Nyãse panye kuaita saserdutita ruixawa aintauparawakawaita ainta apigawa suiwara, aintaupurandu arama aintarese kuaita apigawaita Deus irumu, aintauxari arama ixupe prezenti, asui aintauyuká nimbawa aintauxariwaita aintapuxuwerasawa resewara; 2 Upuderi uajudari ainta puranga kuaita tiwaita ukuawa, uyusupariwaita yuiri, nyãse ae yuiri pituawaa ae. 3 Asui sesewara urikute uxari Deus supe nimbawa uyukáwaa aintapuxuwerasawa resewara kuaita miraita, ipuxuwerasawa resewara yuiri. 4 Asui tiawa uputari ixupe arama kua muraki yawaitewaa, tirame Deus uparawaka ae, kuaye uparawakawaa yawe kua Arão. 5 Yawete yuiri kua Kristu, timaa umbeu purangawaa sesepawa saserdutita ruixawa arama ae, maa uparawaka ae kua umbeuwaa ixupe: "Seraira inde, kua ara upe nepaya ixe." 6 Kuaye umbeuwaa yawe yuiri: "Indete yepe saserduti yawewarawate, kuaye iyawe kua Melkizedeki." 7 Asui kua Jesus uiku ramere kua mundu upe, kirimbawa upurandu irumu kua upuderiwaa umukaturu ae manusawa sui, kirimbawa usenui ixupe uyaxiuwaa rupi, asui usendu ixupe umanduari resewara puranga. 8 Asui Taira rame ae, ukuawa uruyari inyenga sesewara kua upurarawaa. 9 Asui puranga resewara ae, uyupiru ainta supe kua salvasão tiwa upawa, kuaita uruyariwaita ae. 10 Ape Deus uparawaka ae, saserdutita ruixawa arama ae, kuaye Melkizedeki yawe.