8 Uruyari resewara kua Abraão uruyari Deus umbeuwaa ixupe usu arama amu tetama kiti uxariwaa kuri ixupe arama, asui usu tiramere ukuawa maa kiti usu. 9 Asui uruyari resewara uiku kua tetama uxariwaa ixupe kuaye amuita retama yawe, uiku suka upe enseradu suiwara irumu kua Izaki, Jaku yuiri, kuaita urikuwaita irumu kua umbeuwaa; 10 Usaru umaa kua tetama uikuwaa santa, Deus kua umusangawa ae, umunyawaa yuiri ae. 11 Uruyari resewara kua Sara uxari ixupe arama ikirimbawasawa uriku arama imembira waimi rameana ae, nyãse ukuawate umunya kuaye umbeuwaa yawe kua umbeuwaa ixupe ae. 12 Ape yepe apigawa pituana ituyuwesawa isui aintausemu siya kuaita ximiariruita, aintasiyasawa kuaye kuaita estrelaita uikuwaa iwaka rese, aintasiyasawa kuaye praya yawe uikuwaa parana turusuwaa rimbiwa upe tiwaita yapuderi yakuawa aintasiyasawa. 13 Panye umanuwaita ainta uruyarisawa rese senundere aintauriku kua umbeuwaa ainta supe, maa aintaumaa ae apekatu suintu, asui aintaumukuema ae, aintaukuawa yuiri apekatu suiwara ainta ipupe kua mundu. 14 Nyãse kuaita miraita umbeuwaita aintayawe, aintauxari yakuawa aintausikari yepe aintaretama arama. 15 Nyãse aintaumanduari rame maa kua aintaretama aintauriwaa asui, aintaupuderi maa aintauyuiri akiti mukuĩsawa. 16 Asui yuiri aintausikari aintaretama arama puranga piriwaa kua iwaka kitiwara, ape timaa Deus utiĩ aintaukuawa arama aintaDeus ae, nyãse umukaturuana aintarunde yepe aintarendawa arama. 17 Asui uruyari resewara kua Abraão Deus uputari irumu usaã umaa ae uxari ixupe arama Izaki, asui kua urikuwaa kua Deus umbeuwaa suuriana ae, uyuká arama taira yepenyu 18 Kua umbeuwaa ixupe: "Izaki aintasuiwara kuri kuaita nerimiariruita." 19 Nyãse umanduari kirimbawa kua Deus upuderi usupiri ae manusawa sui, asui umuyuiri ixupe arama ae yawesawa manusawa sui. 20 Asui uruyari resewara kua Izaki upurandu Deus uabensuari Jaku, Ezau yuiri sese kua tiware aintaumaa. 21 Asui uruyari resewara kua Jaku umanu irumu ae upurandu Deus uabensuari arama ainta kuaita Juze rairaita, asui umunya benditu Deus supe ibatuna rakapira rese. 22 Asui uruyari resewara kua Juze kuayentu isui manusawa umbeu ainta supe kuaita israelitaita maitaa kuri aintausemu Egitu sui, umbeu yuiri maitaa kuri uputari aintaumunya ikãwera supe.

23 Asui aintauruyari resewara kua Muize paya, imaya yuiri, asui unaseri rire ae aintauyumimi ae musapiri yasi, nyãse aintaumaa kua taina puranga ae, nyãse timaa yuiri aintausikie isui kua tuixawa umbeuwaa. 24 Asui uruyari resewara kua Muize kurumiwasuana ae, usaisu aintauseruka ae imembira ae kua Farao rayera; 25 Uputari puxi aintaumaa ixupe aintairumu kuaita Deus miraita isui kua pekadu umusuuriwaa ae kutara. 26 Nyãse puranga piriwaa umaa kua upurarawaa Kristu resewara isui kua Egituwaraita aintamaa, nyãse usaru umaa kua purangawaa. 27 Asui uruyari resewara uxari kua Egitu, tiusikie ipiaiwasawa sui kua aintaruixawa, nyãse uiku santa kuaye umaawaa yawe kua tiware yamaa. 28 Uruyari resewara umunya kua paskua, asui uyusena kua tuwi tiarama kua uyukásara uyuká kuaita israelitaita rairaita tuyuwewaita. 29 Asui aintauruyari resewara kuaita miraita, aintausasawa kua parana turusuwaa serawaa pirangawaa, kuaye iwi santawaa yawewaa rese yawe.

30 Asui aintauruyari resewara kuaita miraita uwariana Jeriku kuraraita ita suiwara aintauyatimana rire ikupe rupi seti ara. 31 Asui uruyari resewara kua Raabi kua warixiwaa timaa ukanyemu aintairumu kuaita tiwaita aintauruyari, nyãse suuri usuanti kuaita israelitaita umunduwaita umaa aintarunde. 32 Asui maa xingate hambeu? Nyãse kua ara tiusika hambeu aintarese panye kuaita Gideão, Baraki yuiri, Sansão yuiri, Jefite yuiri, Davi yuiri, Samuel yuiri, aintayuiri kuaita utitikawaita. 33 Asui aintauruyari resewara aintaupisika amuita tuixawaita retama, aintaumunya yuiri puranga, aintauriku yuiri kua Deus umbeuwaa ainta supe, aintausikindawa yuiri leão yuru. 34 Aintaumuweu yuiri tata sendiwaa, aintaueskapari yuiri espada sui, kirimbawa ainta aintapituasawa sui, asui kirimbawa yuiri aintaumunya kera, aintauxari aintauyawawa kuaita suraraita apekatu suiwaraita. 35 Umbaka umanuwaita ainta supe kuaita kunyaita. Asui aintaumpurarakari kuaita yepeyepeita nyãse timaa aintauyuxari ainta supe, nyãse aintauputari aintauriku kua mundu puranga piriwaa. 36 Asui kuaita amuita aintaukasuari ainta, asui aintaunupa ainta xikuti irumu, asui amuita aintaupukuari kurenti irumu, aintaumprezu ainta. 37 Aintauyuká ainta ita irumu, aintausaã ainta, asui aintaumunuka kuaita amuita seruti irumu aintapiterupi, aintauyuká yuiri ainta espada irumu, aintauwata pirasua yawe kua mundu upe, anyunte aintarupa uvelya pirera, kabra pirera yuiri, watari ainta supe panye maantu, aintaupurara, puxi aintaumunya ainta supe. 38 Aintauwata kampu rupi, iwitera rese yuiri, iwi kuara upe yuiri; timaa puranga kua mundu supe aramawaita ainta kuaita yawewaita. 39 Asui panye ainta puranga Deus umaa ainta aintauruyari resewara puranga, maa timaa aintauriku kua umbeuwaa. 40 Nyãse Deus umukaturu yanerunde yepe puranga piriwaa yawaite umukaturu yanesui ainta.