—Semuita, puranga sepia irumu hawata Deus umaa ate uyi ara. 2 Asui kua saserdutita ruixawa serawaa Anania umundu aintaunupa Paulu iyuru upe kuaita upuamuwaita suaki. 3 Asui Paulu unyee ixupe arama:

—Inde umanuwaa kuera yawewaa murutinga iarupi, inde rewapikawaa rembeu serese puxi ipupe kua Deus nyenga kuximawara, nyãse inde resaisu kua Deus nyenga kuximawara sesewara rexari aintaunupa ixe. 4 Asui kuaita upuamuwaita suaki aintaunyee ixupe:

—Maitaa repurungita puxi sese kua Deus uxariwaa saserdutita ruixawa? 5 Asui Paulu usuaxara ae:

—Tihakuawa aete saserdutita ruixawa, nyãse aintaumpinima: "Terembeu puxi sese kua umunduwaa miraita." 6 Asui Paulu ukuawa irumu pitera rupi sadusewita kuaita serakuenawaita, asui pitera rupi farizewita yuiri, asui unyee ainta supe:

—Semuita, farizeu ixe, farizeu raira ixe, asui kuiri pembeu serese sesewara kua yasaruwaa hamaa, sesewara yuiri yapuamu manusawa sui. 7 Asui umbeu rire kua inyenga, asui aintaumaramunya kuaita farizewita sadusewita irumu, asui mukuĩ aintaumanduarisawa kuaita miraita. 8 Nyãse kuaita sadusewita aintaumbeu tiyapuamu manusawa sui, aintaumbeu yuiri tiyamaa anju nẽ espiritu yuiri, maa kuaita farizewita aintaumanduari aikue ainta. 9 Asui aintausasemu turusu, asui aintaunyee yepeyepe umpinimawaita farizeu suiwaraita, aintaunyee:

—Tiyawasemu puxuwera sese kua apigawa; yakuawa será yepe anju u yepe espiritu upurungita irumu supiwa. 10 Asui aintaipiaiwa aintaupurungita, asui kua kumandanti usikie yawaite umanduari aintaupartiri kua Paulu, asui umundu suraraita aintaurasu Paulu miraita pitera sui, aintaurasu arama ae suraraita ruka kiti.

11 Asui nyã pituna Yaneruixawa upuamu suaki unyee ixupe:

—Reiku santa, nyãse kuaye rembeuwaa yawe seresewara Jeruzalẽ kiti, yawete yuiri rembeu kuri seresewara Ruma kiti.

12 Asui kuemana aintauyumuatiri kuaita judewita asui aintaumbeu tikuri aintaumbau tikuri aintauu yuiri senundere aintauyuká kua Paulu. 13 Asui siya kuaita uputariwaita uyuká usasawa kuarenta apigawaita. 14 Asui aintausu aintapiri kuaita saserdutita ruixawa serakuenawaita yuiri asui aintaunyee ainta supe:

—Yayumbeu nyenga kirimbawa irumu, tikuri yau tiyambau yuiri tiramere yayuká kua Paulu. 15 Kuiri penye aintayuiri kuaita serakuenawaita pepurandu kumandanti uxari arama perasu penye arama ae pepurandu arama pesendu puranga sese kua inyenga, asui pruntu kuri yande yayuká arama ae senundere usika pepiri. 16 Maa kua Paulu rendira membira usendu kua aintanyenga asui uwike suraraita ruka kiti umbeu Paulu supe arama panye kua usenduwaa. 17 Asui Paulu usenui yepe kapitão unyee ixupe:

—Rerasu kua kurumiwasu kumandanti ipiri nyãse uputari umbeu yepe nyenga ixupe arama. 18 Asui upisika ae ipu irumu urasu ae ipiri kua kumandanti, upurandu ae:

—Kua prezu serawaa Paulu usenui ixe upurandu ixe harasu arama nepiri kua kurumiwasu, nyãse uputari umbeu yepe nyenga inde arama. 19 Asui kua kumandanti upisika ipu asui urasu ae yepenyu asui upurandu ae:

—Maataa reputari rembeu ixe arama? 20 Asui unyee:

—Kuaita judewita aintauputari aintaupurandu inde wirande rerasu arama Paulu aintapiri kuaita serakuenawaita, aintauputari aintaupurungita irumu puranga piri. 21 Teremunya kuaye aintauputariwaa yawe, nyãse kuarenta apigawaita usaruwaa ae nyãse aintauyumbeu timaa kuri aintaumbau tiyuiri aintauu senundere aintauyuká ae pruntuana ainta kuiri aintausaru inde rembeu arama ainta supe arama remundu kuri ae. 22 Asui kua kumandanti uxari usu kua kurumiwasu, asui umbeu ixupe tiarama umbeu awa supe kua umbeuwaa kumandanti supe. 23 Asui usenui mukuĩ kapitão umundu arama ainta:

—Peyumukaturu duzentu surara, asui setenta usu kavalu rese, asui duzentu urasuwaita lansa, aintausu arama Sezareya kiti nuvi ura pituna rame. 24 Pemukaturu yuiri kavalu Paulu supe arama, perasu arama ae puranga ipiri kua guvernaduru Felix.

25 Asui umpinima ixupe yepe papera yawewaa resewara: 26 —Ixe Klaudiu Lizia inde arama inde Felix, inde guvernaduru puranga, reiku puranga. 27 Kuaita judewita aintaumprezu kua apigawa asui kuaji aintauyuká ae hasu irumu aintapiri aintairumu kuaita suraraita, asui hayurawa ae nyãse Rumawara ae. 28 Asui haputari hakuawa satambika maa resewarataa aintaumbeu puxi sese harasu ae aintapiri kuaita serakuenawaita. 29 Ape hakuawa aintaumbeu puxi sese nyãse tiuruyari Deus nyenga kuximawara, maa tiumunya puxi yayuká arama ae u yamprezu arama ae. 30 Asui hasendu irumu aintauputari aintauyuká ae uyumimisawa upe, asui hamundu nepiri ae, asui hambeu ainta supe arama umbeuwaita puxi sese, aintaumbeu arama resendu maa resewarataa puxi aintaumaa ae.

31 Asui kuaita suraraita aintaurasu Paulu pituna rame ate Antipatride kiti aintaumunya kuaye kumandanti umunduwaa yawe. 32 Asui wirande kiti kuaita suraraita aintauyuiri usika aintaruka kiti, asui aintauxari kuaita usuwaita kavalu rese aintaurasu Paulu. 33 Asui aintausika Sezareya kiti aintauxari kua papera ixupe kua guvernaduru, asui aintauxari yuiri ixupe kua Paulu. 34 Asui uleri rire kua papera upurandu usendu mayewaa tetama suitaa uri. Asui ukuawa uri Silisia sui ae. 35 Unyee ixupe arama:

—Hasendu kuri inde arama aintausika rame kuri kuaita umbeuwaita puxi nerese. Asui umundu aintausaru ae puranga Erudi suraraita ruka upe.