Uꞌei aloaa feni aꞌamu, mena rawaniꞌa tafiu Gaius, mena una haguio wagii fei faꞌuaia.

2 Mena rawaniꞌa tafiu, una lafulafu ba fei unumu nei rawani ua ma minaa ei gutanamu nei rawani ana aleꞌei ei rawaniꞌa laloo iamu. 3 Unamina niꞌeniꞌe uaa hefiꞌa ei lofu, rona nomai ma uꞌu ba ona oafagugu aꞌa fei faꞌuaia ma ana ona tatalai wagii fei faꞌuaia. 4 Namina apoidiai fei niꞌeniꞌeau ei a guainia ba ei naꞌuu, rona tatalai wagii fei faꞌuaia.

5 Mena rawaniꞌa tafiu, ona oafagugu wagii ena bigiꞌamu aꞌa ei lofu ma ei ana lomi onamina apaꞌifarawaninaa roꞌou. 6 Rona uꞌufanaa feni losuu yeni fei haguamu. Ena ona fatalainaa roꞌou, ina rawani ba oꞌaa fanaa fei honuaa mei Haidaa aꞌa roꞌou. 7 Rona aunutatalai wagii fei Hara ma lomi rona hadumaa roꞌou ei roromaa. 8 Siꞌei, onei taufagutanaa ei ramaꞌa aleꞌei ba oꞌaa bigifipui aꞌa roꞌou wagii fei faꞌuaia.

9 Unadii neꞌi aꞌa fena losuu yena, maꞌuaa Diotrephes, mei i uduginaa hia pafea, lomi na ugainaa fei foraforau. 10 Siꞌei, nabaa a nomai, awe faꞌarewaiaa fei bigiꞌana, fei wiwitoiana haiꞌou. Ma inaꞌaida bigiꞌaa hepalo manumanu namina hafelodiai. Sifei ba paꞌaa lomi naꞌaida fagutanaa ei lofu. Ma hepalodiai, naꞌaida pauninaa ei ramaꞌa, ei ba roꞌaa fagutanaa ei lofu. Ma naꞌaida faꞌitaꞌanaa roꞌodu aꞌa fei losuu.

11 Mena rawaniꞌa tafiu, apuna neneraa tamanu na hafelo, maꞌuaa tamanu na rawani. Mei i bigiꞌaa ei rawaniꞌa, noramiana aꞌa mei Haidaa. Mei i bigiꞌaa ei hafeloꞌa, lomi na u fanunu mei Haidaa.

12 Minaa ei ramaꞌa, rona uꞌugaa fei rawaniꞌaa Demetrius. Ma fei faꞌuaia ana na uniaa ei rawaniꞌana. Haiꞌou ana na uꞌugia ba hia rawaniꞌa ramaꞌa ma hamona aida ba paꞌaa faꞌua ei uꞌugaa haiꞌou.

13 Watauda eni ba a neꞌifanio, maꞌuaa lomi na nunuminia ba a neꞌi. 14 Nunumiau ba lomi i madii ma awii maꞌa yoi ma agua fiwarewarei.

Gutafarawani. Eni tafii agua yeni, rona famafufuoinawii hamuꞌou. Laꞌaa haraa ena tafii agua yena ma famafufuoinaa hememea roꞌou.