I yuwan tsutoni na̱ ngono
13
I yuwan tsutoni na̱ ngono n na maa yuwusan tsugono a aci a̱ ɗu.
A̱sula̱ a ɗa goon a̱ ri nu ucira u na waa ca vuma tsugono,
a̱yi ɗa u zuwa nle o oꞌwo ngono.
2 Adama o ndolo aza a na a ꞌyuwain o toni wila̱ u gwamnati,
A̱sula̱ a ɗa a ꞌyuwain o toni.
Adama o ndolo o to ronoo aciyele oforo.
3 Aza a na aa yuwusan isaꞌani,
a̱a̱ da̱na̱ a uwwusa wovon wu ngono shi,
amma aza a na aa yuwusan iwuya,
ele ɗa aza a na aa uwwusa wovon u le.
Babu ili i na yaa zuwa ɗu yu uwwa wovon u le.
I yuwan ili i saꞌani,
ni i yuwan tsundolo ele a ta cuwa ɗu.
4 Mogono aagbashi a̱ A̱sula̱ a ɗa,
waru ulinga wa̱ yi a̱yi ɗa u kamba ɗu.
Amma na̱ yaa yuwusan iwuya,
reve yu uwwa wovon wa̱ yi,
adama a na u ta̱ nu ucira u na waa ca ɗu oforo.
Ana u tsu ca a̱za̱ e iwuya a̱tsuma̱lima̱,
a̱yi aagbashi a̱ A̱sula̱ a ɗa.
5 Adama o ndolo i ciga i ꞌyuwan i yuwan tsutoni na azagbain a gwamnati,
adama a na tsundolo tsa ɗa yaa yuwan a̱vu i kanzuꞌwa oforo,
waru adama a na ili i na yi ntsayi i yuwan ɗa ndolo.
6 A̱yi ɗa i zuwai yaa tsupusa utafa.
Ngono agbashi a̱ A̱sula̱ a ɗa,
waru a̱ tsu ushi ta̱ atsupu tsa̱ra̱ a gura yuwan ulinga u na A̱sula̱ a zuwa nle.
7 I tsupa le ili i na oo tono ɗu suru.
I tsupa ko cuꞌun vu utafa ne ɗa suru.
I ca le tsugbain waru i yuwan tsutoni ne ele suru.
I ciga ama
8 She i lyawa nanza toni ɗu ili i ro wan.
Ili i ta̱ i ɗa goon na ni i ciga i ꞌyuwan i yuwan,
a̱yi ɗa i cigalai,
adama a na vuma na cigai ama u to tonishi Wila̱ suru.
9 Wila̱ꞌa̱ u damma ta̱,
“She vu yuwan tsipere wan.
She vu una nanza nu ucigu wa̱ wu wan.
She vi iva̱ wan.
She vu zuwa okolo e itana yi za ro wan.”
Amma wila̱ u ta̱ u ta̱ lo za na dammai una̱ta̱ na aza a nda:
“Vu ciga nron mu nden ma̱ wu cine vu cigai aciya̱wu.” a
10 Na̱ vu ciga ama,
vaa yuwaan le iwuya shi.
Na̱ vu ri ni icigi ya ama vu to tonishi ili i na Wila̱ u dammai.
11 Ni i ciga i ꞌyuwan i yuwan ili i nda adama a na i reve ta̱ cuꞌun mantsa ma na tsu ri.
Mantsa ma na u lobonoi i ꞌyon gogogo a̱tsuma̱ a nlavu a ɗa,
adama a na iwawi i tsu i laꞌa ta̱ zuzu na̱ mantsa ma na tsu fara cayi okolo.
12 U yuwan ta̱ gashi ayin a ciga ta̱ o koto,
waru usana u ciga ta̱ matawaa.
Adama o ndolo tsu lyawai a yuwusan ili i na aa yuwusan a̱tsuma̱ e irumbu,
reve tsu tarai itana i na tsaa yuwayin uvon a̱tsuma̱ e ekan.
13 I yuwan wuma u ɗu ulobonu,
cine ama a tsu yuwusan nu urana.
She i yuwan iwuya a mantsa ma̱ a̱buki wan.
She yoo oꞌwo ososowi wan.
She i yuwan tsipere icuꞌun icuꞌun wan.
She i yuwan nla̱ngi va̱ni ɗu wan.
She i yuwan tsushuꞌun no ozo o ro wan.
14 Amma i lyawa Zagbain Yesu Zamawawa rono ɗu aɗanga a wuma u ɗu suru suru.
Reve waru i lyawa ifoɓi yu ure u na ya̱a̱ tsura̱ ili i wuya i na i cigai.