—Remaa yande arama. 5 Asui umaa ainta supe puranga, usaru aintaumee ixupe esmula. 6 Maa Pedru umbeu ixupe:

—Tihariku prata nẽ uru maa haxari inde arama kua harikuwaa; repuamu rewata sera rese kua Jesus Kristu Nazare suiwara. 7 Asui upisika ae ipu katusawa irumu asui usupiri ae, asui apete kirimbawa ipi uyumuapirisawa yuiri. 8 Asui upuri upuamu asui uwike aintairumu templu kiti, asui upuri umee purangawaa Deus supe. 9 Asui panye mira aintaumaa ae uwata umee purangawaa Deus supe. 10 Asui aintaukuawa aete ae kua uwapikawaa upurandu esmula aintairumu templu rukena upe serawaa Purangawaa, asui aintaakayemu aintaumaa maye kua usasawawaa sese.

11 Umusuaki irumu Pedru Juão yuiri, panye kuaita miraita aintaakayemu aintaumaa, asui aintauyana aintapiri kupiara kiti serawaa Salumão. 12 Asui Pedru umaa irumu ainta, umbeu ainta supe kuaita miraita:

—Penye israelitaita, marantaa peakayemu pemaa sese kua? Maitaa pemaa yande nyãse yaxari uwata kua apigawa yakuawasawa irumu u yanepurangasawa irumu? 13 Kua Abraão Deus, Izaki Deus, Jaku Deus yuiri, aintaDeus yuiri kuaita yaneramunyaita uxariana yakuawa purangawaa sese kua Taira Jesus, kua pexariwaa suanyanaita supe, kua pemburiwaa Pilatu umaa uputariwaa irumu uyurawa ae. 14 Maa pemburiana kua ikiaimawaa ipia, kua purangawaa, asui pepurandu uyurawa penye arama yepe uyukáwaa mira. 15 Asui peyuká kua uyupiruwaa uxari yapaka, asui Deus usupiri ae manusawa sui ape yambeu sesewara nyãse yamaa ae. 16 Asui yaxari resewara yanepia sera rese, uxari kirimbawa kua apigawa pekunyeseriwaa, yaxari resewara yanepia sese purangate kua apigawa pemaawaa upe muiri penye. 17 Kuiri penye semuita, hakuawa pemunya ae tiresewara pekuawa, yawete yuiri kuaita umunduwaita penye. 18 Maa usasawa panye kua Deus umbeuwaa aintayuru sui panye kuaita utitikawaita upurara arama kua Kristu kua Deus yara. 19 Pemanduari sasiyara pepekadu petrukari pemanduariwaa uperduari arama pesui pepekadu. 20 Yaneruixawa uxari arama pepitu kuri puranga umundu arama kuri penye arama kua Kristu kua Jesus aintaumbeuwaa sese penye arama. 21 Maa urikute uiku iwaka kiti Deus umunya arama panye kua umbeuwaa aintayuru sui kuaita utitikawaita purangawaita. 22 Supiwa Muize umbeuwaa kuera: "Yaneruixawa Deus usupiri kuri yepe utitikawaa peimuita pitera sui kuaye usupiriwaa yawe ixe, pesendu kuri ixupe panye umbeuwaa. 23 Ape kuri panye kuaita tiwaita usendu ixupe kua utitikawaa aintaukanyemu kuri aintapitera sui kuaita miraita." 24 Asui muiri kuaita utitikawaita kuera aintaumbeu, Samuel umbeu, asui muiri kuaita sakakuerawaraita yuiri aintaumbeu sese kua ara kuiriwaa. 25 Penyete aintarairaita kuaita utitikawaita kuera, penyete periku aramawaita kua Deus umbeuwaa peramunyaita supe umbeu irumu Abraão supe:

—Nerimiariru irumu haabensuari kuri panye kuaita miraita kua mundu upe. 26 Asui Deus usupiri Taira asui uyupiru umundu ae pepiri uabensuari arama penye peyereu irumu pepuxuwerasawa sui.