Maitaa yamunya purangawaa
13
Yawewarawate perikute pegustari kuaita peimuita. 2 Perikute pesuanti puranga kuaita uriwaita pepiri, nyãse aintaumunya resewara yawe kuaita yepeyepe aintausuanti kuera kuaita anjuita tirame aintaukuawa anjuita ainta. 3 Pemanduari kuaita prezuwaita kuaye prezuwaa yawe maa penye aintairumu; pemanduari yuiri kuaita aintaumunyawaita ainta supe puxi kuaye aintaumunyawaa yawe maa penye arama puxi. 4 Perikute perespetari puranga kua kazamentu, timaa ikiawaa kua aintaumunyawaa kuaita umendariwaita, nyãse Deus kuri umbeu aintaresewara kuaita umunya tenyuntu aintapira irumu, aintaresewara yuiri kuaita uxariwaita aintarimiriku. 5 Tepemuasi penye, asui peiku suuri irumu kua perikuwaa, nyãse umbeu kuera: "Tikuri haxari penye, tiyuiri kuri hamburi penye." 6 Ape tiyasikie yambeu:—Seruixawa kua uajudariwaa ixe, tikuri hasikie. Maitaa kuri apigawa upuderi umunya ixe arama?
Interute kua Jesus
7 Perikute pemanduari kuaita serakuenawaita kuaita umbuewaita penye Deus nyenga rese; pemanduari mayetaa aintausu kua mundu sui, asui perikute peruyari puranga kuaye aintayawe. 8 Kua Jesus Kristu interute ae, kuaye uikuwaa yawe kuese, kuiri yuiri, yawete yuiri kuri uiku yawewarawate. 9 Tepexari aintautiari penye kuaita umbuewaita amu kiti inyenga irumu, maa puranga yamukirimbawa yanepia Deus purangasawa irumu, timaa timbiu irumu, nyãse tiwajudari kuaita umanduariwaita ae. 10 Nyãse yande uruyariwaita yarikute yepe yasapi rendawa, tiaintaupuderi aintaumbau isuiwara kuaita upurakiwaitare Deus ruka upe inyenga kuximawara upe. 11 Aintausapi aintapira ukara kiti kuaita nimbawaita aintauxariwaita Deus supe, asui kua saserdutita ruixawa urasu aintaruwi Deus ruka kiti sala puranga purangawaa kiti, uxari arama Deus supe ae aintapuxuwerasawa resewara. 12 Yawete yuiri kua Jesus upurara ukara kiti umukaturu arama kuaita miraita suwi irumu. 13 Ape yasu ipiri ukara kiti yaxari arama puxi aintaumaa yande sesewara. 14 Nyãse timaa yasikari yaneretama tiwa upawa ike, maa yaputari kua yariku aramawaa kuri. 15 Ape ipupe kua Jesus yarikute yamee purangawaa Deus supe yawewarawate, nyãse yawe aintaumunya aintayuru irumu kuaita umeewaita purangawaa sera rese. 16 Perikute pemanduari pemunya arama puranga yuiri, perikute peyuajudari yuiri, nyãse suuri Deus umaa kuaita umunyawaita yawe. 17 Peruyari aintanyenga kuaita usaruwaita penye, pesendu ainta supe, nyãse aintausaru penye; asuiwana aintaumbeu aintaresewara mayetaa aintausaru penye. Ape pexari suuri aintausaru penye yawaite yatima aintausaru penye, nyãse pexari rame sasiyara aintausaru penye tikuri periku purangawaa, kirimbawa yanepia Deus purangasawa irumu, timaa timbiu irumu, nyãse tiwajudari kuaita umanduariwaita ae.
Yaiku arama santa
18 Pepurandu yanerese, nyãse yakuawate yariku yamanduarisawa ikiaimawaa, yaputari yaiku puranga panye maa rese. 19 Yawe haputari pemunya kirimbawa hapuderi arama kuri hayuiri pepiri kutara xinga. 20 Kuiri haputari kua Deus uxariwaa timaarese yande, kua usupiriwaa yaneruixawa Jesus manusawa pitera sui, kua usaruwaa purangawaa kuaita iuvelyaita, kua uxariwaa suwi sesewara kua Deus umbeuwaa tiwa upawa, 21 Haputari umukaturu penye panye purangawaa irumu pemunya arama kuaye uputariwaa yawe, pemunya arama kua suuriwaa Jesus Kristu, yamee ixupe yawewarawate, amem. 22 Asui penye semuita, haputari peaguentari irumu kua nyenga hampinimawaa penye arama, nyãse kuaira hampinima penye arama. 23 Hambeu pesendu aintauyurawana kua yanemu Timuteu, asui usu rame kutara pepiri irumute kuri hasu hamaa pepiri. 24 Hamundu kuekatu ainta supe panye usaruwaita penye, panye uruyariwaita Kuaita Italia upewaraita aintaumundu arama kuekatu. 25 Kuiri Deus purangasawa uiku peirumu panye.