2 Uwwai!

A̱mu Bulu,

n ta dansaa ɗu ili i nda:

Nni i lyawa le a paɗa ɗu uryumbu,

u to rocosu Zamawawa ili ye pere i ɗa e ekere a̱ ɗu.

3 N ta dansaa ɗu waru nu ucira za na a paɗai uryumbu suru u ꞌyuwan u ciga u toni Wila̱ꞌa̱ suru.

4 Waru na̱ vu yuwan ukadu u na voo yoꞌonoto A̱sula̱ okolo na̱ mayan mo tsutoni na̱ Wila̱,

vu kasa ta̱ aciya̱wu na̱ Zamawawa,

waru vu ꞌyuwan ta̱ a̱ ushi isaꞌani ya̱ A̱sula̱.

5 Ruhu ɗa tsu zuwa tsu tsu reve a na A̱sula̱ a̱ ta̱ ushi tsu tsa ama a̱ a̱ɓula̱ adama a na tsu ca ta̱ okolo uba̱ta̱ wu Zamawawa.

6 Na̱ a̱vu za vi Itoni va̱ Yesu Zamawawa ɗa wo oꞌwo ili i ro shi ko na a paɗa wu uryumbu ko na a paɗa wu shi.

Ili yu ulobonu a̱yi ɗa ucawu wo okolo a̱ wu a̱yi ɗa waa zuwa wu vu ciga ama.

7 Ununa i da̱na̱i o tonishi Kristi Zamawawa u da̱na̱ ta̱ ulobonu,

reve nanza ta̱wa̱ u vadala ɗu diga a amayun.

8 Amma amayun a ɗa vuma ndolo A̱sula̱ a ɗa shi,

za na ɗangwa nɗu.

9 Wolilo waꞌa u tsu zuwa ta̱ yira ya̱ a̱bunda̱ i tsutsa.

Ili i na waa dansa a̱yi ɗa,

uritosu we epen waꞌa u tsu vadala ta̱ ama a̱ a̱bunda̱.

10 Amma n zuwa ta̱ okolo uba̱ta̱ wa̱ A̱sula̱,

ya̱a̱ usu uritosu wa ama e epen o ndolo shi,

amma i toni ili i na n dammai.

A̱sula̱ a ta ca aza a na a̱ ja̱mba̱ra̱sa̱ ɗu a̱tsuma̱lima̱,

ko na̱ zane ɗa u shi.

11 Ama a̱ va̱,

nna̱ m buwa a yuwusan alajiya,

a na ama a ꞌyuwan a ciga a paɗa le uryumbu,

nye i zuwai aza a Israꞌila a casu mu a̱tsuma̱lima̱?

Na̱ n shi a yuwusan alajiya a nda,

o una̱ u na maa yuwan alajiya o ukwa̱ wa̱ Kristi Zamawawa,

n shi a̱ da̱na̱ a nususaan le shi.

12 N te ipati za na a damatosun ɗu suru a paɗa le uryumbu goon shi,

amma o foɗo arawa e le!

13 Ama a̱ va̱,

A̱sula̱ e ɗe ɗu ta̱ adama yo oꞌwo fa̱a̱n!

Amma she i lyawa moꞌwo ma̱ fa̱a̱n mo ndolo wo oꞌwo ɗu ure u na ya̱a̱ da̱na̱ a maluwa ma mayan mo unusu wan.

Amma,

i cigalai waru i kambulai.

14 Wila̱ꞌa̱ suru ili i ta̱ i ɗa na̱ a̱yi nda:

“Vu ciga moron ma̱ nden ma̱ wu cine vu cigai aciya̱wu.” ^a

15 Amma ni i lyuwa elime na̱ ngagalai na̱ ncalai ma̱ a̱tsuma̱lima̱,

ni i yuwan ugbozu shi,

i ta̱ lungusula̱i suru suru.

16 N ta dansaa ɗu:

I lyawa Ruhu lyuwa elime a̱ ɗu,

ne tsundolo tsa ɗa yoo toni ili yi iwuya i na i cigai shi.

17 Ruhuꞌu ni ili i na i cigai nꞌyuwatan n ɗa.

A mantsa suru a tsu yuwusan ta̱ nla̱ngi va̱ni le,

adama o ndolo yaa yuwan ili i na i cigai shi.

18 Amma na̱ Ruhu ɗa aa lyuwusa elime a̱ ɗu,

Wila̱ wa̱a̱ da̱na̱ o tsugono a aci a̱ ɗu shi.

19 Za suru reve ta̱ ili i wuya i na okolo a tsu ciga:

A tsu yuwan ta̱ tsipere.

A tsu yuwan ta̱ ili i wono.

A tsu yuwan ta̱ majiyan me tsipere lon.

20 A ta yuwusaan a̱ma̱li a̱ga̱nda̱.

A ta yuwusan nkunu.

A tsu ꞌyuwan ta̱ ama.

Izami ya addama i ɗa ulinga u le.

A̱ tsu da̱na̱ ta̱ a tsugamu.

21 A̱ ta̱ waru tapu nu upan lon.

Majiyan ma aciyele ma ɗa goon a tsu yuwusan.

She mawasan ma na ma̱ tsu ta̱wa̱ na̱ wukasu.

Waru uneꞌesun u ɗa a̱ ri adama a aciyele.

A tsu zuwusa ta̱ esu e le e itana ya ama o ro.

Ele waru ososowi a ɗa.

A̱ tsu ꞌya̱wa̱ ta̱ uba̱ta̱ a̱ a̱buki a na ama a tsu gura goloɓo aciyele shi.

Reve a yuwan ili yi idaba i ro kokoꞌo.

N rono ɗu ta̱ ɗe atsuvu,

waru n to roniso ɗu atsuvu:

Aza a na a yuwusan ili i nda a̱a̱ ushi abaꞌun o tsugono tsa̱ A̱sula̱ shi.

22 Amma na̱ Ruhu va̱ A̱sula̱ o goloɓuso ɗu,

u ta matsan muwun n nda:

I ta̱ da̱na̱ a ncigalai.

I ta̱ da̱na̱ a̱ ma̱za̱nga̱,

na asuvu nden.

Ruhu ta zuwa ɗu i yuwan ankuri.

I ta̱ da̱na̱ a nkambulai.

I ta yuwan ili i isaꞌani.

O to soɗuwo ɗu ma̱tsa̱n.

23 I yuwan nden mu ulobonu na ama.

Na̱ Ruhu o ronuso ɗu aɗanga i to goloɓo aci a̱ ɗu.

Wila̱ wu lo na waa damma ili i nda i ri ulobonu shi.

24 Na ama a̱za̱ e Yesu Kristi Zamawawa a ɗa,

a lyawa ta̱ nusu le a̱ca̱pa̱ ni icigi i mayan me iwuya.

25 Adama a na Ruhu va̱ A̱sula̱ ca ntsu wuma u saꞌavu,

lyawa tsu yuwain ili i na Ruhuꞌu u damma ntsu tsu yuwan.

26 She tsu ꞌya̱sa̱n avangaci wan,

ko tsu zuwulai addama wan,

ko tsu da̱na̱i a̱ tsushuꞌun wan.