Kapitã keruhũ a'e. Hom ok ta pe a'e ixo. Upa katu te homa awa tama'e kapitã keruhũ a'e. Jundéu awa ta ke homa awa tama'e sonda ta muputu'u katu tĩ. A'erehe Sesa rehe jundéu awa ta hendu katu ta me'ẽ te'e tĩ.

Homa awa tama'e kapitã keruhũ. Sesa a'e. Jundéu awa ta hendu katu ta me'ẽ te'e ehe tĩ.

Sesa mu'am ame'ẽ ta ke a'eta. Amõ amõ ywy pe kapitã ta ke Sesa mu'am. A'erehe ame'ẽ ywy pe har ta kapitã ta rehe hendu katu ta me'ẽ te'e tĩ. Jundéu awa tama'e ywy pe heta kapitã ta ixo. Jundéi ywy pe Pon Pirat kapitã a'e. Ngariréi ywy pe Ero kapitã a'e.

Ima'e kapitã ta rehe jundéu awa ta hendu katu tĩ. A'erehe jundéu awa tama'e kapitã ta ixo tĩ. Ame'ẽ ta rehe jundéu awa ta hendu katu tĩ.

Jundéu awa tama'e kapitã keruhũ aja jundéu awa ta ukwa. Tupãma'e miasu ke a'e aja jundéu awa ta ukwa tĩ. Upa jundéu awa ta hendu katu ehe. Peteĩ warahy 'ar rahã, peteĩhar jõ kapy katu te ame'ẽ pe pa'i keruhũ ixe oho. A'e jõ a'ep ixe katu oho. Arahã hymba ruwy ke a'e raho. Ame'ẽ namõ jundéu awa ta py'a ke juhyk, aja ukwa. Aja Moise je'ẽha rehe hendu katu aja ukwa.

Jundéu awa tama'e kapitã ta ke a'eta. Pa'i keruhũ wyr koty te we je'ẽha te reko.

Jundéu awa tama'e kapitã ta ke a'eta tĩ. Pa'i keruhũ je'ẽha ke a'eta ma'ema'e katu. Tupãma'e miasu ta ke a'eta aja jundéu awa ta ukwa tĩ. Tupã rehe ngã jumu'eha renda keruhũ pe a'eta paraky ixo. Hymba ke ngã werur rahã, ame'ẽ ke a'eta hapy. Ame'ẽja Tupã rehe ngã ipy'a moĩ moĩ aja jundéu awa ta ukwa.

A'eta jundéu awa tama'e kapitã ta aja saka tĩ. A'erehe a'eta je'ẽha te reko tĩ. Moise je'ẽha rehe a'eta hendu katu te. Amõ we tĩ. Upa ymanihar hamũi ta mu'e ame'ẽ ke rehe a'eta hendu katu tĩ. Tupã je'ẽha rahoha ta pete'e ixo aja a'eta ukwa katu. Yman rahã, manõ ame'ẽ ta ke Tupã mukwera katu ta muhem aja a'eta ukwa katu tĩ.

Tupã rehe har jetehar te Jesu mu'e rahã, amõ koty a'e mu'e aja parise ta ukwaha, a'erehe a'e ke a'eta putar ym. A'erehe Jesu ruwajan ta aja a'eta muruwak.

A'eta jundéu awa tama'e kapitã ta aja tĩ. A'erehe a'eta je'ẽha te reko tĩ. Moise je'ẽha rehe a'eta hendu katu te. Anĩ. Parise ta aja ym a'eta. Ymanihar hamũi ta mu'e ame'ẽ ke rehe a'eta hendu ym. Tupã je'ẽha rehe jõ a'eta hendu katu, aja a'eta pandu naĩ tĩ. Tupã je'ẽha rahoha ta nixói te aja a'eta ukwa tĩ. Manõ ame'ẽ ta kwera ym te ta aja ukwa tĩ.

Tupã rehe har jetehar te Jesu mu'e rahã, amõ koty a'e mu'e aja sanduse ta ukwaha, a'erehe a'e ke a'eta putar ym tĩ. A'erehe Jesu ruwajan ta aja a'eta muruwak tĩ.

Moise je'ẽha rehe hendu katu ame'ẽ ta ke a'eta. Moise je'ẽha ke a'eta mu'e tĩ. A'erehe amõ ta Moise je'ẽha rehe hendu ym aja a'eta ukwa rahã, ame'ẽ ta ke a'eta putar ym tĩ. Mupyrara tĩ.

A'erehe Tupã rehe har jetehar te Jesu mu'e rahã, Moise mujekwa aja a'e mu'e ym aja Moise je'ẽha mu'e ame'ẽ ta ukwaha naĩ, a'erehe Jesu ke a'eta putar ym tĩ. A'erehe Jesu ruwajan ta aja a'eta muruwak tĩ.

Ame'ẽ ta rehe jundéu awa ta hendu katu tĩ.

Jundéu awa ta ukwa, aja Tupã rehe har a'eta mu'e mu'e tĩ. A'erehe Tupã rehe har jetehar te Jesu mu'e rahã, amõ koty a'e mu'e, aja tamũi ta ukwaha. A'erehe Jesu ruwajan ta aja a'eta muruwak tĩ.

Jy'ariha renda tumeme pehĩ. A'ep Moise je'ẽha rehe jundéu awa ta hendu oho. Tupã je'ẽha rehe hendu oho tĩ. Jesu kotyhar ta jy'ar tĩ. Tupã je'ẽha rehe hendu oho tĩ. Jesu rehe har hendu oho tĩ.

Tupã rehe ipy'a ke jundéu awa ta moĩ moĩ rahã, Tupã rehe ngã jumu'eha renda keruhũ pe oho. Peteĩhar jõ Tupã rehe ngã jumu'eha renda keruhũ ihĩ. Jerusarẽ ok ta pe ame'ẽ ihĩ. A'ep hymba ke jundéu awa ta raho tĩ. Ame'ẽ ke pa'i ta jukwa. Aja ngã ma'e ka'u te'eha ma'ema'eha ke rehe muhepy, aja jundéu awa ta ukwa. Tupã rehe ngã jumu'eha renda keruhũ pe heta kapy ihĩ. Ame'ẽ ta ngi har peteĩ kapy: “Katu ame'ẽ ke” aja jundéu awa ta ukwa. Amõ kapy: “Katu te ame'ẽ ke” aja a'eta ukwa tĩ. A'ep Tupã ixo aja ukwa ngã. Ame'ẽ kapy pe pa'i keruhũ jõ ixe oho.

Moise je'ẽha rehe jundéu awa ta hendu tar katu rahã, jundéu awa tama'e jy'ariha renda pe oho. A'ep Moise je'ẽha rehe hendu oho. A'ep Moise je'ẽha mujekwa aja Tupã rehe jundéu awa ta ipy'a moĩ moĩ tĩ. Heta jundéu awa tama'e jy'ariha renda ihĩ. Ok ta pame katu te ihĩ.

Jesu kotyhar ta jy'ar rahã, amõ Jesu rehe jurujar katu ame'ẽ ta rok pe jy'ar. Tupã je'ẽha rehe a'eta hendu oho. Jesu rehe har amõ ta mu'e ame'ẽ ke rehe a'eta hendu oho tĩ.

Amõ Jesu kotyhar ta rok pe jy'ar ym rahã, Jesu kotyhar tama'e jy'ariha renda pe a'eta jy'ar oho. Tupã je'ẽha rehe a'eta hendu oho tĩ. Jesu rehe har amõ ta mu'e ame'ẽ ke rehe a'eta hendu oho tĩ.

Mokõi awa ta ke jundéu awa ta ukwa. Jundéu awa ta pete'e ixo. Upa katu te amõ ta jundéu awa ta aja ym ame'ẽ ta ke aja a'eta ukwa. Jundéu awa ta amõ her pehĩ tĩ: “Emberéu awa ta” aja her tĩ.

Ngere je'ẽha pandu ame'ẽ ta pete'e ixo tĩ.

Homa awa ta pete'e ixo tĩ.

Aja upa katu te amõ ta jundéu awa ta aja ym ame'ẽ ta ke.

Amõ amõ ywy ngi tamatarer ke Sesa pyhyk. A'ep a'e ixo ym, a'erehe tamatarer matyr ame'ẽ ta ke a'e mu'am. Ame'ẽ ta riki tamatarer matyr, pe, mondo ipe. A'erehe ame'ẽ ta ke ywy pe har ta putar ym. Jundéu awa tama'e ywy pe matyr ame'ẽ ta ixo tĩ. Jundéu awa ta ke ame'ẽ ta. Ame'ẽ ta homa awa tama'e miasu ta ke aja jundéu awa ta ukwa. A'erehe ame'ẽ ta rehe aja te'eha jundéu awa ta parahy. Putar ym tĩ. Ame'ẽ ta jaxer te aja jundéu awa ta ukwa tĩ. Sesa pandu ame'ẽ 'ar koty te we te'eha rupi tamatarer ke matyr. A'erehe ame'ẽ ta jaxer te aja ukwa. Ma'e mukanĩha ta ke a'eta aja jundéu awa ta ukwa tĩ.

Jundéu awa tama'e ywy ngi homa awa tama'e sonda ta ke a'eta muhem tar katu. Homa awa ta riki huwajan ta ke aja a'eta ukwa. A'erehe muhem tar katu. Upa muhem rahã, jundéu awa ta ngi har amõ kapitã keruhũ ke mu'am ta, aja a'eta putar katu tĩ.

Amõ namõ jumu'e ixo ame'ẽ ta ke a'eta. Heta Jesu namõ jumu'e ixo ame'ẽ ta pete'e ixo. Ame'ẽ ta ngi har awa py mokõi ta riki Jesu rake ixo. Juã mujahukiha ixo rahã, inamõ jumu'e ixo ame'ẽ ta pete'e ixo tĩ.

Tupã rehe har pandu pandu oho ame'ẽ ta ke Jesu mondo. Kuja, 72 hetaha ta ke Jesu mondo [Ruk 10.1 rehe esarahã!] Ame'ẽ ta ngi har awa py mokõi sawa'e ta rehe Jesu katu te usak ame'ẽ ta ke. [Matéu 10.1 rehe esarahã! Ruk 6.12-13 rehe esak tĩ.] A'engi Páu aja tĩ. Jesu mondo ame'ẽ ke a'e tĩ. [At 9.15 rehe esarahã! At 22.21 rehe esak tĩ.] Amõ Jesu mondo ame'ẽ ta pete'e ixo tĩ. [Hom 16.7 rehe esarahã.]

Yman Jesu nixói rahã, Tupã je'ẽha pandu ame'ẽ ta pete'e ixo. Tupã mujekwa ame'ẽ ke a'eta pandu pandu ngã pe. Ywa pe Jesu jywyr. A'engi Tupã je'ẽha ke pandu pandu ame'ẽ ta pete'e ixo tĩ. Tupã mujekwa ame'ẽ ke pandu pandu tĩ. Ame'ẽ ta Tupã je'ẽha pandu ame'ẽ ta ke tĩ.

Jesu rehe jurujar katu ame'ẽ ta ke a'eta.

Tupã rehe ipy'a moĩ moĩ ame'ẽ ta ke a'eta. Hendu katu ehe tĩ. “Jesu kotyhar ta ke” aja amõ her tĩ. [Juã 17.10 rehe esarahã.]

Ma'e ahy ixo ame'ẽ ta ke a'eta. Putar ym te ame'ẽ ta ke a'eta aja jundéu awa ta ukwa. Pereran ma'e u'u hũ ame'ẽ ta rake uhyk ym te ta jundéu awa ta. A'erehe ame'ẽ ta rehe ipo ke Jesu mujar rahã: “Mã! Ipo mujar ehe!” aja amõ ta ukwa.

Eji ywy pe jundéu awa ta ixo rahã, te'e paraky ame'ẽ ta aja ixo. Pyrara hũ ixo tĩ. Pe, Eji ywy ngi jundéu awa ta ke Tupã muhem. Arahã jepy ta ke Tupã je'ẽha rahoha jukwa. Eji ywy pe har ta jepy ta ke jõ jukwa katu te. Jundéu awa ta jepy ta ke jukwa ym te. Ame'ẽ ta rupi asa oho aja jundéu awa ta ukwa. Ame'ẽ rehe: “Pasuko” aja her moĩ. A'erehe: “Pasuko” aja pandu rahã: “Asa oho” aja mujekwa. Peteĩ warahy 'ar aha oho rahã, peteĩhar jõ ame'ẽ rehe har jundéu awa ta ukwa ukwa ixo. Huryha mujã tĩ. Priméi ru abril rahã pame katu te Pasuko rehe har ukwa ukwa ixo.