—Kuiri repuderi rembeu neresewara. Asui Paulu usupiri ipu asui umbeu sesewara: 2 —Kuiri suuri ixe nyãse hapuderi hambeu seresewara resendu arama inde tuixawa Agripa, hambeu seresewara suaxara kua aintaumbeuwaa puxi serese kuaita judewita. 3 Nyãse inde rekuawa puranga aintarikusawa kuaita judewita, rekuawa yuiri maye aintaupurungita aintanyenga resewara, ape hapurandu inde resendu arama ixe arama merupiara. 4 Panye kuaita judewita aintaukuawa maye haiku setaina pukusawa aintapiterupi kuaita semiraita asui Jeruzalẽ kiti yuiri. 5 Nyãse supiwa kuximare aintaukuawa ixe, asui aintauputari aintauxari aintaupuderi aintaumbeu serese farizeu ixe, haruyari kua iwasuwaa yaruyari. 6 Asui kuiri hapuamu pemaa pembeu arama serese sesewara kua yasaruwaa yamaa Deus umbeuwaa ainta supe kuaita yaneramunyaita. 7 Asui kuaita duzi tribu israelitaita suiwara aintausaru kirimbawa aintaumaa ae, ape aintaumanduari Deus muiri ara pituna yuiri, ape, inde tuixawa sesewara kua yasaruwaa yamaa puxi aintaumbeu serese kuaita judewita, 8 Marantaa pemanduari tiyapuderi yaruyari Deus upuderi umbaka kuaita umanuwaita? 9 Asui ixe yuiri hamanduari kuera harikute hamunya turusu hamuruanyana arama sera kua Jesus Nazare suiwara. 10 Asui yawe hamunya Jeruzalẽ kiti, hamprezu siya uruyariwaita nyãse yawe aintauxari hamunya kuaita saserdutita ruixawaita, asui aintauyuká irumu ainta hambeu aintarese puxi. 11 Asui siya viaji hampurara ainta aintasinaguga upe, asui haputari haxari aintaumbeu puxi Deus rese, asui ipiaiwasawa turusuwaa irumu hamuruanyana ainta aintarendawa apekatuwaa kiti yuiri. 12 Asui arire hasu Damasku kiti, aintauxari ixe arama mundusawa kuaita saserdutita aintaruixawaita asui aintaumundu ixe. 13 Asui inde seruixawa, yandara rame hasuwaa upe pee rupi hamaa yepe turi umuturi kirimbawa piri kurasi sui umuturi serese aintarese yuiri kuaita usuwaita seirumu. 14 Asui hawari iwi upe hasendu yepe nyenga ebrewita nyenga rupi, umbeu:

—Saulu, Saulu, marantaa remuruanyana ixe? Iwasu inde arama remuruanyana kua saintiwaa. 15 Asui hapurandu hasendu arama:

—Awataa inde seruixawa? Asui Seruixawa usuaxara ixe, umbeu:

—Ixete Jesus kua remuruanyanawaa. 16 Maa kuiri repuamu reiku neipi irumu nyãse haxari kuri repuraki ixe arama haxari kuri rembeu sesewara kua rekuawa serese, rembeu aintarese yuiri kuaita haxariwaita kuri remaa. 17 Hayurawa kuri inde aintasui kuaita miraita kuaita tiwaita judeu yuiri nyãse hamundu kuri inde aintapiri, 18 Repirari arama aintaresa aintaumaa arama, asui remuyereu ainta pitunawasuwaa sui turi kiti, reyuka arama ainta Yurupari sui Deus supe, hamburi arama aintasui aintapuxuwerasawa aintauriku arama aintasui purangawaa aintairumu kuaita purangawaita hamaa aintauxariwaa resewara aintapia serese. 19 Ape, inde tuixawa Agripa, ixe haruyari kua hasenduwaa iwaka sui. 20 Maa hayuiri hambue ainta Damasku kiti asui Jeruzalẽ kiti yuiri, asui panye Judeya kiti yuiri, asui kuaita yuiri kuaita tiwaita judeu hambeu ainta supe sasiyara arama aintaumanduari aintapekaduita aintauyereu arama Deus ipiri aintaumunya arama puranga yakuawa arama sasiyara aintaumanduari aintapuxuwerasawa. 21 Yawewaa resewara aintaumprezu ixe yepeyepe judewita haiku irumu templu upe aintauputari aintauyuká ixe. 22 Asui ate kuiri Deus uajudari ixe, asui haiku ike hambeu sesewara penye arama panye ipuiwaita supe ipuwasuwaita supe yuiri, timaa nungara hambeu isui aintanyenga kuaita utitikawaita Muize nyenga yuiri sese kua yamaawaa kuri. 23 Kristu urikute upurara asui uyupiru resewara upaka manusawa sui umbeu kuri ainta supe kua turi ainta supe panye kuaita miraita tiwaita judeu yuiri.

24 Asui umbeu irumu sese anyunte Festu umbeu nyenga kirimbawa irumu:

—Tirekuawa ara inde Paulu, neakangaiwa inde reyumbue resewara turusu. 25 Asui Paulu umbeu ixupe:

—Timaa seakangaiwa ixe, inde Festu purangawaa, maa hambeu nyenga supiwa purangawaa. 26 Nyãse kua tuixawa ukuawa sese panye, ape hambeu ixupe ae satambika, hakuawa timaa nungara aintauyumimi isui nyãse timaa uyumimiwaa ae. 27 Inde tuixawa Agripa, maitaa reruyari kuaita utitikawaita? Hakuawate reruyari ainta. 28 Asui Agripa umbeu Paulu supe:

—Maitaa remanduari kutara rexari haruyari Kristu yara arama ixe? 29 Asui Paulu umbeu ixupe:

—U kutara u merupiara, haputari maa Deus uxari reiku kuaye seyawe aintayuiri panye kuaita usenduwaita ixe arama kuiri, haputari maa aintauiku kuaye seyawe isui kua kurenti.

30 Asui kua tuixawa upuamu uiku, ae yuiri kua guvernaduru, kua Berenise yuiri asui aintaupuamu yuiri panye kuaita uwapikawaita aintairumu. 31 Asui aintauyuiri rire aintasui aintaupurungita aintapawa aintaumbeu:

—Kua apigawa timaa umunya puxi yayuká arama ae, tiyuiri yamprezu ae. 32 Asui Agripa umbeu Festu supe:

—Tirame maa kua apigawa upurandu yande yaxari ae Sezar usendu arama ixupe yapuderi maa yayurawa ae.