Jesús ngue luꞌ xá mod indxàalte láꞌ mèn saꞌl mèn.
19
Ngolo mdoodiꞌs Jesús ryete diꞌsa loo mèn, ngroꞌ Jesús leꞌn yèezyaꞌ cheꞌn làaz mèn galile. Mxen Jesús ned. Ndyàa Jesús par ned leꞌn yèezyaꞌ cheꞌn làaz mèn jude coꞌ nziriꞌ par ned ndlyen huiz coꞌ nac tedib lad ro yóꞌbeꞌ Jordán. 2 Anzeꞌf thìb mènléyꞌ mdoo nque xís Jesús. No mteyac Jesús huax mèn yíiz par ned ngua que tee Jesús.3 Sya, ngua plá mèn xleyꞌ farise loo Jesús par ñee mèna ñeeneꞌ chéꞌ tli mèna gan gàal diꞌs mèna Jesús par tataa mod quexùꞌ queꞌ fals mèna Jesús yiloa. Asembli mèna, mnibdiꞌs mèna loo Jesús. Ndxab mèna:
―¿Chéꞌ nzo mod láꞌ thìb mbiꞌ thìb xaꞌgot coꞌ nac saꞌlpeꞌ mbiꞌ por chol conꞌ bix coꞌ mbli xaꞌgota no maste, àꞌ?
4 Jesús mcàb loo mèna. Ndxab Jesús:
―¿Chéꞌ tarte lab guꞌ diꞌs coꞌ ndub loo libr coꞌ nac xtiꞌs Diox, càꞌ? No ¿chéꞌ tarte taꞌ guꞌ cuent cón nee diꞌs diꞌsa? Coꞌseꞌ mblec Diox no mtoxcuaꞌ Diox izlyoꞌ, Diox mbli thìb conꞌ. Mblec Diox mènbiꞌ no mèngot loo izlyoꞌ. 5 Lomisqueꞌ, ndub diꞌs loo libr coꞌ nac xtiꞌs Diox coꞌ mbez taandxèꞌ: Mèn coꞌ nac mènbiꞌ, láꞌ mèn xud mèn no láꞌ mèn xnaꞌ mèn par thidte queltàa mèna con xaꞌgot coꞌ gàc xinꞌ saꞌl mèna. Coꞌseꞌ tataa ndxàca loo ryop saꞌl mèna, ndxàca loo ryop saꞌl mèna leꞌ ryop saꞌl mèna ndxàc thidte bélꞌ no thidte zith loo Diox. 6 Por cona, ngue niin loo guꞌ: Coꞌseꞌ nqueltàa thìb mènbiꞌ con thìb mèngot par selyaꞌ mènbiꞌ con mèngot, ya inacte ryop mèna chop. Ndxeꞌlequeꞌ, ryop mèna ngòc thidte bélꞌ no thidte zith loo Diox. Por cona, yende chó derech ngue no chol mèn par li mèn láꞌ thìb xaꞌbiꞌ thìb xaꞌgot coꞌ nac xinꞌ saꞌl xaꞌbiꞌ.
7 Sya, asembli mèn xleyꞌ farise. Mnibdiꞌs mèn xleyꞌ farise loo Jesús. Ndxab mèna:
―¿Chonon mnibeꞌ Moisés taꞌ thìb mènbiꞌ, coꞌ nac saꞌl thìb xaꞌgot, yeꞌs coꞌ lèe act loo mèngot, sya ndli mènbiꞌ par tataa mod láꞌ mènbiꞌ xaꞌgot coꞌ nac saꞌl mènbiꞌ, sya?
8 Jesús ndxab loo mèna:
―Aa, tataa mbli Moisés loo guꞌ tac Moisés non no nanee Moisés leꞌ guꞌ anzeꞌf naad no nguud guꞌ. Cona, mdaꞌ Moisés lugar taꞌ guꞌ yeꞌs coꞌ lèe act loo xaꞌgot par láꞌ guꞌ xaꞌgot coꞌ nac xinꞌ saꞌl guꞌ. Per neꞌndaꞌde Diox lugar ngàca tataa làth mèn ndooreꞌ gàc tiemp coꞌseꞌ yo ban Moisés. 9 Na ngue nii loo guꞌ, ne: Leꞌ thìb xaꞌbiꞌ coꞌ láꞌ saꞌlpeꞌ no ingue lide saꞌlpeꞌ xaꞌbiꞌa yalburrid, no selyaꞌ xaꞌbiꞌa con tedib xaꞌgot, leꞌ sya, xaꞌbiꞌa ngue li yalburrid con tedib xaꞌgota. Lomisqueꞌ ne, cheleꞌ thìb xaꞌbiꞌ selyaꞌ con thìb xaꞌgot coꞌ mbláꞌ saꞌl, xaꞌbiꞌa ngue li yalburrid con xaꞌgota, ne.
10 Sya, myenꞌ xinꞌ mtéꞌth Jesús ndxab loo Jesús:
―Cheleꞌi tataa ndxàc loo mènbiꞌ con xaꞌgot coꞌ nac saꞌl mènbiꞌ, indxàalte selyaꞌ mèn sya xàa, ndyac nuꞌ.
11 Jesús ndxab loo myenꞌ xinꞌ mtéꞌth Jesús:
―Iryede mèn ndenꞌ cón cheꞌn diꞌs ndxèꞌ par tyubdiꞌs mèn loo diꞌs ndxèꞌ. Inacte diꞌs ndxèꞌ par tenꞌ rye mèn cón cheꞌn diꞌs ndxèꞌ. Ndxeꞌlequeꞌ, mèn coꞌ ndenꞌ no ndaꞌ mèn cuent nac mèna mèn coꞌ Diox ndli par tenꞌ mèn diꞌs no taꞌ mèn cuent cón cheꞌn diꞌs ndxèꞌ par tyubdiꞌs mèna loo diꞌs ndxèꞌ. 12 Nzo huax mènbiꞌ coꞌ inselyaꞌde con mèngot. Nzo ndxep mènbiꞌ coꞌ ancual ngóol coꞌ inselyaꞌde con mèngot. No nzo taamás mènbiꞌ coꞌ inselyaꞌde con mèngot tac ngo mèn coꞌ mbli capón mèna. No nzo taamas mènbiꞌ taate mbyanꞌ. Inselyaꞌde mèna tac mèna mnibeꞌ loo lezoꞌ mèna ante li mèna sirv loo Diox no maste. Cona, ngue niin conꞌ ndxèꞌ loo guꞌ, guꞌ coꞌ ndenꞌ no coꞌ ndxòn diꞌs coꞌ ngue niin loo guꞌ ndxèꞌ par tyubdiꞌs guꞌ loon: Bìn guꞌ diꞌs no ftaꞌ guꞌ cuent cón nee diꞌs ndxèꞌ. No ftaꞌ guꞌ lugar yaaꞌd diꞌs ndxèꞌ leꞌn lezoꞌ guꞌ.
Jesús mdeꞌs mcàa myenꞌ bix par ndyac lezoꞌ myenꞌ con Jesús.
13 Làth xtauꞌa, mbiꞌth no mèn coꞌ nac xnaꞌ myenꞌ bix myenꞌ bix loo Jesús par xoꞌf Jesús yaꞌ Jesús lad myenꞌ no par cuez Jesús Diox cón cheꞌn myenꞌ. Per ndxeꞌlequeꞌ, myenꞌ xinꞌ mtéꞌth Jesús mtlo ngocloo. No mbyoo myenꞌ xinꞌ mtéꞌth Jesús xnaꞌ myenꞌ bix o mèn coꞌ nde no myenꞌ bixa. 14 Sya, ndxab Jesús loo myenꞌ xinꞌ mtéꞌth Jesús:
―Laꞌ guꞌ tetee myenꞌ bix baꞌ loon cheleꞌ myenꞌ bix baꞌ nde loon. Neꞌtauꞌte guꞌ loo mèn coꞌ nde no myenꞌ bix baꞌ. Tac mèn coꞌ ndyal no ndaꞌ mèna lugar ñibeꞌpeꞌ Diox loo mèna, ndxàca loo mèna ndxàc mèna xal myenꞌ bix baꞌ.
15 Ngolo mxoꞌf Jesús yaꞌ Jesús lad myenꞌ bixa, no ngolo ngurez Jesús Diox por cón cheꞌn myenꞌ bixa, mbii Jesús tya.
Thìb mbyòo coꞌ ngòc mbyòo ric mdoodiꞌs no Jesús.
16 Látha, mzin thìb mbyòo loo Jesús. Ndxab mbyòo loo Jesús:
―Maistr Ndac, ¿chó conꞌ ndac tolo lin par thìb lìte yòo ban non Diox thidtene, àꞌ?
17 Jesús mcàb loo mbyòo. Ndxab Jesús loo mbyòo:
―¿Chonon mbez lùu loon leꞌ daa nac thìb maistr ndac, àꞌ? Yende chó mèn coꞌ, lìcqueꞌ, nac mèn ndac. Angoluxte Diox nac xaꞌ ndac. Cheleꞌ lùu indlide cuent no indenꞌte lezoꞌl nac daa Diox, axta neꞌ neꞌ ñeel loon nac daa maistr ndac. Per cheleꞌ lùu, lìcqueꞌ, lyaꞌs yòo ban nol Diox thidtene, ftubdiꞌs xal nac diꞌs coꞌ ñibeꞌ ley coꞌ mxoꞌf Moisés loo mèn.
18 Mbyòo mcàb. Ndxab mbyòo loo Jesús:
―¿Chópeꞌ yalñibeꞌ nac coꞌ más ñibeꞌ ley coꞌ mxoꞌf Moisés loo mèn par lina, àꞌ, Tad?
Jesús ndxab loo mbyòo:
―Yalñibeꞌa nac diꞌs ndxèꞌ: Neꞌguthtel mèn; neꞌque tee lidel yalburrid; neꞌli huanꞌtel; neꞌtoxcuaꞌdel yalgutyèꞌ cón cheꞌn nec thìb mèn. 19 Gòp mod gunèe xudl no xnaꞌl. Fqueꞌ lezoꞌ gunèe huesl no xtàal xalqueꞌ ngue lezoꞌl ñèel leque lùu.
20 Mbyòo ndxab loo Jesús:
―Aa, Tad, ryete conꞌ coꞌ ñibeꞌ diꞌsa loo mèn par li mèn ndliquen desde ndoo roon no desde ndoo xènen. ¿Chéꞌ nzo chóreꞌ conꞌ ndxàc falt ndyac Uꞌ tolo lin, àꞌ, Tad?
21 Jesús ndxab loo mbyòo:
―Cheleꞌ lùu, lìcqueꞌ, lyaꞌs gàc mèn nambìi no mèn nalì loo Diox, huàa thoꞌ ryethe conꞌ ndxàpl par ryoꞌ tmi looi. Yiloa quiꞌthl tmia loo mèn coꞌ ndyac yaltìi. Leꞌ sya, tataa mod tolo gàpl yalgonꞌ no yalndac loo béꞌ. Yiloa ndyeꞌthl. Tyoo nquel xísen. Nda naꞌ.
22 Per coꞌseꞌ mbìn mbyòo diꞌs coꞌ ndxab Jesús, nalyat mdeb ro mbyòo, ndyàa mbyòo, por tant ndxàp mbyòo cheꞌn mbyòo no nèe laꞌs mbyòo.
23 Sya, ndxab Jesús loo myenꞌ xinꞌ mtéꞌth Jesús:
―¡Lìcqueꞌ nac coꞌ ngue niin loo guꞌ ndxèꞌ, cara! Axta arid nagàn naca par tyal mèn ric no taꞌ mèn ric lugar loo Diox par ñibeꞌpeꞌ Diox loo mèn ric. 24 Beren, niin conꞌ ndxèꞌ loo guꞌ tedib vez: Más inagànte naca riid thìb máꞌ coꞌ lèe camell leꞌn yeꞌr coꞌ nac ngudloo thìb aguj leque tyal mèn ric no taꞌ mèn ric lugar loo Diox ñibeꞌpeꞌ Diox loo mèn ric.
25 Coꞌseꞌ mbìn myenꞌ xinꞌ mtéꞌth Jesús diꞌs coꞌ ndxab Jesús loo myenꞌ, ante mbuiꞌ myenꞌ no ante gunaa myenꞌ loo xtàa myenꞌ. Mnibdiꞌs myenꞌ loo xtàa myenꞌ. Ndxab myenꞌ:
―Cheleꞌi tataa nac, ¿chó mèn gác lyáꞌ loo conꞌ ryes, sya?
26 Jesús xèe mbuiꞌ loo myenꞌ. No ndxab Jesús loo myenꞌ:
―Yende mod li chol mèn gan li mèn conꞌ par lyáꞌ mèn loo conꞌ ryes. Per Diox ndxácqueꞌ li Diox chol conꞌ xal ndlyaꞌs Diox li Diox loo mèn. Yende chó mèn gác cuee càꞌ Diox loo chol conꞌ.
27 Sya, ndxab Pedr loo Jesús:
―Tad, nuꞌ mbláꞌyaꞌ ryete conꞌ mque no nuꞌ no conꞌ ngòp nuꞌ. No ngue tee nquequeꞌ nuꞌ xís Uꞌ ned ngue tee Uꞌ. ¿Cón gàp nuꞌ no cón que no nuꞌ yiloa, sya?
28 Jesús mcàb loo myenꞌ. Ndxab Jesús:
―Lìcpeꞌ baꞌi, na ngue nii loo guꞌ: Coꞌseꞌ gàc tiemp no coꞌseꞌ gàc cub ryethe conꞌ, no lomisqueꞌ, coꞌseꞌ tub ñibeꞌen, daa coꞌ mbal yáal loo izlyoꞌ xalqueꞌ ndxáal chol mèn, loo thìb asient coꞌteꞌ gàc thìb lugar coꞌteꞌ ñibeꞌpeꞌen por cón cheꞌn ryethe conꞌ roo conꞌ xèn coꞌ gàpen laꞌs niin no laꞌs yan huiza, leꞌ sya, guꞌ coꞌ ndoo nque xísen nalleꞌ, guꞌ coꞌ neꞌngláꞌde daa, ryete siꞌ fchop guꞌ tyub loo siꞌ fchop asient par tub rez guꞌ cón cheꞌn mèn nación Israel huiza, mèn coꞌ nac siꞌ fchop ned coꞌ mblec biz no bin. 29 No ryete mèn coꞌ mbláꞌyaꞌ liz no coꞌ mbláꞌyaꞌ hues, no ftaꞌn, no bél, no xud, no xnaꞌ, no saꞌl, no xinꞌ, no xyòn ante por cón chenen no maste, mèna gàc cheꞌn no càayaꞌ mèna masreꞌ thìb ayo tant conꞌ loo coꞌ nac cheꞌn mèn coꞌ mbláꞌyaꞌ mèn. No más de cona, mèna yòo ban no Diox thidtene. 30 Per nalleꞌ loo izlyoꞌ ndxèꞌ nzo huax guꞌ coꞌ nac mèn nación Israel. Guꞌ nzi li xtùuz anzeꞌf ntac guꞌ loo Diox no anzeꞌf mèn roo no mèn xèn nac guꞌ loo Diox por nac guꞌ mèn nación Israel. Per ndxeꞌlequeꞌ, Diox li leꞌ guꞌ gàc mèn beꞌthe loo Diox tac Diox ndxecloo ñèe guꞌ. Per part cón cheꞌn Diox, mèn coꞌ ingode guꞌ cuent anzeꞌf ntac mèn loo Diox, mèn coꞌ inacte mèn nación Israel, Diox li gàc huax mèna mèn coꞌ más ntac loo Diox leque guꞌ. No gàc mèna mèn coꞌ más ndyac lezoꞌ Diox ñèe Diox por mbli mèna cas loo cón cheꞌn Diox.