—Maitaa indete judewita ruixawa? Asui usuaxara ae umbeu ixupe:

—Ixete rembeuwaa. 3 Asui kuaita saserdutita ruixawaita aintaumbeu umunya turusu puxuwera. 4 Asui Pilatu upurandu ae mukuĩsawa:

—Maitaa timaa repuderi resuaxara ainta? Remaa maye aintaumbeu puxuwera nerese. 5 Asui nẽ maye Jesus usuaxara ainta inyenga irumu, asui Pilatu upita iakayemu umaa ixupe. 6 Asui akayu yaweyawe aintauyumuatiri rame festa upe uyurawa ainta supe yepe prezu mayewaa aintaupurandu irumu. 7 Ape yepe, prezu umuruanyanawaa guvernu sera Baraba, uyuka yepe apigawa aintaumaramunyawaa upe. 8 Asui kuaita miraita siyawaita aintauri Pilatu ipiri aintauyupiru aintaupurandu ae umunya arama ainta supe kuaye umunyawaa yawe ainta supe akayu yaweyawe. 9 Asui Pilatu usuaxara ainta, umbeu ainta supe:

—Maitaa peputari hayurawa penye arama kua judewita ruixawa? 10 Nyãse Pilatu ukuawa puxuwera kuaita saserdutita ruixawaita umaa Jesus, puranga resewara panye miraita umaa ae aintasui, ape aintauxari ae ixupe. 11 Maa aintaumpiaiwa kuaita siyawaita aintauputari arama uyurawa ainta supe Baraba Jesus sui. 12 Asui Pilatu umbeu mukuĩsawa unyee ainta supe:

—Maataa peputari hamunya ixupe kua peserukawaa judewita ruixawa? 13 Asui aintausasemu ixupe:

—Rexari aintaupregari uyari kurusa rese. 14 Asui Pilatu umbeu ainta supe:

—Maa aramataa, maataa puxuwerawa umunya? Maa aintausasemu mukuĩsawa:

—Rexari aintaupregari uyari kurusa rese. 15 Asui Pilatu uputari umusuuri kuaita siyawaita ape uyurawa ainta supe kua Baraba, asui uxari rire aintausurari Jesus uxari aintaurasu ae aintaupregari arama ae kurusa rese.

16 Asui kuaita suraraita aintaurasu ae aintaruixawa ruka kiti sera preturiu, asui aintauyumuatiri muiri ainta amu suraraita. 17 Asui aintaumundeu ixupe ipupekawa pirangawaa, asui aintauyupe ixupe ikurua yuu suiwara, asui aintaumundeu uyari iakanga rese. 18 Asui aintaumukuema ae aintaumbeu ixupe:

—Purangawaa inde judewita ruixawa. 19 Asui aintaunupa ae iakanga rese mirai irumu, asui aintautumuna sese asui aintauwapika aintarinipia irumu ixupe aintaumee arama ixupe arama purangawaa. 20 Asui aintaukasuari rire ae aintauyuka isui kua ipupekawa pirangawaa, asui aintauxari sese iyara. Asui aintaurasu ae uka kiti aintaupregari arama uyari kurusa rese.

21 Asui kua Simão Sireni suiwara usasawa ape uyuiri upe kupixawa sui aintapaya ae kuaita Alexandre Rufu yuiri, asui kuaita suraraita aintawafursari usupiri Jesus ikurusa.

22 Asui aintaurasu ae amu kiti sera Gulguta, yawesawa sera mira akanga kãwera rendawa. 23 Asui aintauputari aintaumee uu kua vinyu uyumunaniwaa pusanga serawaa mirra, maa timaa uputari uu ae. 24 Asui aintaupregari uyari ae kurusa rese, asui aintaumburi surti irupa rese aintaukuawa arama mayetaa aintauyuka aintaupisika ae aintayaweyawe. 25 Asui nuvi ura aintaupregari uyari kurusa rese. 26 Asui iarupi aintaumuyari aintaumpinimawaa maa resewarataa aintauyuká ae, yawe aintaumpinima: "Aete judewita ruixawa." 27 Asui suakite aintaumuyari kurusa rese mukuĩ mundawasuita, yepe ikatusawa sui yepe ikanyuntu sui. 28 Asui aintaumunyana kuaye aintaumpinimawaa yawe kuxima, yawe aintaumpinimawaa, aintaumaa ae kuaye yamaawaa yawe kuaita puxuwerawaita. 29 Asui kuaita usasawawaita ape aintaukasuari ae aintaumukataka aintaakanga ixupe, aintaumbeu ixupe:

—Remaa inde rembeuwaa remburi templu asui musapiri ara rire resupiri yuiri ae. 30 Kuiri reyumukaturu indepawate, rewiye kurusa sui. 31 Yawete yuiri kuaita saserdutita ruixawaita umpinimawaita yuiri aintaukasuari sese aintapawa, aintaunyee:

—Umukaturuana amuita maa timaa upuderi uyumukaturu aepawa. 32 Pexari uwiye kurusa sui simutara kua Kristu Israelitaita ruixawa yamaa arama yaxari arama yuiri yanepia sese, yawete yuiri kuaita aintaumuyariwaita kurusa rese suaki aintaukasuari sese.

33 Asui yandara kurasi pitunawasuana panye kua ara ate musapiri ura. 34 Asui musapiri ura karuka rame Jesus usenui kirimbawa inyenga rupi:

—Elui elui lema sabakitani, yawesawa umbeuwaa, seDeus, seDeus, marantaa rexari ixe? 35 Asui yepeyepe upuamu umaa aintausendu ixupe, aintaunyee:

—Pemaa usenui Elia. 36 Asui yepe aintasuiwara uyana umuyapumi espunja vinagri upe uxari arama mirai rakapi rupi umuyari arama iyuru upe uu arama, asui unyee:

—Yasaru yamaa sã Elia uri umuye ae. 37 Asui Jesus usasemu kirimbawa uxari irumu ianga, 38 Asui kua panu aintauxariwaa usikindawa templu rukena usuruka simutara iwate sui ate supita kiti. 39 Asui kua suraraita kapitão upuamu umaa ixupe umaa irumu Jesus umanu umbeu:

—Supiwa Deus raira kua apigawa. 40 Apete yepeyepe kunyaita upuamuwaita umaa apekatu sui, aintapitera rupite kua Maria Madalena, kua yuiri Maria aintamaya kua Tiagu itainasawa Juze yuiri, asui kuawaa yuiri kua Salume. 41 Aintate kuaita usuwaita Jesus irumu Galileya upere ae aintawajudari ae, apete yuiri siya amuita kunyaita uriwaita Jesus irumu Jeruzalẽ kiti.

42 Asui karuka irumu nyã ara aintaumukaturu festa rupiara sauru rundere. 43 Asui usika kua Juze Arimateia suiwara yepe serakuenawaa purangawaa usikariwaa aintaruixawa arama kua Deus, asui umuturusu ipia usu Pilatu ipiri upurandu irumu Jesus ipira. 44 Asui Pilatu upita iakayemu usendu rame umanuana Jesus, asui usenui suraraita kapitão upurandu usendu sã umanuana Jesus. 45 Asui aintakapitão umbeu rire Pilatu supe umanuana Jesus uentregari Juze supe ipira. 46 Asui usu upiripana yepe fazenda murutingawaa larguwaa, asui umuye ipira kuera upupeka arama irumu, asui uxari ae iwi kuara kiti kua aintaupikuĩwaita piterupi, asui umuyereu urasu yepe ita turusuwaa umusikindawaa arama ita kuara rukena. 47 Asui kua Maria Madalena kuawaa yuiri kua Maria Juze imaya aintaumaa maa kiti uxari ipira kuera.