—Reyuiriana. 4 Asui unyee ainta supe arama:

—Maitaa yapuderi yamunya puranga sauru upe u puxuwera yuiri? Maitaa yapuderi yayuká u yamukaturu? Asui aintaukiririntu. 5 Asui puxi Jesus umaa ainta supe, sasiyara ipia nyãse santa aintaumanduariwaa, unyee ixupe arama kua iangaiwarawaa ipu:

—Resupiri neipu! Asui purangana ipu. 6 Asui kuaita farizewita aintausemu ukara kiti aintauyumuatiri erudianuita irumu aintaupurungita arama Jesus rese mayetaa aintauyuká arama ae.

7 Asui Jesus usu aintasui lagu rimbiwa kiti umbuewaita irumu, siyawaita Galileya suiwaraita aintausu sakakuera, siya Judeya suiwaraita yuiri. 8 Aintauri ipiri yuiri siya Jeruzalẽ suiwaraita, Idumeia suiwaraita yuiri, Jurdão ruaxara suiwaraita yuiri, Tiru suiwaraita yuiri, siya Sidum suiwaraita yuiri, aintauri sakakuera aintausendu resewara umunyawaita resewara. 9 Asui umundu umbuewaita umukaturu ixupe arama yepe igara uiku aramawaa ipupe yawaite aintaukamirika ae kuaita miraita siyawaita. 10 Nyãse umukaturuana siya mãsi sui ainta, ape aintauyumuyana siya aintauputari aintauxari aintaipu sese kuaita urikuwaita mãsi. 11 Asui kuaita demuniu ikiawaita aintauwari iwi kiti Jesus runde sui aintaumaa irumu ae, aintaunyee ixupe:

—Deus raira inde. 12 Asui umbeu ainta kirimbawa tiarama aintaumbeu sesewara.

13 Asui usu iwatewaa iwi rese, usenui aintauri arama sakakuera muiri kuaita uputariwaita, asui aintauri sakakuera. 14 Asui uparawaka duzi aintasuiwara aintauiku arama irumu umundu arama aintausu aintaumbue inyenga. 15 Uxari ainta supe arama ukuawasawa aintaumburi arama demuniwita. 16 Asui uxari sera rakapira Pedru kua Simão. 17 Asui Tiagu Zebedeu raira asui Juão itainasawa yuiri umuseruka ainta Buanerges, yawesawa truvão rairaita ainta. 18 Asui uparawaka yuiri Andre, Filipe yuiri, Bartulumeu, Mateu, Tume, Tiagu Alfeu raira, Tadeu, Simão Zelute yuiri. 19 Asui Juda Iskariute yuiri kua umuentregariwaa Jesus suanyanaita supe. Kuaita umpinimawaita aintaumbeu puxi sese 20 Asui uyuiri suka kiti, asui siya miraita aintauyumuatiri akiti, asui tiupuderi umbau umbuewaita irumu. 21 Aintausendu irumu sesewara kuaita sumuaraita aintauri aintauyuka aintasui ae, nyãse aintaunyee sese, tiukuawa ara. 22 Asui kuaita umpinimawaita uriwaita Jeruzalẽ sui aintaunyee:

—Yurupari uiku ipia upe demuniwita ruixawa ukuawasawa irumu umburi demuniwita. 23 Asui Jesus usenui ainta ipiri, unyee ainta supe arama yepe inyenga umbue aramawaa ipupe, unyee:

—Maitaa maa Yurupari upuderi uyumburi aepawa? 24 Aintauyumburi rame maa kuaita miraita yepe tetama upe anyunte aintaupawa kuri. 25 Puxi rame aintauyumaa amu uka puraita anyunte aintaupawa kuri. 26 Yawete yuiri kua Yurupari, umuruanyana rame sumuaraita tikuri upuderi uiku yawewarawate maa ukanyemu kuri panye sumuaraita irumu. 27 Tiawa upuderi uwike kirimbawawaa ruka upe umunda arama iyaraita tirame upukuari kua kirimbawawaa asui upuderi umunda iyara uikuwaa kua uka upe. 28 Supiwa hambeu penye:

—Deus kuri umburi aintasui panye aintapekadu, panye yuiri umbeuwaa puxuwera Deus rese umburi kuri sui ae. 29 Maa kua umbeuwaa inyenga puxuwerawa Espiritu Santu Deus umburi isui ipekadu, maa ipekadu uiku kuri sesewara yawewarawate. 30 Yawe unyee Jesus nyãse aintaumbeu uriku demuniu ikiawaa.

31 Asui aintauri ipiri imaya imuita aintaupuamu ukara kiti, aintaumundu usenui ae. 32 Asui kuaita miraita siyawaita uikuwaita suaki aintaunyee ixupe:

—Remaa nemaya nemuita nerendiraita aintauiku ukara kiti, aintausikari inde. 33 Asui usuaxara ainta:

—Awataa kua semaya? Awataa kuaita semuita? 34 Umaa ainta supe kuaita uwapikawaita suaki unyee:

—Kuaitate semaya semuita yuiri. 35 Muiri kuaita umunyawaita kuaye Deus uputariwaa yawe aintate semu serendira semaya yuiri.