2
N jiyan ta̱ ma̱a̱ ꞌya̱wa̱ ya̱ꞌa̱ ɗu waru shi,
adama a na mantsa ma na n shi n ꞌya̱wa̱i ya̱ꞌa̱ ɗu,
suru nɗu u ɓa̱la̱ ɗu ta̱.
2 Na̱ maa zuwa ɗu a̱tsumola̱ngu,
to,
zane ɗa aa buwa na waa zuwa mu ma̱za̱nga̱?
She a̱ɗu goon,
aza a na n zuwai a̱tsumola̱ngu.
3 A̱yi ɗa i zuwai n ɗanai ne e mepepelime ma na n lyunguwa̱ nɗu ɗe.
N ciga m bura ɗu shi,
adama a na ugaꞌasusan na̱ a̱ɗu a̱tsumola̱ngu a ɗa waa zuwa mu goon.
Agba a̱ɗu ɗa ama a na wu ntsayi i zuwa mu ma̱za̱nga̱.
Ili i na i zuwai n cigai n da̱na̱ a̱ ma̱za̱nga̱ a̱yi ɗa adama n zuwa ɗu ma̱za̱nga̱.
4 A mantsa ma na n ɗanaa nɗu nu ufaru,
n shi ta̱ udamu waru n shi na̱ ma̱za̱nga̱ o okolo a̱ va̱ shi,
waru n ɗana ta̱ na aɓara lon.
N ɗana adama n zuwa ɗu a̱tsumola̱ngu shi,
amma n ɗana ta̱ adama i reve a na n ciga nɗu lon.
I yuwaan za vu unusu gafura
5 Za ro a̱tsuma̱ a̱ ɗu zuwa mu ta̱ a̱tsumola̱ngu,
agba a̱mu ɗa a̱ ndeꞌen shi,
hali na̱ a̱ɗu suru.
Ili i na maa dansa a̱yi ɗa u zuwa ta̱ a̱za̱ e Itoni a̱tsumola̱ngu kpara.
(N ciga n yuwan adanshi a na a̱ ka̱ra̱la̱i adama o ndoloꞌo shi.)
6 Na̱ a̱bunda̱ a̱tsuma̱ a̱ ɗu i ɓolo ta̱ ugbozu reve i ca yi awuya a na a ntsaa niyi.
Awuya o ndolo a rawa ta̱.
7 Amma gogo i yuwaan yi gafura reve i ca yi adanshi adama u putsaa yi na̱ a̱tsumola̱ngu lon hali waru u lyawa itoni suru suru wan.
8 N ta patishi ɗu,
i roco a na i ciga niyi.
9 N ɗanaa ɗu ta̱ adama n lyungwa̱ ɗu,
reve waru me ene ko i toni ta̱ uritosu u va̱.
10 Ni i yuwaan vuma nda gafura,
a̱mu fo n ta yuwaan yi gafura.
Waru na̱ n yuwaan yi gafura (nu unusu u ta̱ lo),
n yuwan ta̱ ne nu ucira wu Zamawawa o una̱ u ɗu.
11 N yuwan ta̱ ne adama Male ma yuwan tsu ugbozu wan,
adama a na tsu reve ta̱ ifoɓi ya̱ yi lon.
Bulu yuwain alajiya a Taruwasa
12 Ana n rawai Taruwasa adama n yuwan alajiya a Alabari a Saꞌani e Yesu Zamawawa,
n cina ta̱ cina Zagbain kpa̱tuꞌwa̱ ɗe ure adama o ulingaꞌa.
13 Agba n shi ta̱ udamu lon,
adama a na me enei za tsu Titu shi.
Reve n damma ama o uba̱ta̱ꞌa̱,
“She mantsa mo ro,”
reve n ka̱ra̱ a̱ tyo Makidoniya.
Ulyuwu wa aci adama a Zamawawa
14 Tsu godyo ta̱ A̱sula̱ lon!
A̱yi ɗa za na ka̱mba̱to ntsu agbashi a̱ yi,
reve waru u walaa tsu elime a̱tsuma̱ a mmalu ma alya ma aci a Zamawawa.
A̱sula̱ waru u ta kambusa bazasa urevu wu Zamawawa uba̱ta̱ biti ana ma̱guru ma saꞌani.
15 Wuma u tsu tsa̱ ma̱guru ma na Zamawawa a casu A̱sula̱ ɗa,
za na a bazasa uba̱ta̱ wa aza a na A̱sula̱ a wawusa na aza a na a̱ kuwusa̱.
16 E ekere a aza a na a̱ kuwusa̱,
ma̱guruꞌu u rotso ta̱ ushamu wa̱ a̱kwa̱kwa̱,
amma e ekere a aza a na a̱ ri wuma ma̱guru ma wuma ma ɗa.
Zane ɗa rawai u yuwan ulinga u nda?
17 Tsu ri tsa ama o ro a na a yuwusan alajiya a adanshi a̱ A̱sula̱ adama a̱ tsura̱ ikebe shi.
Oꞌo,
ne ɗa shi.
Amma tsu ta̱ ka̱mbusa̱ ugbozu na tsu ri ama a na A̱sula̱ a̱ lyunguyi,
waru o ucira wu Zamawawa tsu ta yuwusan adanshi e ikaka i tsu a̱ ma̱ka̱ka̱n ma̱ A̱sula̱.