—Supiwa uyukáwaa mira kua apigawa nyãse ueskapari gapenu sui maa kuiri umanu kuri ae ipuxuwerasawa resewara. 5 Maa umburi isui kua buya tata kiti asui nẽ maa upurara sesewara. 6 Asui aintausaru ipungawaa ae, asui aintausaru uwari kutara umanu ae, asui uikupuku aintausaru maa timaa upurara, asui aintautrukari aintaumanduarisawa aintaumbeu:

—Yepe deuste ae.

7 Ape kuayentu isui kua tendawa aikue amu tendawa iyara kua Publiu, asui usuanti yande puranga asui yaiku irumu musapiri ara. 8 Asui ipaya kua Publiu imãsi puruka takua yuiri sese turusu, asui Paulu umaa ipiri, asui upurandu Deus sese asui uxari ipu sese, asui ikatuana ae. 9 Asui usendu kua umunyawaa aintauri yuiri kuaita amuita imãsiwaita uikuwaita kaapuamu rese, asui umukaturu aintayuiri. 10 Asui aintauxari yande arama siya prezenti, asui yasu irumu aintasui aintauxari yande arama naviu upe panye maantu watari yande arama.

11 Asui musapiri yasi rire yawiye amu naviu upe Alexandria suiwara, usaruwaa yuiri paranawasu usasawa kaapuamu rese, uriku iganti rese sangawa kua Diuskuru. 12 Asui yayari Sirakuza upe, asui yaiku akiti musapiri ara. 13 Asui yasasawa aintarendawa ruakintu yasika Rejiu kiti. Asui wirande kiti iwitu uyupiru upeyu tumasawaa sui mukuĩ ara rire asui yasika Puteuli kiti. 14 Ape yawasemu yepeyepe yanemuita asui aintaupurandu yande yaiku arama aintairumu seti ara. Asui yasu Ruma kiti. 15 Asui kuaita yanemuita apewaraita aintausendu irumu yanerese aintauri yaneruaxara ate Prasa Apiu kiti Tres Vendas kiti yuiri. Asui Paulu umaa irumu ainta umee purangawaa Deus supe, asui uyumusuuri.

16 Asui yasika Ruma kiti, asui aintauxari Paulu uiku yepenyu irumu kua surara usaruwaa ae. 17 Asui musapiri ara rire umuatiri kuaita judewita serakuenawaita, asui aintauyumuatiri rire umbeu ainta supe:

—Semuita, timaa hamunya puxi ainta supe kuaita miraita, tiyuiri hamuruanyana yaneramunyaita kustumi maa aintaumprezu ixe Jeruzalẽ kiti aintauxari ixe aintaipu kuaita Ruma suiwaraita. 18 Asui aintaupurandu rire aintausendu irumu aintauputari aintauyurawa ixe kuaita Ruma suiwaraita nyãse timaa aintauwasemu serese hamunyawaita puxi aintauyuká arama ixe. 19 Asui kirimbawa aintaumuruanyana ixe kuaita judewita, asui harikute hapurandu Sezar usendu ixe arama, maa timaa nungara haputari hambeu puxi aintarese kuaita semiraita. 20 Yawewaa resewara hasenui penye hamaa arama penye hapurungita arama yuiri ixe peirumu nyãse prezu ixe kurenti irumu sesewara kua aintausaruwaa israelitaita. 21 Asui aintaumbeu ixupe:

—Timaa yariku papera nerese Judeya suiwara, asui tiyuiri yepe aintasuiwara kuaita yanemuita uriwaa yanepiri aintaumbeu puxi nerese. 22 Maa yaputari yasendu neirumu mayetaa remanduarisawa sese kua aintaumbuewaa yakuawawaa sese aintaumbeuwaa puxi sese panye kiti.

23 Asui aintauxari amu ara aintausendu arama ixupe, asui aintauri suka kiti siya miraita, asui umbeu ainta supe yaneruixawa Deus umunduwaa upe rese, uyupiru kuemaitere ate pituna, asui Muize nyenga irumu aintanyenga irumu yuiri kuaita utitikawaita uputari uxari aintaukuawa Jesus rese. 24 Asui yepeyepe aintaukuawa supiwa kua umbeuwaa maa kuaita amuita tiaintauruyari ae. 25 Asui mukuĩ aintaumanduarisawa anyunte aintauputari aintausu isui, asui Paulu umbeu ainta supe kua nyenga:

—Supiwa kua Espiritu Santu umbeu peramunyaita supe iyuru irumu kua utitikawaa Izaia, 26 Maa umbeu:

—Resu aintapiri kuaita miraita rembeu arama ainta supe: "Pesendu kuri maa timaa kuri pekuawa mayesawataa ae, pemaa kuri maa timaa kuri pekuawa maataa pemaawaa. 27 Nyãse santawaa aintapia kuaita miraita, uyumusikindawa aintaapisa, aintausapumi aintaresa, yawaite aintaumaa aintaresa irumu, yawaite aintausendu aintaapisa irumu, yawaite aintaukuawa aintapia upe, yawaite aintauyereu sepiri hamukaturu arama ainta." 28 Kuiri haxari pekuawa Deus umundu kua salvasão aintapiri kuaita tiwaita judeu aintausendu kuri ixupe. 29 Asui umbeu rire kua inyenga anyunte aintauyuiri isui kuaita judewita aintauyupurungita kirimbawa aintapawa.

30 Asui mukuĩ akayu Paulu uiku suka upe upuranduwaa aintairumu, asui usuanti muiri kuaita uriwaita ipiri. 31 Umbue ainta yaneruixawa Deus umunduwaa upe rese, umbue yuiri ainta panye sese kua yaneruixawa Jesus Kristu, asui tiawa usaisu umbeu.