Ma̱giriꞌi na ama a̱ yi
14
A̱vu me ene Ma̱giriꞌi mishin a Masasan ma̱ Sihiyona.a
Ama ukpakukupa ukpaku nu ukpakukupa amunga nu ukpakukupa una̱shi (144,000) a̱ da̱na̱ ta̱ mishin oɓolo na̱ a̱yi.
Ele ɗa aza a na a ɗanai e icin i le ala a̱ Ma̱giriꞌi na̱ Dada va̱ yi.
2 Mu uwwa ta̱ nanza a adanshi ɗe zuva.
Uɗyo wa̱ yi u rotso ta̱ ilama i mini ma̱ a̱bunda̱ ma na mo ocusho ko tsa tsata tsu ucira.
U shon ta̱ gashi mesun ma ama a̱ a̱bunda̱ a waꞌasa ikumburu.
3 Ele ɗa ama ukpakukupa ukpaku nu ukpakukupa amunga nu ukpakukupa una̱shi (144,000) a̱ ta̱ mishin zuzu na̱ nda̱na̱ta̱ n tsugono,
oɓolo ni ili i wuma i na̱shi,
na azagbain.
A̱ da̱na̱ ta̱ a canasa ishipa i saꞌavu,
za na babu za na aa gura rito yi,
she ele goon.
Ele ɗa aza a na a tsupayi o uta̱a̱ nle a̱tsuma̱ a ama o uvaɗi suru.
4 Ele ɗa ama a na a lyawai aciyele cece a na a ꞌyuwain a yuwan tsipere,
adama o ndolo a ɗa a̱ ri cece.
O toni ta̱ Ma̱giriꞌi uba̱ta̱ u na u tyoyi suru.
A tsula le ta̱ a̱tsuma̱ a ama reve a ca le tsa makuɗa ma̱ kucci vu ufaru,
reve a ca A̱sula̱ na̱ Ma̱giriꞌiꞌi.
5 A tsu yuwan epen shi,
waru a̱ ri nu unusu shi.
Nlingata ma̱ A̱sula̱ n taꞌatsu
6 A̱vu me enishe malingata ma̱ A̱sula̱ ma ꞌyawan zuva lon.
U ciga ta̱ u damma ikaka ya Alabari a Saꞌani a na a̱ ri n koto shi a̱ tyo uba̱ta̱ wa aza a na a̱ ri pe nden a̱tsuma̱ o uvaɗi,
ele ɗa iɗa,
na̱ gundo,
ne elentsu,
oɓolo na akapi a ama a na buwai.
7 Reve u damma na̱ a̱ba̱jini o uɗyo,
“I ciga i ꞌyuwan i ca A̱sula̱ tsugbain a̱vu i yuwan adanshi a tsugbain tsa̱ yi.
Adama a na mantsa ma yuwan ta̱ a na wee geꞌeto ama o uvaɗi suru.
I ca yi tsugbain,
adama a na a̱yi ɗa u yuwain uvaɗi na̱ zuva,
mala ne esu a̱ mini a na o utusa̱ e iɗa.”
8 Reve malingata ma̱ A̱sula̱ me ire ma ꞌyawan zuva cine za vu ufaru yuwain a̱vu u reme adansa,
“A̱ba̱jini a̱ lyuci a Babila a̱ riya̱ ta̱!
A̱yi lyuci gbain ɗa za na tsipere tsa̱ yi tsa zuwai iɗa suru a yuwain ili yi idaba.
U yuwan ta̱ gashi wo oꞌwoto le ta̱ ososowi na̱ tsipere tsa̱ yi,
ili i nda i ta zuwa A̱sula̱ a ca le a̱tsuma̱lima̱.”
9-10 A̱vu waru malingata ma̱ A̱sula̱ ma taꞌatsu u toni le,
a saalasa,
“Ama a na a yuwayin a̱a̱dodo o ndolo a̱ga̱nda̱ suru a̱vu waru a yuwaan a̱a̱ma̱li a̱ yi a̱ga̱nda̱,
a̱ ta̱ nu urotsu wa̱ a̱a̱dodo e icin i le ko e ekere e le.
A̱sula̱ o to sowoto le masayan ma inabi mo oforo ma̱ yi.
Masayan ma nda a̱ sula̱ yi na̱ mini shi,
waru A̱sula̱ na aciya̱yi a ɗa a̱ tsuyin oforo a̱ yi a̱tsuma̱ o mokoto mo upan mo ndolo.
Cuꞌun va ama o ndolo o to sowo a̱tsuma̱lima̱ na akina a̱ ma̱kula̱ a̱ farinwuta lon a̱ ma̱ka̱ka̱n ma nlingata ma̱ A̱sula̱ ma akiza oɓolo na̱ Ma̱giriꞌiꞌi.
11 Akina a na a̱a̱ kula̱to le u to oꞌwo babu ukotu.
Ama a na a yuwayin a̱a̱dodo o ndolo a̱ga̱nda̱ oɓolo na̱ a̱a̱ma̱li a̱ yi waru a̱ ri nu urotsu wa ala a̱ yi a̱ lipu le,
a̱tsuma̱lima̱ o to oɓolo ne ele ayin nu urana.”
12 Ili i nda suru u ta dansaa a̱za̱ e Itoni a yuwan ankuri a̱tsuma̱ a̱ nden n le.
Ama a nda ele ɗa aza a na a yuwain tsutoni na̱ wila̱ wa̱ A̱sula̱,
a̱vu waru o toni Yesu na amayun.
13 A̱vu mu uwwa uɗyo zuva adansa,
“Ɗana ili i nda:
Aza abaꞌun a ɗa aza a na a̱ kuwa̱i diga gogo a̱ ꞌya̱wa̱ adama e Itoni yi Zagbain!”
Reve Ruhu usu,
“Ee,
a̱ te ivuwan a̱tsuma̱ a linga va̱ a̱tsuma̱lima̱ a na a yuwusan,
linga saꞌani le na a yuwusain to toni le.”
Ugasa wu uvaɗi
14 Ɗaɗa n ka̱lyuwa̱i,
a̱vu me ene eleshe a̱ uri.
Ili i na i rotsoi vuma da̱na̱ ta̱ nden ɗe e elesheꞌe.
U ta̱ no ookokolo a zinariya a aaci a̱ yi waru u ta̱ nu ugonu wa alya uguzu o ukere wa̱ yi.
15 A̱vu waru malingata ma̱ A̱sula̱ mo ro mo uta̱ a̱tsuma̱ a̱ A̱a̱ꞌisamapaɗa,
a̱vu u saalaa vuma na ri nden e eleshe na̱ a̱ba̱jini o uɗyo,
“Fara ikani nu ugonu wa̱ wu.
Ili i na i lobonoi a kana a̱tsuma̱ o uvaɗi e ina ta̱ ɗe,
gogo ɗa mantsa ma na wu ntsayi o goloɓo le.”
16 A̱vu za na ri nden e elesheꞌe u rono ugonu wa̱ yi,
ɗaɗa gba u kanai ca̱ꞌa̱n vu uvaɗi.
17 A̱vu me enishe malingata ma̱ A̱sula̱ me ire za na uta̱i ɗe a̱ A̱a̱ꞌisamapaɗa a zuva,
waru u da̱na̱ ta̱ na̱ matsun ma alya o ukere wa̱ yi.
18 A̱vu waru malingata ma̱ A̱sula̱ mo ro ma taꞌatsu,
za na ri nu ucira e ekere a akina,
wu uta̱ ɗe a masaꞌa.
A̱yi malingata ma̱ A̱sula̱ ma nda u ɗe ta̱ malingata ma̱ A̱sula̱ me ire adansa,
“Tara matsun ma wali ma̱ wu a̱vu vu paɗa ataci a alya o uvaɗi adama a na limatan va̱ yi e ina ta̱.”
19 Ɗaɗa gba malingata ma̱ A̱sula̱ ma̱ vuta̱la̱i matsun ma̱ yi a̱tsuma̱ o uvaɗi.
Ɗaɗa u ɓolotoi limatan na ri pe a̱tsuma̱ o uvaɗi a̱ tyo uba̱ta̱ u na o kpoko nle.
Ne ɗa gba A̱sula̱ o tsu kpoko a̱za̱ e iwuya na̱ waa casu le oforo.
20 O kpoko ta̱ muwun ma ataciꞌi a alanga a̱ lyuci gbain,
a̱vu mpasa mu uta̱ uba̱ta̱ u na o kpoko nle gashi uɗolu u na u ri imili ukpakure (200) ugaꞌan na̱ a̱ruꞌun ana uton.