Atu 8

Aintaumuruanyana kuaita uruyariwaita

Asui kua Saulu puranga umaa aintauyuká Estevão. Asui nyã ara upe aintauyupiru aintaumuruanyana turusu kuaita ingreja puraita Jeruzalẽ upe, asui panye aintaumusaĩ Judeya kiti Samaria kiti yuiri, anyunte kuaita apustuluita aintauiku Jeruzalẽ upe. 2 Asui yepeyepe apigawaita uruyariwaita aintaurasu Estevão ipira kuera iwi kuara kiti asui aintauyaxiu turusu. 3 Maa Saulu umuaiwa kuaita ingreja puraita, uwike muiri uka usiki apigawaita kunyaita yuiri asui umburi ainta kadeya kiti.

Filipe umbue Samaria kiti

4 Asui kuaita uyusaĩwaita aintauwata aintaumbue kua nyenga. 5 Filipe usu yepe tetama Samaria kiti umbeu Kristu rese. 6 Asui kuaita miraita siyawaita yepewasu aintauruyari Filipe umbeuwaa aintausendu irumu ae, aintaumaa irumu yuiri milagrita umunyawaita. 7 Nyãse kuaita demuniwita ikiawaita aintausasemu kirimbawa aintausemu irumu aintasui kuaita urikuwaita ainta, asui purangana siya kuaita membekawaita kuaita alejaduita yuiri. 8 Asui suuri kuaita miraita nyã tetama upe.

Simão paye

9 Apete yepe paye serawaa Simão tetama upe uxari aintausikie aintaumaa ae kuaita Samaria upewaita, umanduari puranga piri ae aintasui. 10 Aintausendu ixupe panye, panye tainaita panye tuyuweita yuiri aintaumbeu kua apigawa Deus kirimbawasawa ae, aintaumuseruka ae kirimbawasawa turusuwaa. 11 Asui aintausendu ixupe nyãse uikupuku uxari aintausikie aintaumaa ipayesawa resewara. 12 Maa aintauxari aintapia sese kua inyenga purangawaa Filipe umbeuwaa ainta supe, sese maye aintaruixawa arama kuri kua Deus sera rese yuiri kua Jesus Kristu, asui aintauxari ubatizari ainta kuaita apigawaita kunyaita yuiri. 13 Asui Simão yuiri uxari ipia asui ubatizari rire usu Filipe irumu asui umaa panye kuaita —Tiwaitare umaa panye milagrita yuiri umunyawaita.

Pedru Juão yuiri Samaria upe

14 Asui kuaita apustuluita Jeruzalẽ upe aintausendu aintausuanti Deus inyenga Samaria kiti asui aintaumundu aintapiri Pedru Juão yuiri. 15 Asui aintauri aintaupurandu aintarese aintauriku arama kua Espiritu Santu. 16 Nyãse umbaare uwiye aintarese, anyunte aintaubatizari ainta sera rese kua yaneruixawa Jesus. 17 Asui aintauxari aintaipu aintarese, asui aintauriku kua Espiritu Santu. 18 Asui Simão umaa irumu aintauriku kua Espiritu Santu apustuluita uxari resewara aintaipu aintarese uputari umee dinyeru ainta supe. 19 Umbeu:

—Pexari ixe arama yuiri kirimbawasawa aintauriku arama kuri Espiritu Santu kuaita kuri haxariwaita seipu aintarese. 20 Maa Pedru umbeu ixupe:

—Nedinyeru ukanyemu kuri neirumu nyãse remanduari repuderi repiripana kua Deus uxariwaa sikuyaraimawate. 21 Tirepuderi reajudari yande sese kua muraki nyãse timaa purangawaa remanduarisawa Deus umaa. 22 Ape sasiyara remanduari kua nepuxuwerasawa, asui repurandu yaneruixawa irumu uputari rame maa umburi nesui kua remanduarisawa nepia upe. 23 Nyãse hakuawa irawawaa remanduarisawa, asui nepuxuwerasawa umprezure inde. 24 Asui Simão usuaxara ainta supe, umbeu:

—Pepurandu serese yaneruixawa irumu tiarama uwari serese kua pembeuwaa. 25 Asui kuaita apustuluita aintaumbue rire sese kua aintausenduwaa aintaumaawaa yuiri Jesus irumu aintaumbeu rire yuiri yaneruixawa rese aintauyuiri Jeruzalẽ kiti, asui aintausuwaa upe aintaumbue kua nyenga purangawaa siya tetama mirita supe Samaria kiti.

Filipe umbue eunuku

26 Asui yepe Yaneruixawa anju umbeu Filipe supe:

—Resuana kurasi usemuwaa iarukanga kiti pee rupi urasuwaa yande Jeruzalẽ sui Gaza kiti kampu upewaa ae. Asui upuamu usu. 27 Asui yepe eunuku Etiupia suiwara upurakiwaa ixupe kua kunya Kandase Etiupia upewaraita ruixawa ae, aete usaruwaa panye maa iyaraita sipiwasuwaita, uri upurandu Deus irumu Jeruzalẽ kiti. 28 Uyuiriwaa upe uwapika ikaru upe uleri uiku kua utitikawaa Izaia umpinimawaa. 29 Asui Espiritu umbeu Filipe supe:

—Remusuaki nyã karu asui resu irumu. 30 Asui Filipe uyana ipiri asui usendu uleri uiku kua utitikawaa umpinimawaa Izaia, asui upurandu ae:

—Maitaa rekuawa mayesawa kua releriwaa? 31 Asui usuaxara ae umbeu:

—Maitaa maa hapuderi hakuawa mayesawataa ae tirame awa umbeu hasendu? Asui usenui Filipe uyupiri arama irumu ikaru kiti. 32 Aete kua uleriwaa Deus nyenga upe: "Aintaurasu ae kuaye uvelya yawe aintaurasuwaa aintauyuká aramawaa kiti, asui kuaye uvelya yawe ukiririntu uiku aintaipu upe aintaumunuka irumu isui sawa, timaa upirari iyuru. 33 Aintausaisu isui nyenga satambikawaa aintaumuwira kiti irumu ae. Awataa upuderi ukuawa kuaita upakawaita arame? Nyãse aintaumuyuiri sikuesawa kua mundu sui." 34 Asui kua eunuku umbeu Filipe supe:

—Hapurandu inde, rembeu hasendu awa resetaa umbeu kua utitikawaa, maitaa umbeu sesepawate u amu rese? 35 Asui Filipe uyupiru umbue ae, umbeu ixupe mayesawataa kua uleriwaa Deus nyenga upe, asui umbeu ixupe Jesus rese. 36 Asui aintausuwaa upe pee rupi aintausika yepe parana rimbiwa upe, asui kua eunuku umbeu:

—Remaa kua parana marantaa tirepuderi rebatizari ixe kuiri? 37 Asui Filipe umbeu ixupe:

—Hapuderi reruyari rame panye nepia upe. Asui usuaxara ae, umbeu:

—Haruyari Deus raira kua Jesus Kristu. 38 Asui umundu upitu kua ikaru, asui aintauye parana kiti kuaita mukuĩwaita. Asui Filipe ubatizari kua eunuku. 39 Asui aintausemu rire parana sui yaneruixawa Espiritu urasu Filipe, asui kua eunuku tiana umaa ae, asui usu sapee rupi suuri. 40 Asui aintauwasemu Filipe Azutu kiti, asui uwata umbue kua nyenga purangawaa panye tetama mirita kiti ate usika Sezareya kiti.