Usaruwaita ingreja
5
Ixe usarusara kuaye peyawe, ixe hamaa yuiri Kristu upurara, ixe yuiri hariku aramawaa kua purangawaa uriwaa kuri, ape hambeu ainta supe kuaita usaruwaita ingreja pepiterupi: 2 —Pesaru kuaita Deus yaraita pepiterupi, tepesaru ainta yatimasawa upe, maa pesaru ainta suurisawa rupi, kuaye Deus uputariwaa yawe, tepesikari peyuka aintairumu sikuyara pesaru resewara ainta, pesaru ainta pepia suuriwaa irumu; 3 Tepemundu kuaita pesaruwaita, maa pemunya puranga aintaumaa arama aintarangawa penye kuaita pesaruwaita. 4 Asui uri rame kuri kua usarusara kirimbawawaa uxari kuri penye arama kua kurua purangawaa tiwa uxirika.Yamaa arama yanesui puranga
5 Yawete yuiri penye kurumiwasuita, perikute peyuxari penyepawate ainta supe kuaita tuyuwewaita, perikute peyuxari penyepawate penye arama, asui perikute peyumukuaira penyepawate, nyãse Deus upuamu aintaruaxara kuaita umanduariwaita puranga aintarese, maa uxari ainta supe ipurangasawa kuaita tiwaita umanduari purangawaita ainta. 6 Peyumukuaira penyepawate Deus ipu kirimbawawaa wira kiti, usupiri arama kuri penye sangawa upe. 7 Pexari Deus rese panye kua umutawawaa penye, nyãse umanduari penye. 8 Pekuawa ara, pemaa pesui puranga, nyãse kua peruanyana Yurupari uyatimana peruaki kuaye leão usasemuwaa yawe, usikari yepe umbau arama ae. 9 Peiku santa suaxara peruyari resewara kirimbawa, nyãse pekuawate panye kuaita perumuaraita kua mundu upe aintaupurara yepewasute kuaye peyawe. 10 Ape pepurara rire kuri kutarantu, asui kua Deus purangawaa usenuiwaa penye Kristu purangasawa tiwa upawa kiti umukaturu kuri penye, asui umusanta kuri penye, umukirimbawa kuri penye, umusupita kuri penye yuiri. 11 Tuixawa ae yawewarawate. Amem. 12 Irumu kua Silvanu yanemu purangawaa hamanduari hampinima penye arama kuaira, asui hambeu penye arama Deus purangasawa supiwa ae, ape peiku santa sese. 13 Umundu penye arama kuekatu kua kunya uikuwaa Babilunia upe, kua Deus uparawakawaa yuiri ae, yawete yuiri kua seraira Marku. 14 Peyusuanti puranga, peyubejari gustarisawa irumu. Haputari timaarese peiku panye penye peikuwaa Kristu upe.