Yarikute yamunya puranga
5
Ape pemunya kuaye Deus umunyawaa yawe, kuaye tairaita ugustariwaita yawe. 2 Pewata gustarisawa upe kuaye Kristu ugustariwaa yawe yande, asui uyuxari aepawa yaneresewara kuaye uxariwaa yawe sakuenawaa yawe Deus supe arama. 3 Maa panye warixisawa, panye ikiawaa, panye umuasisawa yuiri tepembeu ae pepiterupi, kuaye uruyariwaita urikute umunya. 4 Tepembeu nyenga ikiawaa, tiyuiri nyenga retentuwaa, tiyuiri nyenga pukasawa rupiwaa, timaa puranga yamunya yawe, maa puranga piri yamee purangawaa Deus supe. 5 Ikiawaa yuiri, tiyuiri umuasiwaa uputariwaa idulu, tikuri aintauriku aintauiku aramawaa yaneruixawa Kristu Deus yuiri umunduwaa upe. 6 Tepexari yepe uganani penye nyenga retentuwaa irumu, nyãse yawewaa resewara Deus ipiaiwasawa uwari aintarese kuaita tiwaita uruyari. 7 Ape tepeajudari ainta. 8 Kuxima pitunawasu puraita penye, maa kuiri murutingawaa upewaraita penye yaneruixawa irumu, ape pewata kuaye turi rairaita yawe. 9 Nyãse yawasemuana turi iya panye purangawaa rese, panye satambikasawa rese, panye supiwa rese yuiri. 10 Perikute pesikari maa irumutaa pemusuuri arama kua yaneruixawa. 11 Tepeajudari ainta aintaumunya arama pitunawasu uxariwaa aintaumunya puxuwerawa, maa pembeu ainta supe aintapekadu. 12 Nyãse yayumutiĩ yambeu arama kua aintaumunyawaa aintauyumimisawa. 13 Maa yaxari rame turi umuturi aintarese yamaa ainta, nyãse murutingana panye kua yamaawaa. 14 Yawe aintaunyee: —Repuamu inde rekiriwaa, repuamu umanuwaita pitera sui ape kuri Kristu umuturi nerese. 15 Ape pemaa pesui puranga mayetaa pewata, tepewata tiwaita ukuawa yawe, maa pewata ukuawaita yawe. 16 Puxuwerana kua mundu ape perikute pemunya puranga yawewarawate. 17 Tepesikari tiwaita ukuawa penye maa pesikari pekuawa maitaa yaneruixawa uputariwaa yawe. 18 Tepekau kawĩ irumu nyãse uxari peyumburi, maa peyumuteresemu Espiritu irumu. 19 Pepurungita penye pepiterupi salmu irumu kansão Espiritu rese irumu yuiri, penyengari puranga yaneruixawa supe panye pepia irumu. 20 Yawewarawate pemee purangawaa panye rese sera rupi kua yaneruixawa Jesus Kristu yanepaya Deus supe. 21 Peyuxari penye arama pesikie resewara Kristu sui.
Kunyaita, apigawaita yuiri
22 Penye kunyaita peruyari pemena nyenga kuaye peruyariwaa yawe yaneruixawa. 23 Nyãse kunya akanga aete imena, kuaye ingreja akanga aete Kristu, asui ae yuiri umukaturu ipira. 24 Asui kuaye ingreja uruyariwaa yawe Kristu nyenga yawete yuiri kuaita kunyaita aintaurikute aintauruyari aintamena nyenga panye. 25 Penye perikuita perimiriku perikute pegustari perimiriku kuaye Kristu ugustariwaa yawe ingreja, asui aepawate uyuxari ingreja resewara. 26 Uxari arama ikiaimawaa ae umuyasuka rire ae inyenga irumu kuaye umuyasukawaa yawe ii irumu. 27 Uputari ixupe arama kua ingreja purangawaa, ikiaimawaa, tiwa uxirika ae, tiyamaa puxuwerawa sese, nyãse purangawaa ae. 28 Yawete yuiri kuaita urikuita ximiriku aintaurikute aintaugustari aintarimiriku kuaye aintaugustariwaa yawe aintapira. Kua ugustari ximiriku uyugustari yuiri aepawa. 29 Nyãse tire awa puxi umaa ipira, maa uyupui ae umukaturu ae kuaye Kristu umukaturuwaa yawe ingreja ixupe. 30 Nyãse ipira rakangaita yande. 31 Sesewara apigawa uxari ipaya, imaya yuiri uiku arama irumu kua ximiriku, yepenyu arama kuri kuaita mukuĩwaita. 32 Turusu kua nyenga uyumimisawa, maa hambeu sese Kristu ae iingreja yuiri. 33 Ape kuri peyaweyawe perikute pegustari perimiriku kuaye peyugustariwaa yawe penyepawa, asui kuaita urikuwaita aintamena aintaurikute aintaurespetari aintamena.