Ikaka a̱ tyo Afisu
2
Reve u damma mu,
“Ɗana mepepelime ma nda a̱ tyo a malingata ma̱ A̱sula̱ ma̱ a̱a̱ꞌisa̱ a̱ a̱za̱ e Itoni a̱ lyuci va Afisu.
Za na guza̱i italyoꞌo i cindere o ukere usaꞌani wa̱ yiꞌi,
za na waru ri a mmalu e memere ma wisawatan wi ifitila i cindere,
u ta̱ lyungusa̱a̱ wu ikaka i nda:
2 N reve ta̱ ili i na vaa yuwusan suru,
me ene ta̱ ulinga wa amayun na̱ makaɓa ma asuvu ma̱ a̱bunda̱ ma̱ wu.
N reve ta̱ a na vu ꞌyuwain ama e iwuya.
Vu lyungwa̱ ta̱ aza a na a dammai ele ajiya a ɗa,
agba na amayun ne ɗa shi,
reve vu cina le a̱za̱ e epen a ɗa.
3 Vu yuwan ta̱ ankuri vu kaɓa asuvu ni iɓongi adama a̱ va̱,
waru okolo a̱ wu a̱ tu ukaɓu kuci a̱tsuma̱ e itoni i va̱.
4 “Agba n ta ɓara wu adama e ili i ro.
Vu buwa e icigi ya̱ a̱za̱ a̱ wu a̱za̱ e Itoni cine vu yuwain ana vu fara usu numu shi.
5 She vi icina ununa vu riya̱i a̱tsuma̱ o unusu wan!
Vu vadala reve vu lyawa mayan mo unusu,
reve vu yuwan ununa vu yuwain ana vu fara usu numu.
Na̱ vu lyuwa elime nu unusu,
n ta̱ ta̱wa̱ n ca wu oforo n tawa wisawatan u fitila wa̱ wu uba̱ta̱ u na u ri.
6 Amma n ta cuwa wu adama e ili i saꞌani i na vaa yuwusan.
Vu ꞌyuwan ta̱ ili i na otoni a Nikolaa aa yuwusan,
ununa a̱mu fo n ꞌyuwain ili i na aa yuwusan.
7 “Za na ri na atsuvu,
wu uwwa ili i na Ruhu aa dansaa a̱ꞌisa̱ a̱ a̱za̱ e Itoni!
N ta lyawa za na biti lyuwai aci u lyuwa muwun mu uɗanga n na n tsu ca wuma,
za na ri a̱tsuma̱ o uꞌwa u wivuwun zuva.”
Ikaka a̱ tyo Simirina
8 Reve u damma mu,
“Ɗana mepepelime ma nda a̱ tyo a malingata ma̱ A̱sula̱ ma̱ a̱a̱ꞌisa̱ a̱ a̱za̱ e Itoni a̱ lyuci va Simirina.
Za na a̱yi ɗa Ufaru waru a̱yi ɗa Ukosu,
za na kuwa̱i agba wo oꞌwiso ta̱ wuma,
a̱yi ɗa wa̱a̱ lyungusa̱a̱ wu ni ikaka i nda:
9 N reve ta̱ na̱ a̱tsuma̱lima̱ a̱ wu nu ulambu wa̱ wu,
agba vu ta̱ nu utsuru!
N reve ta̱ ni ili i babu ulobonu i na ama o ro a dansa a aci a̱ wu.
A ta dansa ama a̱ A̱sula̱ a ɗa,
agba ne ɗa a̱ ri shi na amayun.
Oɓolo a ama a ɗa a na a̱ ri aza a Male.
10 She vu uwwa wovon wan,
na̱ vu yuwan majiyan ma̱ a̱tsuma̱lima̱ ma na vu ri azama vu sowo.
N ta dansaa wu,
Mekerenkesu ma ta zuwa le a̱ lyungwa̱ wu a zuwa ozo o ro a̱ ɗu o uꞌwa wa ali,
waru o to ɓongi wu hali rana kupa.
Vu guza̱ mejege,
ko nu u shi wo oꞌwo a̱ to una wu,
n ta ca wu wuma u babu ukotu vadamma ookokolo wo oꞌwo wu iliyinkapa adama a na vu lyuwai aci.
11 “Za na ri na atsuvu,
wu uwwa ili i na Ruhu aa dansaa a̱ꞌisa̱ a̱ a̱za̱ e Itoni!
Za na biti lyuwai aci e iwuya,
woo sowo a̱tsuma̱lima̱ o ukwa̱ we ire shi.”
Ikaka a̱ tyo Birigamu
12 Reve u damma mu,
“Ɗana mepepelime ma nda a̱ tyo a malingata ma̱ A̱sula̱ ma̱ a̱a̱ꞌisa̱ a̱ a̱za̱ e Itoni a̱ lyuci va Birigamu.b
Za na ri na̱ matsun me peꞌeni ma na e tewein ma̱ na̱ re va̱ yi,
a̱yi ɗa za na a̱ lyungusa̱a̱ wu ni ikaka i nda:
13 N reve ta̱ vu ta̱ nden a̱tsuma̱ a̱ lyuci na Male ma̱ ri o tsugono.
A̱vu za vi Itoni va amayun a ɗa,
waru vu kuɗa̱ a̱ usu mu shi,
ko keꞌen.
Vu usu ta̱ a mantsa ma na a zuwai o unai Antiba adama e isaꞌani ya̱ yi a̱ lyuci ɗu,
uba̱ta̱ u na Male ma̱ ri o tsugono.
Antiba rocosu ta̱ ama a na a̱yi za vi Itoni va amayun a̱ va̱ a ɗa a adanshi ni ili i na u yuwusain.
14 “Agba n ꞌyuwan n ciga m ɓara wu adama e ili i ro.
Ozo o ro a̱tsuma̱ a̱ ɗu o to tono uritosu wa Balam,
za na rocoyi Balak cine waa zuwa aza a Israꞌila a yuwan unusu.
c Balam gbagba le ta̱ a tama inama i na ama a paɗayi a̱ma̱li a na a yuwusaan a̱ga̱nda̱.
Waru u zuwa le ta̱ a yuwan tsipere.
15 Ununa aza a Israꞌila a yuwain unusu,
ne ɗa waru ozo o ro a̱ ɗu a yuwain unusu ana o toniyi uritosu wo otoni a Nikola.
16 Gogo vu vadala vu lyawa nusu va̱ wu!
Na̱ vu yuwan ne shi,
aa jima shi n ta̱ ta̱wa̱ wu reve n yuwan nla̱ngi na ama o ndolo na̱ matsun me peꞌeni ma na moo utusa̱ o una̱ u va̱.
17 “Za na ri na atsuvu,
wu uwwa ili i na Ruhu aa dansaa a̱ꞌisa̱ a̱ a̱za̱ e Itoni!
N ta ca za na biti lyuwai aci a̱tsuma̱ a mana na o sokoi.d
Waru n ta ca za suru aatali a̱ uri a na a ɗanai aala a saꞌavu ɗe.
Za na ushiyi aatali a nda a ɗa goon ee reve aala a nda.”
Ikaka a̱ tyo Tayatira
18 Reve u damma mu,
“Ɗana mepepelime ma nda a̱ tyo a malingata ma̱ A̱sula̱ ma̱ a̱a̱ꞌisa̱ a̱ a̱za̱ e Itoni a̱ lyuci va Tayatira.
Mawun ma̱ A̱sula̱,
za na esu a̱ yi e ikanasa tse elentsu a akina waru za na ana a̱ yi a̱ ri a madala tsu rumushili na o gboroi ɗe,
a̱yi ɗa za na lyunguwa̱ nuwu ni ikaka i nda:
19 N reve ta̱ ili suru i na vaa yuwusan.
N reve ta̱ a na i cigalai waru a̱ɗu otoni a amayun a̱ va̱ a ɗa.
N reve ta̱ cine i kambulai,
waru n reve ta̱ a na vu kaɓai asuvu na ankuri.
N reve ta̱ a na gogo vu ta yuwusan upasu na̱ cine vu yuwusain ana vo oꞌwoi za vi Itoni va̱ cacawu.
20 “Agba n ciga n ꞌyuwan m ɓara wu adama e ili i ro.
Vu geshe ka ndolo Yezebe shi,
za na a yuwusan epen a na a̱yi vumava̱sula̱ ɗa.
Ana u ri o uritosu a̱ pususa̱n agbashi a̱ va̱ ana,
adama a yuwan tsipere waru a lyuwusa ilyalya i na a cayi a̱ma̱li.
21 N ca yi ta̱ mantsa u vadala u lyawa nusu va̱ yi,
agba a̱vu u ꞌyuwan a lyawa tsushakala.
22 Adama o ndolo,
n ta zuwa wo oꞌwo ubanakun.
N ta zuwa aza a na a yuwusan tsipere na̱ a̱yi o sowo a̱tsuma̱lima̱ lon.
N ta yuwan ili i nda gogo shede na a vadala a lyawa mayan me iwuya i na aa yuwusan.
23 N to una otoni a̱ yi.
Reve a̱ꞌisa̱ a̱ a̱za̱ e Itoni suru e reve a na n revei majiyan ma za suru waru ni ili i na a cigai suru.
N ta ca za suru a̱tsuma̱ e le a̱tsuma̱lima̱ cine unusu wa̱ yi u ri.
24 Ozo o ro a̱ ɗu a̱tsuma̱ a Tayatira o toni uritosu wa̱ yi shi.
Koto i rito ili i na otoni a̱ yi e ɗeyi ‘Ili yu usokowu i gbain i Male’ shi.
N ta̱ ni ili i ta̱ i na maa damma ɗu:
25 I lyuwa elime ni itoni i va̱ na amayun hali she na̱ n ka̱mba̱.
26-28 “N ta lyawa za na lyuwai aci u da̱na̱ na̱ cuꞌun vu ucira u na waa yuwan tsugono tsa na Dada va̱ ca numu.
N ta yuwaan ne za na lyuwai elime na̱ mayan me ili i na n damma niyi u yuwan,
hali a̱ tyo mantsa mo ukosu wu uvaɗi.
N ta ca yi ucira u na waa yuwan tsugono tsu uvaɗi suru.
Nu u yuwan tsugono tsa nda,
u ta̱ da̱na̱ usuɗuwu,
waru u ta kpasuꞌwa le reve o ɓoso le miri-miri ununa ama o tsu ɓoso mpondo mo oloꞌo.
Waru n ta ca yi talyoꞌo na tsi ikana na̱ wasasa,e
iroci yu ulyuwu wa aci wa̱ yi.
29 Za na ri na atsuvu,
wu uwwa ili i na Ruhu aa dansaa a̱ꞌisa̱ a̱ a̱za̱ e Itoni!”