Akuci a̱ wila̱ adama a̱ a̱ga̱nda̱
9
Akucunu o ufaru a na A̱sula̱ a yuwayin aza a Israꞌila,
u damma ta̱ ama cine aa yuwaan yi a̱ga̱nda̱ waru u damma le ta̱ cine aa yuwan Oogodo o Ucuwusan,
uba̱ta̱ u na aa yuwan a̱ga̱nda̱.
2 A̱ shuwa̱ ta̱ oogodo a na a yuwain asula e re.
A aasula o ufaru pe ɗa wisawatan u fitila u ri,
ni irika,
no opopofu a na a cayi A̱sula̱.
Reve e ɗe aasula a nda Upasu wa Akiza.
3 Waru umuna u da̱na̱ ta̱ pe u na u neꞌeshein asula e reꞌe.
Reve e ɗe aasula e ire Upasu u na u Laꞌai Akiza.
4 Pe ɗa masaꞌa ma̱ da̱na̱i,
za na a palai na̱ zinariya,
uba̱ta̱ u na a̱ tsu kula̱to ili i ma̱guru.
Waru pe ɗa a zuwai Akpati a Nzuwulai a akpata,
za na a palai na̱ zinariya e eɓele suru.
Ili i taꞌatsu i da̱na̱ ta̱ pe a̱tsuma̱ a Akpatiꞌi:
Za vu ufaru,
upondo u zinariya u na o shitoyin na̱ mana.
Za ve ire,
aaɗanga a Haruna za na topoi.
Za va taꞌatsu,
atali o usheꞌun aza a na a̱ da̱na̱i na̱ Wila̱ Kupa ɗe uɗanu.
5 Zuva va Aakpatiꞌi a ruma ta̱ ili i wuma i re ɗe i na i tsu roco a na A̱sula̱ a̱ ri lo.a
A kpa̱to ta̱ ikpa̱ta̱tsu ya Aakpatiꞌi ne evelu e le,
uba̱ta̱ u na A̱sula̱ a tsu yuwan gafura vu unusu.
Agba tsaa gura damma ili suru adama e ili i nda gogo shi.
6 No o koto mofoɓo me ili tsundolo,
nan ganu a tsu uwa ta̱ a aasula o ufaru usana suru adama a yuwan ulinga u le.
7 Agba aabara a nan ganu a ɗa goon tsu uwa a aasula e ire,
agba u tsu uwa ta̱ u ta̱ a̱tsuma̱ a aaꞌwan.
U tsu uwa Upasu u na u Laꞌai Akiza babu mpasa shi.
U tsu ca ta̱ kucci vu mpasaꞌa adama a̱ nusu va̱ yi,
na̱ nusu na ama a yuwain a̱tsuma̱ o ulambu wu urevu.
8 Ili i nda suru ure u ɗa na Ruhu va Akiza aa dansa nna̱ Oogodo o Ucuwusan a buwa uba̱ta̱ u ɗa u na aa yuwusan a̱ga̱nda̱,
koto a̱ kpa̱tuꞌwa̱ ure a uwa Upasu u na u Laꞌai Akiza shi.
9 A̱yi nda iroci i ɗa i mantsa mo gogo.
U to rocosu neꞌe na̱ kucci na a casu aa gura zuwa za na a yuwusan a̱ga̱nda̱ u reve asuvu a̱ yi a̱ ta̱ cece cine wu ntsayi shi.
10 Adama a na ili i ndolo suru wila̱ wi ilyalya i ɗa ni ili yo oso na̱ wuza̱ꞌu.
Wila̱ u ndolo suru adama a̱ lipu a ɗa,
waru A̱sula̱ a zuwa ta̱ ama o toni le hali a̱ tyo mantsa mo ure u saꞌavu wa̱ yi.
Mpasa mu Zamawawa
11 Gogo Zamawawa ɗa o oꞌwoi aabara a nan ganu suru a aci e ili i saꞌani suru i na i ta̱wa̱i ɗe.
U uwa ta̱ uba̱ta̱ wa̱ a̱ga̱nda̱ a zuva za na laꞌai ulobonu suru suru,
za na ekere a ama a ɗa a yuwan niyi shi,
waru u ri pa a̱tsuma̱ o uvaɗi u nda shi.
12 U ta̱ o una̱ u mantsa suru u tarai mpasa a uwa uba̱ta̱ꞌa̱,
agba mpasa mu mgbele ko ndindim n ɗa shi.
U tara ta̱ mpasa ma̱ yi,
waru ana u yuwain ne,
ɗaɗa u tsupaa ntsu adama e iwawi i na yoo koto shi.
13 Ɗe nu ujimu,
ana ama a̱ da̱na̱i nu unusu,
lipu le tso oꞌwo ta̱ cece na̱ ganu kyoꞌonuwo le mpasa mu mgbele na̱ za vo ogono e inan,
na̱ a̱ bula̱nuwa̱ le okomo a̱ a̱na̱wu a nan na a̱ kula̱toi.
14 Agba Zamawawa yuwan unusu shi,
ko keꞌen,
reve u ca aciya̱yi kucci e ekere a̱ A̱sula̱ nu ure u Ruhu na ri lo babu ukotu.
A̱yi ɗa i zuwai mpasa ma̱ yi n ri nu ucira lon,
reve wu za̱ꞌwa̱ asuvu a̱ tsu diga a linga na tsu ta̱wa̱a̱ nu ukwa̱.
Adama tsu yuwayin A̱sula̱ a wuma a̱ga̱nda̱!
15 A̱yi nda a̱yi ɗa i zuwai Zamawawa o oꞌwoi za na gerei akucunu a saꞌavu,
adama aza a na A̱sula̱ e ɗeyi a̱ ushi abaꞌun a na oo koto shi,
aza a na A̱sula̱ a yuwayin nzuwulai.
A̱yi nda ta gura oꞌwo adama a na Zamawawa kuwa̱ ta̱,
reve u zuwa ama o oꞌwo fa̱a̱n diga a̱ nusu na a yuwain ele o tono akucunu o ufaru.
16 Akucunu tsunda a̱ ta̱ gashi vuma na yuwain iɗana a̱ a̱a̱vuꞌun cine u cigai e neꞌeshen utsuru wa̱ yi nu u kuwa̱.
Amma she na̱ za suru reve ana vumaꞌa u kuwa̱i ɗaɗa a̱ tsu neꞌeshen utsuruꞌu.
17 A̱vuꞌuꞌun u ta̱ nu ucira na̱ vuma na ɗana niyiꞌi u kuwa̱.
Ko za lo a gura ushi ili i ta̱ a̱tsuma̱ e le shi,
na̱ vumaꞌa u buwa wuma.
18 A̱yi ɗa i zuwai akucunu o ufaru ili i ro i ɗa shi,
she na̱ mpasa adama u roco ukwa̱.
19 Wu ufaru,
Musa damma ta̱ ama Wila̱ suru.
We ire,
reve u tara mpasa mu mgbele na̱ mudindim reve u ja̱mba̱ra̱ mpasaꞌa na̱ mini.
A̱vu u tara eleme e ikyon a na a sukumayi mini ma̱ shili a̱vu u ɓolo yi no oosondori adama u kyoꞌonuwo aatagada a̱ Wila̱ na ama suru.
20 Reve u damma,
“A̱yi nda a̱yi ɗa mpasa n na n zuwai Akucunu a na A̱sula̱ a damma nɗu i yuwan tsutoni na̱ a̱yi.”
21 Ne ɗa waru,
Musa kyoꞌonuyi mpasaꞌa o Oogodo o Ucuwusan waru ni ili i na a yuwusayin a̱ga̱nda̱ suru.
22 Wila̱ꞌa̱ u damma ta̱ a ꞌyuwan a ciga ili suru o kyoꞌonuwo le mpasa adama a̱ da̱na̱ cece.
Waru A̱sula̱ aa yuwan gafura vu nusu babu wocowu wu mpasa shi.
Ukwa̱ wu Zamawawa u tawa ta̱ nusu
23 A̱yi ɗa ili i na i zuwa nle a̱ ka̱mbuwa̱i Oogodo o Ucuwusan cece ni ili i na i ri pe suru na̱ mpasa mi inama.
Ili i nda suru oroci e ili ya amayun i na i ri zuva ɗa.
Amma kucci na ka̱mba̱toi ili ya amayun cece ɗe zuva a laꞌa ta̱ kucci vi inama.
24 Zamawawa uwa Upasu u na u Laꞌai Akiza na ama a yuwain ne ekere e le shi,
za na ri ululu wi ili ya amayun.
U ka̱ra̱ ta̱ a̱ tyo zuva waru u ta̱ ɗe oɓolo na̱ A̱sula̱ adama u kamba tsu.
25 Waru u ka̱ra̱ a̱ tyo zuva adama u da̱shi cayisa kucci va aciya̱yi shi,
gashi aabara a nan ganu vu uvaɗi na tsu uwa Upasu u na u Laꞌai Akiza a aaꞌwan suru adama u ca kucci vu mpasa vu nama.
26 Nu u shi u ca kucci va aciya̱yi aaꞌwan suru,
a na u sowo ta̱ a̱tsuma̱lima̱ na̱ a̱bunda̱ diga a mantsa ma na a yuwain uvaɗi.
Amma,
u ta̱wa̱ ta̱ u ta̱,
zuzu na̱ mantsa mo ukosu,
o una̱ u mantsa suru,
adama u tawa ucira wu unusu suru suru ana u kuwa̱i tsa̱ kucci adama a̱ tsu.
27 Za suru u ꞌyuwan u ciga u kuwa̱ u ta̱,
na̱ a̱yi ndolo koto,
A̱sula̱ e te geꞌeto yi.
28 Zamawawa kuwa̱ ta̱ u ta̱ adama u tara nusu va ama a̱ a̱bunda̱.
Agba nu u ta̱wisa̱,
woo oꞌwo adama a matawa mo unusu shi.
U ta̱ ta̱wa̱ adama u wawa za suru na ri lo a pura yi.