Folo yana leta nagona KOLINITA tovetumagana agaidiya
Hida Kolinita tovetumagana yadi leta nagona Folo Efeso againe gimiyami tu giꞌetoladina. Kolinita melala kikaiwabuna Akaiya higa Gilika ana fafaliya. MiKolinita yoꞌo tulidiyao kalivai-dina hivewagadi miGilika, tu kadu miYuda tufoidi medede againe himiyami. Ada melalai-nadi againe moyaꞌaidi hivelokoloko kadu hivetonuwahuya, tu kilumina moyaꞌaidi hihawadavadavadi ada udo tulina tulina hikiveꞌavina.
Boi Folo yana lumamala-waliliuga anavelu againe gina Kolinita againe Venuwaꞌata Yamumuna gimidilumamalena, ada yana vehawala vaikohi eitini ginunauwena. (Afositolo 18:1-17) Muliya Afolosi gina givehawaledi. Muliya-moꞌane Folo toꞌekelesiya valeyadi koyona ginogalina, ada badi yana leta hiꞌetoladina be yadi toliluvaluva hiseyemaunena. Hida miKolinita yadi leta nagona againe Folo yadi dewa faꞌina gidakeyedi kadu yadi toliluvaluva gifatana. Leta dobona hidede amine.
Lusiule. 1:1-9
Vekwageya veꞌalaudaka toꞌekelesiya agaidiya faꞌina. 1:10–4:21
Dewa udoꞌudona toꞌekelesiya agaidiya faꞌina. 5:1–6:20
Nagi ana nuwanuwa faꞌina 7:1-40
Kilumina o balauma ana vetumagana kadu Keliso ana vetumagana keke kanaveꞌatutamoꞌaini. 8:1–11:1
Toꞌekelesiya tafalolo faꞌina hivagaꞌauta againe gava dewa gava dewa adi lauboda ma. 11:2–14:40
Keliso yana mididi-havagi kadu aimo tovetumagana yadi mididi-havagi faꞌina. 15:1-58
Folo yana vevai yana lukafoi yana lauꞌage ma. 16:1-24