—Tipuranga yapitu yambue Deus nyenga yamee arama pembau arama. 3 Ape yanemuita, peparawaka pepitera sui seti apigawaita aintaurespetariwaita teresemuwaita Espiritu Santu irumu ukuawawaita, yaxari arama ainta supe kua muraki. 4 Maa yande yambeu kuri Deus yambue yuiri inyenga. 5 Asui suuri aintausendu kua nyenga panye kuaita aintaumbuewaita, asui aintauparawaka Estevão yepe apigawa teresemuwaa Espiritu Santu irumu uruyari kirimbawa, asui Filipe, asui Prukuru, asui Nikanuru, asui Timão, asui Parmena asui Nikulau yepe aintaumbuewaa Antiukia suiwara. 6 Asui aintaurasu ainta apustuluita ipiri aintaupurandu irumu Deus asui aintauxari aintaipu aintarese. 7 Asui Deus nyenga uyukiriari turusu asui siyapiri kuaita aintaumbuewaita Jeruzalẽ upe, asui siya saserdutita yuiri aintauxari aintapia sese kua aintauruyariwaa.

8 Asui Estevão teresemu ae grasa irumu kirimbawasawa irumu yuiri umunya siya tiwaitare yamaa siya yuiri milagri. 9 Asui aintaupuamu suaxara yepeyepe aintasinaguga sui serawaa Libertu, kuaita Sireni suiwaraita, Alexandria suiwaraita yuiri, kuaita yuiri Silisia suiwaraita, Azia suiwaraita yuiri asui aintaupurupurungita Estevão supe. 10 Maa tiaintaupuderi suaxara kua umbeuwaa Espiritu Santu ukuawasawa irumu. 11 Asui uyumimisawa upe aintaumundu yepeyepe apigawaita aintaumbeu:

—Yasendu umbeu nyenga puxuwerawa Muize rese Deus rese yuiri. 12 Asui aintauyumpiaiwa kuaita miraita kuaita tuyuweita yuiri umpinimawaita yuiri, asui aintauri aintaupisika ae asui aintaurasu ae aintapiri kuaita serakuenawaita. 13 Asui aintauxari yepeyepe gananiwaita aintaumbeu arama:

—Timaa ikuere umbeu nyenga puxuwerawa sese kua tetama purangawaa Muize nyenga rese yuiri. 14 Nyãse yasendu umbeu kua Jesus Nazare suiwara umburi kuri kua tetama asui utrukari kuri kua kustumi Muize uxariwaa yande arama. 15 Asui panye kuaita serakuenawaita uikuwaita ape aintaumaa ixupe asui aintaumaa suwa kuaye anju ruwa yawe.