Uputari umbeu ixupe
11
Haputari pesendu ixupe arama, hambeu arama seresewara. Kuiri pesendu ixe arama. 2 Nyãse puranga hasaru penye Deus rese, nyãse penyete haxari Kristu supe, kuaye kunya purangawaa yawe Kristu rimiriku arama penye; yepenyute imena ae. 3 Hasikie yawaite Yurupari urasu pemanduarisawa Kristu sui kuaye buya ugananiwaa eva yawe kuxima, yawaite tisupiwa pemanduari Kristu pepia upe. 4 Uri rame yepe apigawa umbue arama penye amu Jesus rese isui kua yambuewaa asui pesendu ixupe, marantaa pexari demuniu uwike pepia upe? Marantaa peruyari amu nyenga apekatu isui kua nyenga purangawaa peruyariwaa kuxima? 5 Timaa puxuwera piriwaa ixe aintasui kuaita apustuluita umbuewaita penye. 6 Tirame hakuawa hapurungita ixe nyenga purangawaa irumu, maa hakuawa ixe nyenga purangawaa irumu, maa hakuawa ixe, ape yaxari pekuawa ae yawewarawate.Supiwa upuraki Deus upe arama
7 Maitaa puxi kua hamunyawaa hapurara peresewara pirasuawaa yawe, peiku arama kuri puranga? Nyãse tihaputari peirumu sikuyara kua nyenga hambuewaa purangawaa Deus rese. 8 Haxari amuita ingreja umee ixe arama hapiripana arama haajudari arama penye. 9 Haiku rame peirumu watari rame ixe arama tihapurandu peirumu hambau arama nyãse aintauxari ixe arama maantu haputari kuaita yanemuita Masedunia upewaraita. Timaa haxari pepurara seresewara kuiri yuiri tikuri maa hapurandu peirumu. 10 Kristu nyenga supiwa uiku sepia upe, ape hambeu supiwa penye arama tikuri haxari aintauyuka kua nyenga seresewara kuaita Akaya upewaraita. 11 Marantaa tihaputari peirumu semaa arama? Maitaa tihagustari penye? Deus ukuawate hagustari penye. 12 Timaa haputari peirumu kuxima kuiri yuiri kuri timaa haputari yawaite aintaumbeu aintaumunya yaneyawe kuaita uputariwaita uganyari aintamaa irumu kua aintaumbuewaa. 13 Timaa Kristu umunduwaita ainta supiwa kuaita uputariwaita uganyari aintaumbuewaita irumu, upurakiwaita gananiwera ainta, ugustariwaita aintamaa arama, aintauputari Kristu umunduwaita ainta. 14 Yawe aintaumunya, kua Yurupari yuiri uyereu anju murutingawaa yawe. 15 Ape yuiri Yurupari miraita aintauputari aintaumuyereu upurakiwaita purangawaa yawe. Aintaukanyemu arama sesewara kua puxuwerawa aintaumunyawaa.
Upurara Deus nyenga resewara
16 Hambeu yuiri, tepexari amu umanduari tihakuawa ara, maa pemanduari rame tihakuawa ara haputari pesuanti ixe hambeu arama kuaira seresewara puranga. 17 Timaa yaneruixawa umundu hambeu kua hambeuwaa kuiri, anyunte hambeu purangawaa seresepawa aintayawe kuaita tiwaita ukuawa ara. 18 Siya kua mundu puraita umbeu purangawaa aintaresepawa, ape ixe yuiri kuri hambeu pesendu seresewara. 19 Pemanduari ukuawawaita penye, ape suuri pesendu ainta supe kuaita tiwaita ukuawa ara. 20 Peaguentari aintairumu kuaita apigawaita umprezuwaita penye, pexari aintauganani penye, tipemundu aintaupagari penye puranga, suuri pemaa ainta supe kuaita umanduariwaita puranga pesui ainta kuaita unupawaita penye. 21 Hambeu penye arama, pitua yande yamunya arama maa aintayawe. Aintauputari rame aintaumbeu purangawaa aintaresewara, hambeu yuiri kuri puranga seresewara tiwa yawe ukuawa. 22 Maitaa ebrewita ainta? Ixe yuiri ebreu ixe. Maitaa israelitaita ainta? Ixe yuiri. Maitaa Abraão rimiariruita ainta? Ixe yuiri ximiariru. 23 Maitaa upurakiwaita Kristu supe ainta? Ixe yuiri upurakiwaa puranga aintasui; kuiri hambeu seresewara tiwa ukuawa yawe. Maa kirimbawa piri aintasui hapuraki; yaneruanyana umprezu ixe siya viaji aintaunupa ixe, siya viaji yawaite kuaji hamanu ixe. 24 Sinku viaji aintaunupa ixe trinta nuvi viaji xikuti irumu kuaita judewita. 25 Musapiri viaji aintaunupa ixe mirai irumu. Yepe viaji aintaumburi serese ita. Musapiri viaji yayupipika naviu upe. Yepe pituna yepe ara yawiwi paraname mirá rese. 26 Hamunya siya viaji, hasu parana yawaitewaa rupi, asui munduwasuita aintauputari aintauyuká ixe, asui semiraita uputari uyuká ixe, asui tiwaita judeu uputari uyuká ixe tetama turusuwaa upe, kampu upe yuiri, parana turusuwaa upe yuiri, asui ingreja supe aramawaita ugananiwaita uputari uyuká ixe. 27 Kirimbawa hapuraki ate pitua sepira; siya pituna tihapuderi hakiri; siya viaji hapurara yumãsi, timaa hambau; hapurara seisi; siya viaji hayukuaku; siya viaji irusanga ixe arama nyãse kuaira hariku semaa. 28 Yawe puxi uri sepiri yawewarawate seruanyanaita resewara, asui ipusewaa sepia muiri ara nyãse hayuka sepia aintarese panye kuaita ingreja hayupiruwaita. 29 Awa pitua ae, asui ixe yuiri pitua ixe. Awa uxari uganani amu umunya arama puxuwerawa sepiaiwa hamaa ixupe. 30 Hambeu rame seresewara hambeu yuiri sese kua sepituasawa. 31 Kua yaneruixawa Jesus ipaya Deus kua purangawaa yawewarawate ukuawate timaa haganani. 32 Asui Damasku upe kua aintaruixawa Areta supe arama uxari suraraita usaru Damasku rimbiwa kiti aintaumprezu arama ixe. 33 Maa kuaita semuita aintaumuye ixe watura upe janela iwatewaa sui hayawawa arama isui.