Tutu ni tenda'a Nyavu nu taka ñaxivi xe ka ñejnu'u i Iya Jesús
Nyavu ka'an te data'vi kuu
1
1 Maa da nani Nyavu,
in tee xe inu kuechi nu Iyanyosi y nu Iya Jesucristu kuu da,
te tenda'a da data'vi kuu nu ndi uxi uu jna'a ñaxivi israelita xe ni ka itenuu i nitu'u ñuu ñaxivi,
xe ka ñejnu'u i Iya Jesús.
Nandede da'a o orre xe Iyanyosi koto jnuni ña ya
2 Ñani,
ku'va,
ki kudii ini ni orre xe ka ini ni ndidaa nuu jnundo'o,
chi dia'a ito jnuni ña Iyanyosi,
nuxe ndaa ndijia xe ka ñejnu'u ni ya,
di ñatuu.
3 Te xe ka ini ni,
xe orre xe ka ñunee ni in jnundo'o,
jnundo'o xa'a chindee ña nandede kutexii ga anu o xe chindikun o Iyanyosi.
4 Te orre xe xe ama ni kutexii anu ni,
ki kuendetu ni jnu'u ya te ki kaka ndaa ni ichi ya te ma kumani in xe ndandi'i ni.
5 Ko nuxe nde in ni ndandi'i xenijnuni,
kua'a xe ki kuini ni nandede ki da'a ni,
ki kakan ta'vi ni nu Iyanyosi,
te maa ya taji xenijnuni ya.
Chi jna'a ini ya xe kuña'a ya nadaa xenijnuni ka ndandi'i taka ñaxivi xe ka ikan i nu ya.
6 Te orre xe ki kakan ta'vi ni nu Iyanyosi,
ki kuejnu'u ni ya ni ini ni anu ni,
xe kuu da'a ya taka,
ko ma ki ndaxu'u ni.
Chi xondo ndidita ini i xe kani ini xe ma ndaku ya da'a ya taka xe kuu ini ya,
kuu i mudu ndute mar xe orre xe'e deen tachi,
dia'a xa'a,
dia'a xuka nii ndute.
7 Nuxe ni ka ndidita ini ni,
ma ki kundetu ni xe taji Iyanyosi in xe kakan ni nu ya.
8 Chi vijna tuku ñeni ini ni,
te xujnee ni dama ga ñeni ini ni,
te ñatuu xijnii ni jnu'u ka'an ni.
9 In ñani o xe kunda'vi i,
kuedi xe ñatuu kanuu i nu ñuu ñaxivi,
ko na kudii ini i,
chi kanuu deen ga i nu Iyanyosi.
10 Ko in ñani o xe kuika deen te,
na kudii ini te,
chi xe ama ini te xe maa Iyanyosi ñatuu da'a ya kuenda mediu te,
di takain xe iyo xe kaa te.
Te xee in kivi xe taka ñaxivi kuika ki kuu i,
te naa taka xe ka neva'a i,
diukan nava'a ka dii in ita xuku te ka i'i i.
11 Orre xe inu iya nikandii,
te daa deen ka'ni,
ka xichi ita,
kuedi xe luu deen ni xu ito.
Diukan ni jna'a kuu in ñaxivi kuika orre xe naa i ii taka xe neva'a i.
Nandede ito jnuni ña Iyanyosi
12 Xondo ka ini jnundo'o te ndaku i xe ma kenekava i da'a i xe u'u,
kuini ka'an xe ni ndaku i nu xe u'u te ndani'i ta'vi anu i nde andivi,
nu kuteku i ni kani ni ika ni,
chi dia'a ni ka'an maa Iyanyosi xe ki kukuu taka ñaxivi xe kuini va'a i nu ya.
13 Ko nuxe nde in ñaxivi kuu ini i xe da'a i in xe u'u,
ma ki kani ini i xe Iyanyosi daka'an ña,
chi maa ya ma kivi ma ñuu da'a ya xe u'u,
te ma kivi ma ñuu da'a ya xe ni xe in ñaxivi kani ini i di kuu ini i xe da'a i in xe u'u.
14 Du'va,
maa ñaxivi kuu ini i xe da'a i in xe u'u,
ndoga ni xe ñendetu i nu xe u'u ñunee xeni jnuni i,
te ka da'a i xe u'u.
15 Orre xe kuñe'nu xe u'u ini anu i kenekava i xe da'a i in xika kuechi nu Iyanyosi,
te diukan mani maa xe u'u ñu'ini i xe da'a i te xe u'u xukan ndakueka ña xe kuu i ni kani ni ika nde andeya.
16 Ñani,
ku'va,
ma ki kava nee ni te ma ki danda'vi ni maa ni.
Chi Iyanyosi ñatuu daka'an ña ya xe ki da'a ni xe u'u.
17 Taka nyaa xe va'a veji nde andivi,
maa tata o Iyanyosi taji,
divi ni maa ya ni da'a taka xe jnuu nde andivi:
iya nikandii,
iya xoo,
te dani jna'a taka chodini.
Te ñatuu dama Iyanyosi,
chi ñadi in kuenda'vi kuu ya.
18 Dani jna'a maa ya ni kuu ini xe ndaka'an de'e ña ya,
divi ku ni dane'e ña ya ichi ndaa,
kua'a xe kaku anu o te dia'a ka ndakuu o de'e ki'na ga ya.
Nandede kaka ndaa o ichi Iyanyosi
19 Ñani,
ku'va,
ñama ki ndaduji ni jnu'u ka xu neni do'o ni te ki kani ini ni ki'na ga xukan te ki ka'an ni,
te ku'un kuee ini ni ma ki ndakiti'ni xachi ni.
20 Chi in ñaxivi ndakiti'ni deen ñatuu ndachiñu'u i Iyanyosi.
21 Divi ku,
ki dandoo ni taka xe u'u,
taka xe nee xe ñuu xe ka da'a ni,
te ki kueta'vi ni taka jnu'u ya xe ni kee ini anu ni,
chi jnu'u Iyanyosi kuu dakaku ña.
22 Te ki kuendetu ni jnu'u ya,
ki kunini do'o ni ko dani jna'a ki kuendetu ni chi nuxe ma kuendetu ni kuenda danda'vi ni maa ni.
23 Xondo nini do'o jnu'u ya,
ko ñatuu da'a i nava'a ka'an jnu'u ya,
kuu i mudu in ñaxivi xe ito ndee i nuu i nu in espejo.
24 Ito ndee i maa i,
ko orre ndakoto xata i naa ini i nandede ito i.
25 Ko xondo ñendetu taka jnu'u Iyanyosi xe xunini do'o i na kuvete i chi taka in xe da'a i,
kee va'a ndoga ni xe ñendetu i nu ya.
Chi jnu'u Iyanyosi kuu in ley va'a deen,
xe ma kua'a jnu'u da'a o xika kuechi.
26 Nuxe iyo in ñaxivi xe ñeni ini i xe ñaxivi va'a deen kuu i ko kana ga jnu'u ndeva'a xu'u i kuenda danda'vi i maa i,
te tuu na ni kuenda xe ka'an i xe ñejnu'u i Iyanyosi.
27 Dia'a ka'an tata o Iyanyosi xe kanuu deen xe da'a o xe va'a nuxe ichi ndaa xe ñejnu'u o ya:
Xe na chindee o duchi kuechi xe ñatuu tata ñatuu nana i.
Xe chindee o in ñadi'i xe ni i'i xii ña na chindee o ña orre xe ñunee ña in jnundo'o,
te xe ma da'a o xe u'u xe iyo nu ñuu ñaxivi xa'a.