ne. 21 Tac texal ngo xban Diox xuden mèn coꞌ nguthleꞌ, no ndaꞌ xuden Diox yalnaban loo mèn coꞌ nguthleꞌa, lomisqueꞌ, daa coꞌ nac xganꞌ Diox ta yalnaban coꞌ nac yalnaban thidtene loo mèn coꞌ ndlyazen que no mèna yalnaban thidtene. 22 Xuden Diox indub rezte cón cheꞌn nec thìb mèn. Ndxeꞌlequeꞌ, mdaꞌ xuden Diox ryete conꞌ roo no ryete conꞌ xèn coꞌ nzo laꞌs nii xuden Diox no coꞌ nzo laꞌs yaꞌ xuden Diox loon, daa coꞌ nac xganꞌ xuden Diox par tub rezen cón cheꞌn ryete mèn loo izlyoꞌ, 23 par tataa mod gàca leꞌ ryete mèn li conꞌ guryath no conꞌ guryèn loon, daa coꞌ nac xganꞌ Diox, xalqueꞌ ndli mèn conꞌ guryath no conꞌ guryèn loo xuden Diox. Tac mèn coꞌ indlide conꞌ guryath no conꞌ guryèn loon, mèna indlide conꞌ guryath no conꞌ guryèn loo Diox xuden coꞌ mtelꞌ daa loo izlyoꞌ ndxèꞌ.
24 Lìcpeꞌ baꞌi, na ngue nii loo guꞌ: Leꞌ mèn coꞌ ndyub nza no mèn coꞌ ndxàaꞌd diꞌs coꞌ ngue bezen loo mèn no mèn coꞌ ndxelaꞌs loo xuden Diox coꞌ mtelꞌ daa, mèna yòo ban noqueꞌ Diox thidtene yiloa. Loo mèna neꞌzib quìide Diox xtol mèn no xquin mèn loo mèna. Ndxeꞌlequeꞌ, ngòc mèna mèn coꞌ neꞌcoꞌ xàꞌde Diox loo Diox ngolo nguth mèna. No thìb lìte yòo ban noqueꞌ mèna Diox thidtene yiloa. 25 Lìcpeꞌ baꞌi, na ngue nii loo guꞌ: Nde zinꞌ gaxleꞌ huiz no nde zinꞌ gaxleꞌ tiemp no nalleꞌqueꞌ ndxàca coꞌseꞌ mèn coꞌ beꞌ naban coꞌ nac xal mèn nguth loo cón cheꞌn Tad Diox, gòn mèna ron, daa coꞌ nac xganꞌ Diox. No mèn coꞌ ndxòn diꞌs no coꞌ ndxàaꞌd diꞌs coꞌ mbezen, yòo ban noqueꞌ mèna Diox thidtene. 26 Tac yub xuden Diox ndxàp conꞌ laꞌs nii xuden Diox no laꞌs yaꞌ xuden Diox par li xuden Diox par yòo ban no mèn xuden Diox thidtene. No lomisqueꞌ, niin: Mdaꞌleꞌ xuden Diox ryethe conꞌ roo no conꞌ xèn coꞌ nzo laꞌs nii xuden Diox no coꞌ nzo laꞌs yaꞌ xuden Diox loon par lin yòo ban no mèn xuden Diox thidtene. 27 No mdaꞌleꞌ xuden Diox ryethe conꞌ roo conꞌ xèn coꞌ nzo laꞌs nii xuden Diox no coꞌ nzo laꞌs yaꞌ xuden Diox loon par tub rezen cón cheꞌn mèn loo izlyoꞌ tac daa mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ ndxèꞌ. 28 Neꞌhuiꞌde guꞌ no neꞌñaade guꞌ loo conꞌ ndxèꞌ. Tac zin thìb huiz no zin thìb ze coꞌseꞌ ryete mèn nguth coꞌ mbuaꞌsleꞌ gòn diꞌs coꞌ tyoodizen coꞌseꞌ gàc huiza, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ ndxèꞌ. 29 Lomisqueꞌ niin, ne: Huiza, ryo xban mèn nguth leꞌn báꞌ mèn nguth. Mèn coꞌ mbli conꞌ ndac, mèna ryo xban par yòo ban no mèn Diox thidtene. Per ndxeꞌlequeꞌ, mèn coꞌ mbli conꞌ yeꞌrsinꞌ, mèna ryo xban par zib quìi Diox mèna par coꞌ xàꞌ Diox mèna loo Diox thidtene yiloa.
Jesús ngue luꞌ loo mèn thìb mod no tedib mod cón cheꞌn conꞌ roo conꞌ xèn coꞌ nzo laꞌs nii Jesús no coꞌ nzo laꞌs yaꞌ Jesús.
30 Toloqueꞌ ndxab Jesús loo mèn:
―Yende mod lin nec thìb conꞌ xal nee lezon no xal ndlyazen. Ndxeꞌlequeꞌ, daa ndub rez cón cheꞌn mèn xalqueꞌ ñibeꞌ xuden Diox loon. No nalì no nambìi nac mod coꞌ ndub rezen cón cheꞌn mèn. Indoode lezon lin coꞌ neete lezon. Ndxeꞌlequeꞌ, ndlin ante xal ndlyaꞌs xuden Diox no xal nee lezoꞌ xuden Diox coꞌ mtelꞌ daa par lina. 31 Tac cheleꞌ daa ngue ta cuent ante cón cheꞌnpeꞌen, leꞌ sya, nzoqueꞌ mod gab mèn leꞌ cuent coꞌ ngue tan cuent cón cheꞌnpeꞌen, inacte conꞌ lìcpeꞌ. 32 Per daa ngue nii loo guꞌ: Nzoqueꞌ thìb xaꞌ coꞌ ndaꞌ cuent cón cheꞌnpeꞌ daa. No daa nanee leꞌ cuent coꞌ ndaꞌ xaꞌ cón cheꞌnpeꞌena, leꞌi lìcpeꞌ nac. 33 Guꞌ mtelꞌ mèn coꞌ ngua loo Juàn Bautist par ñibdiꞌs mèn cón chenen loo Juàn. No cuent coꞌ mdaꞌ Juàn loo guꞌ cón chenen ngòc lìcqueꞌ. 34 Per part cón chenen, indxòode lezon no yende chó mport nzo lezon coꞌseꞌ ndxònen ndaꞌ mèn cuent cón chenen. Ndxeꞌlequeꞌ, niin diꞌs ndxèꞌ loo guꞌ par lyáꞌ guꞌ loo conꞌ ryes. 35 Juàn ngòc xal thìb manoj yeꞌrbèel coꞌ mbyol no coꞌ mtenìi loo mèn, coꞌ nee diꞌs, par mdaꞌ guꞌ cuent coꞌ nac cón cheꞌn Diox. Per part cón cheꞌn guꞌ, guꞌ mbli xal mèn coꞌ ngòo lezoꞌ no coꞌ mdyac lezoꞌ ndxep tiemp loo cón cheꞌn diꞌs coꞌ mdaꞌ Juàn cuent loo guꞌ, Juàn coꞌ mbli par mdyub xnìi yéc mèn no coꞌ mbli par mdyub xnìi lezoꞌ mèn loo cón cheꞌn Diox. 36 Per part cón chenen, nzoqueꞌ thìb xaꞌ coꞌ más nalì no más nambìi ndaꞌ cuent cón chenen leque diꞌs coꞌ mdyoodiꞌs Juàn cón chenen. Tac conꞌ coꞌ ndlin nac lomisqueꞌ conꞌ coꞌ gunee xuden Diox loon par lin. No conꞌ coꞌ ndlina, leꞌi ndluꞌ leꞌ xuden Diox, lìcqueꞌ, mtelꞌ daa. 37 Xuden Diox coꞌ mtelꞌ daa, leque yub xuden Diox ndluꞌ no ndaꞌ xuden Diox cuent cón chenen. Per part cón cheꞌn guꞌ, axta nalleꞌ tarte gòn guꞌ xal ndyoodiꞌs xuden. Neꞌ neꞌ tar ñee guꞌ xal ñaa xuden Diox no xal nacpeꞌ xuden Diox. 38 Neꞌ neꞌ tar yaaꞌd diꞌs coꞌ mbez xuden Diox loo guꞌ leꞌn lezoꞌ guꞌ no leꞌn xtùuz guꞌ thidtene. Tac tarte yilaꞌs guꞌ loon, daa coꞌ yub xuden Diox mtelꞌ loo izlyoꞌ ndxèꞌ. 39 Guꞌ nteche ntexyath yeꞌs coꞌ nac cheꞌn libr coꞌ nac xtiꞌs Diox. Noo noo ndlab guꞌ libr. Tac guꞌ ndenꞌ no ndyac guꞌ leꞌ loo libra ndluꞌ leꞌ guꞌ nzi quee lezoꞌ yòo ban no guꞌ Diox thidtene. Per mastaleꞌ ndlab guꞌ libr coꞌ nac xtiꞌs Diox, neꞌ neꞌ indaꞌ guꞌ cuent leꞌ cón chenen nac coꞌ ndaꞌ libr cuent no coꞌ ndluꞌ libr loo guꞌ. 40 No ale indlyaꞌste guꞌ taꞌ guꞌ lugar par thidte queltàa no guꞌ daa no yòo guꞌ loo cón chenen par yòo ban no guꞌ Diox thidtene yiloa.
41 Yende chó mport nzo lezon no neꞌ neꞌ indlin cas mèn coꞌ asendli ndxàc daa mèn guryath no mèn guryèn loo mèna. 42 Más de cona, huen huen ndan cuent cón cheꞌn guꞌ. No ndlibeꞌquen guꞌ leꞌ guꞌ inqueꞌde lezoꞌ Diox. 43 Daa ndal por cón cheꞌn xuden Diox. No indlide guꞌ cas daa. Per cheleꞌ tedib mèn yiꞌth por part cón cheꞌn leque mèna, mèna se liqueꞌ guꞌ cas, ¿léꞌ? 44 ¿Xá mod gác guꞌ yilaꞌs guꞌ loon no loo Diox cheleꞌ guꞌ más ndli cas loo conꞌ coꞌ nac conꞌ guryath no conꞌ guryèn cón cheꞌn xtàa guꞌ no indxòode lezoꞌ guꞌ li guꞌ conꞌ guryath no conꞌ guryèn loo xaꞌ coꞌ nde no coꞌ ngroꞌ loo thidte Diox, sya? ¡Pà gác guꞌ li guꞌi! 45 Neꞌtyóode guꞌ no neꞌyilaꞌste guꞌ par gab guꞌ leꞌn lezoꞌ guꞌ leꞌ daa queyèe guꞌ loo xuden Diox yéꞌ huizeꞌ. Xaꞌ coꞌ nqueyèe guꞌa nac yub Moisés, mastaleꞌ nzi quee lezoꞌ guꞌ gàc conꞌ ndac loo guꞌ por mdoo nque guꞌ loo ley coꞌ nac diꞌs coꞌ mxoꞌf Moisés loo guꞌ. 46 Tac cheleꞌ guꞌ, lìcqueꞌ, ngalaꞌs loo diꞌs coꞌ mbez Moisés, ngalaꞌs guꞌ loon, ne. Tac yeꞌs coꞌ mqueꞌ Moisés coꞌ mtanꞌ Moisés diꞌs loo guꞌ, diꞌsa ndaꞌ cuent cón chenen no ndluꞌ diꞌs cón chenen, ne. 47 Cheleꞌ guꞌ neꞌngalaꞌste loo diꞌs coꞌ mqueꞌ Moisés yeꞌs coꞌ mtanꞌ Moisés loo guꞌ, ¿xá mod yilaꞌs guꞌ loo diꞌs coꞌ ndyoodizen loo guꞌ, sya? Yende mod yilaꞌs guꞌ diꞌs, ¿léꞌ?