Marku 5

Umukaturu urikuwaita demuniu

Asui aintauyari lagu ruaxara kiti aintaretama upe kuaita gerazenuita. 2 Aintausemu irumu igara sui uri aintaruaxara yepe apigawa semiteriu sui uriku demuniu ikiawaa ipia upe. 3 Yawewarawate uiku semiteriu upe, tiawa upuderi upukuari ae kurenti irumu. 4 Nyãse siya viaji aintaumprezu ae feru irumu ipi rese asui kurenti irumu yuiri, maa umpena kua feru asui umusaka kua kurenti. Tiawa upuderi umpiaiwaima ae. 5 Uwata pituna rame ara rame yuiri usasasemu semiteriu kiti iwitera rese yuiri, uyumperewa ita irumu. 6 Umaa irumu Jesus apekatu suire uyana upurandu irumu. 7 Usasemu tiapu, unyee:

—Maitaa ixe neirumu inde Jesus taira kua Deus puranga piriwaa panye sui? Hapurandu inde Deus rese tiarama rempurarakari ixe. 8 Nyãse Jesus umbeuwana ixupe:

—Inde demuniu ikiawaa resemu isui kua apigawa. 9 Asui upurandu ae:

—Maataa nerera? Usuaxara ae:

—Serera siyawaa nyãse siyawaita yande. 10 Asui upurandu sasisawa rupite tiarama Jesus umundu aintausu aintaretama sui. 11 Ape siya tayasu aintaumbau iwitera rese. 12 Asui kuaita demuniu ikiawaita aintaupurandu Jesus, aintaunyee:

—Remundu yande yawike arama tayasu ipia upe. 13 Asui Jesus uxari yawe, ape aintausemu kuaita demuniu ikiawaita aintauwike arama tayasu ipia upe asui kuaita tayasu duis mili aintasiyasawa aintauyana tiipiwaa kiti lagu upe aintaumanu arama parana kiti. 14 Asui kuaita usaruwaita tayasu aintauyawawa tetama kiti aintaumbeu panye miraita supe kampu kiti yuiri. Asui aintauri kuaita miraita aintaumaa arama mayetaa.

Tiaintauputari Jesus

15 Asui aintauri aintaumaa Jesus ipiri kua urikuwaa kuera siya demuniu uwapikana umundeuwana irupa ukuawana ara, asui aintausikie. 16 Asui kuaita umaawaita kuera maye kua urikuwaa kuera demuniu aintaumbeu panye miraita supe arama, aintaumbeu yuiri maitaa kuaita tayasu. 17 Asui kuaita miraita aintaupurandu Jesus uyuiri arama aintaretama sui. 18 Asui Jesus uwiye igara kiti, upurandu ae kua urikuwaa kuera demuniu uxari arama usu irumu. 19 Maa Jesus usaisu usu irumu, unyee ixupe arama:

—Resu neruka kiti nerumuaraita ipiri rembeu ainta supe arama maitaa neruixawa umunya inde arama maitaa yuiri pirasua umaa inde arama. 20 Asui usu uyupiru umbeu Dekapuli kiti panye Jesus umunyawaa, asui panye kuaita miraita aintaupita aintaumanduari.

Imãsi uiku Jairu rayera

21 Asui Jesus uyuiri rire igara upe lagu ruaxara sui, aintauyumuatiri ipiri siya miraita lagu rimbiwa upe. 22 Asui uri ipiri yepe usaruwaa sinaguga sera Jairu, asui umaa irumu Jesus uyawika ipi ruaki. 23 Sasisawa rupite upurandu Jesus unyee:

—Serayera tiana maa arama uiku, reyuiriana rexari neipu sese remukaturu ae sikue arama ae. 24 Asui Jesus usu irumu, asui siya miraita usu irumu suaki.

Yepe kunya imãsiwaa

25 Asui yepe kunya upurarawaa duzi akayu tuwi usu isui.26 Turusu upurara umpusangasaraita rese, umburi panye imaaita maa tiaintawajudari ae, arampiri uikuaiwa ae.27 Usenduana Jesus resewara ape uri sakakuera siyawaita aintapiterupi uxari ipu irupa rese.28 Nyãse umbeuwana:

—Haxari rame kuri seipu irupa rese puranga kuri ixe. 29 Asui anyunte upitu tuwi isui asui purangana ae uyusaã ipira mãsi sui. 30 Asui Jesus ukuawa ukuawasawa usemu isui asui uyereu upurandu kuaita siyawaita:

—Awataa upisika serupa rese? 31 Asui umbuewaita unyee ixupe:

—Remaa kua siyawaa miraita aintauyari nerese marantaa rembeu? Awataa upisika ixe? 32 Asui uyereu umaa suaki umaa arama awataa kua upisikawaa ae. 33 Ape kua kunya usikie uriri nyãse ukuawana umukaturuana ae, asui uri suaki uyawika senunde umbeu ixupe supiwa panye usasawawaa. 34 Asui unyee ixupe:

—Serayera, purangana inde rexari resewara nepia serese, resuana puranga, reikuana puranga mãsi sui.

Umbaka Jairu rayera

35 Jesus upurungita rame uiku aintauri ipiri yepeyepe suka sui kua usaruwaa sinaguga aintaunyee ixupe:

—Umanuana nerayera, marantaa remuapatuka kua umbuewaa yande. 36 Maa Jesus tiusendu ainta supe, unyee ixupe kua usaruwaa sinaguga:

—Teresikie rexari nepia puranga. 37 Maa timaa uxari amuita usu irumu, anyunte uxari usu irumu kua Pedru asui Tiagu imute yuiri Juão. 38 Aintausika rame suka kiti kua usaruwaa sinaguga Jesus umaa siya tiapu ainta, yepeyepe uyaxiu yepeyepe usasemu. 39 Uwike rame unyee ainta supe:

—Maitaa peiku tiapu penye, marantaa peyaxiu? Kua kunyatai tiumanu ae anyunte ukiri. 40 Asui aintaupuká sese asui umundu aintausemu ukara kiti panye asui urasu irumu kua kunyatai ipaya imaya yuiri asui kuaita yuiri uriwaita irumu, asui uwike mame uyenuwaa upe. 41 Asui upisika ipu unyee:

—Talita kumi, yawesawa umbeuwaa kunyatai kuiri hamundu repuamu. 42 Aramete upuamu kua kunyatai uwata nyãse urikuana duzi akayu, asui aintausikie aintaumaa rame yawewaa. 43 Asui Jesus umundu tiarama aintaumbeu amuita ukuawa yawewaa rese. Asui umundu aintaumee arama umbau kua kunyatai.