A̱sula̱ a yuwaan ta̱ aza a Israꞌila isaꞌani
11
Adama o ndolo reve me ece:
A̱sula̱ a ꞌyuwan ta̱ ama a̱ yi,
aza a Israꞌila?
Ne ɗa shi!
A̱mu na aciya̱va̱ za va Israꞌila ɗa.
A̱mu maci va Ibrahim ɗa,
waru za vu ugundo wa Banyami u ɗa.
2 A̱sula̱ a ɗangwa ta̱ ama a Israꞌila o oꞌwo ama a̱ yi ɗe nu ujimu,
waru koto u wasan le shi.
I cuwan ta̱ ni ili i na Adanshi a̱ A̱sula̱ a dammai adama a nda?
Iliya vumava̱sula̱ ꞌya̱wa̱ ta̱ na adanshi a aci a ama a nda reve u damma,
3 “A̱sulazuva,
o una ta̱ ama̱sula̱ a̱ wu,
waru a̱ lungusa̱ ta̱ musaꞌa ma̱ wu.
A̱mu ɗa vumava̱sula̱ na buwai a̱ ndeꞌen,
agba a ta zama o una mu fo gogo.” a
4 Waru i cuwan ta̱ cine A̱sula̱ a̱ usuyi?
U damma,
“A̱vu ɗa goon vu buwai shi.
N ta̱ na ama ukpakukupa ucindere (7,000) aza a na koto a̱ kingyowa̱yi a̱ma̱li Baꞌalu shi!” b
5 Ne ɗa fo u ri gogo.
Ama a̱ ta̱ lo waꞌa na A̱sula̱ a ɗangulai adama e isaꞌani ya̱ yi.
6 Waru nnu u ɗangula le,
adama e isaꞌani ya̱ yi i ɗa,
agba adama e ili i ro na a yuwain ɗa shi.
Nno o to oꞌwo ama a̱ A̱sula̱ adama e ili i na aa yuwusan,
uneꞌe wi isaꞌani ya̱ A̱sula̱ wo oꞌwo uneꞌe wa amayun shi.
7 A̱yi nda u to rocosu ama a Israꞌila waꞌa ɗa,
aza a na A̱sula̱ a ɗangwai,
a̱ tsura̱i ili i na aza a Israꞌila suru a̱ ri e izami.
Agba akapi e le a̱ ta̱ na aciyogbamu.
8 Cine Adanshi a̱ A̱sula̱ a dammai:
“A̱sula̱ a ca le ta̱ okolo a̱ tsuta̱mu.
U rumba̱na̱to le ta̱ adama e ene wan,
waru u ula ta̱ atsuvu e le adama a uwwa wan.
Ne ɗa gba hali n gogo.” c
9 Waru Da̱wuda damma ta̱:
“Lyawa a̱buki e le e reme le a̱tsuma̱ a maza me le,
adama a̱ ta̱ɗa̱tsa̱
reve a̱ ushi a̱tsuma̱lima̱ adama e ili i na a yuwain.
10 Lyawa esu e le a̱ rumba̱na̱ adama e ene wan,
zuwa le a̱ ka̱ɗa̱to za̱la̱ vi itana yu ume
u na aa cuꞌwan shi.” d
11 Adama o ndolo reve me ece:
Ana aza a Israꞌila a̱ riya̱i,
uriyu u ndolo u lungusa̱ le ta̱?
Ne ɗa shi!
Adama a na a yuwain unusu,
ɗaɗa iwawi i ta̱wa̱i uba̱ta̱ wa Atakpaci,
a̱yi nda gba a̱yi ɗa waa zuwa aza a Israꞌila a yuwan tsushuꞌun.
12 Na Atakpaci a̱ ushi abaꞌun a̱ a̱bunda̱ adama a na aza a Israꞌila a ꞌyuwain a mantsa ma na A̱sula̱ a̱ shi a cigai a wawa le,
reve a mantsa ma na aza a Israꞌila a̱ ta̱wa̱ a̱ ushi iwawiꞌi o ukosu,
abaꞌun e le a ta laꞌa a̱bunda̱.
Iwawi ya Atakpaci
13 Gogo n ta yuwusaan ɗu adanshi a̱ɗu Atakpaci.
A̱sula̱ a ɗangwa mu ta̱ mo oꞌwo aajiya a Atakpaci,
waru n ta yuwusan afalu adama o ulinga u gbain u na u ca numu n yuwan.
14 N ta zama ure u na maa zuwa aza a Israꞌila a ciga ili i na a̱ɗu Atakpaci i ri na̱ a̱yi,
tsundolo tsa ɗa ma̱a̱ tsura̱ n wawa ozo o ro e le.
15 Ana A̱sula̱ a vadalayi aza a Israꞌila ucina̱,
wo oꞌwo ta̱ iꞌutsa̱ ya Atakpaci.
Adama o ndolo ana A̱sula̱ aa yuwisan tsuꞌutsa̱ na aza a Israꞌila,
u ta̱ gashi a̱ ka̱mba̱to ta̱ a̱a̱kwa̱kwa̱ wuma.
16 Na a ca A̱sula̱ mabishi ma tsuwa,
to,
za va̱ yi ɗa ma̱ɓula̱.
Waru na a ca A̱sula̱ aralu o uɗanga,
eten o uɗangaꞌa suru za va̱ yi ɗa.
17 U ta̱ gashi a saza ta̱ eten o ro o uɗanga u zetun.
A̱ɗu Atakpaci i ta̱ gashi eeten e zetun a na a kungwai a̱tsuma̱ o ogozo a na e leɓenuyi zuva vu uɗanga u zetun.
Gogo i ushi ta̱ ili i saꞌani i na i shi za va aza a Israꞌila cine eeten a saꞌavu o tsu sowo mini ma̱ yi diga a aralu o uɗanga.
18 Adama o ndolo she i yuwaan eten a na a sazai uvaɗu wan.
Cuwain,
a̱ɗu ɗa ya̱a̱ ɓa̱na̱sa̱ aralu o uɗanga a̱ ndeɗe shi.
Aralu a̱ yi a ɗa a̱ ɓa̱na̱sa̱ ɗu.
19 U ta gura wo oꞌwo i yuwan majiyan a na a sazai eteꞌen,
adama a zuwa ɗu o una̱ u le u ɗa.
20 Amayun a ɗa.
A saza le ta̱ adama a na a ꞌyuwain a̱ usu,
a̱ɗu gba i buwa ta̱ uba̱ta̱ꞌa̱ adama a na i usuyi.
She i ꞌya̱sa̱n avangaci wan,
amma yu uwwa wovon wi ili i na yaa gura fara.
21 Nna̱ A̱sula̱ a saza eten o ufaru o ndolo,
ne ɗa waa gura koɗo ɗu fo.
22 Adama o ndolo ye ene ta̱ A̱sula̱ a̱ ta̱ ni isaꞌani,
waru u tu usuɗuwu lon.
U tsu ca ta̱ aza a na a lyawai itoni ya̱ yi a̱tsuma̱lima̱.
Ni i lyuwa elime na̱ nden cine woo roco ɗu isaꞌani,
to,
u ta̱ a̱ ri n rocosu ɗu isaꞌani ya̱ yi.
Nna̱ gba i yuwan ne shi,
u ta saza ɗu diga o uɗangaꞌa.
23 Waru na aza a Israꞌila a zuwisa okolo e le uba̱ta̱ wa̱ A̱sula̱,
u ta̱ ka̱mba̱towisa̱ le uba̱ta̱ u na a̱ shi.
U ta̱ nu ucira u na waa yuwan ne.
24 A̱ɗu Atakpaci i ta̱ gashi eeten o uɗanga u zetun u na u kungwai a̱tsuma̱ ogozo u na o koɗoi,
reve e leɓenu yi zuva vu uɗanga u zetun u saꞌani.
Ne ɗa iliꞌi u ri shi!
Amma a na wo oꞌwoi aza a Israꞌila o ndolo a̱ ta̱ gashi eeten a na a kungwai o uɗanga u saꞌani,
a̱ ta̱ gba e leɓenuwishe le o uɗangaꞌa babu usa̱n.
A̱sula̱ a tsu yuwaan ta̱ ama suru isaꞌani
25 Ama a̱ va̱,
n ciga ɗu ta̱ i reve ili yu usokowu i nda,
adama i reve na koto i revei ili suru shi,
waru adama i ꞌya̱sa̱n avangaci wan.
Aza a Israꞌila o ro a̱ ta̱ na aciyogbamu,
agba ili i nda i ta lyuwa elime hali she na̱ a̱tyo a na A̱sula̱ a zuwayi Atakpaci a na a ɗangwai,
a̱ ta̱wa̱ uba̱ta̱ wa̱ Yesu Zamawawa.
26 Waru ne ɗa A̱sula̱ aa wawa aza a Israꞌila suru.
Cine Adanshi a̱ A̱sula̱ a dammai:
“Zamawawa to uta̱ Sihiyona,
reve u tawa iwuya suru diga o uꞌwa wa Yakubu.
27 N ta yuwan akucunu a nda ne ele
na̱ n tawa nusu le.” e
28 Aza a Israꞌila a ꞌyuwan ta̱ a̱ usu Alabari a Saꞌaniꞌi,
adama o ndolo o oꞌwo ta̱ nꞌyuwatan ma̱ A̱sula̱.
A̱yi nda wo oꞌwo ta̱ ne adama u kamba ɗu,
a̱ɗu na i ri Atakpaci.
Agba hali n gogo aza a Israꞌila ama a ɗa a na A̱sula̱ a ɗangwai,
waru u ciga le ta̱ adama a nzuwulai n na u yuwayin nkaya n le Ibrahim,
na̱ Ishiyaku na̱ Yakubu.
29 A̱sula̱ a tsu vadala okolo a̱ yi a aci a ama a na u ɗeyi ni ili i na u ca nle shi.
30 Ɗe nu ufaru a̱ɗu Atakpaci i ꞌyuwan ta̱ o toni A̱sula̱.
Amma a mantsa ma na aza a Israꞌila a ꞌyuwain o toni,
reve A̱sula̱ a yuwaan ɗu isaꞌani.
31 Ne ɗa waru u ri hali n gogo,
aza a Israꞌila a ꞌyuwan ta̱ o toni,
adama o ndolo A̱sula̱ a ta gura yuwaan le isaꞌani cine u roco nɗu isaꞌani.
32 A̱sula̱ a ciga ta̱ u roco isaꞌani a̱ tyo a ama suru adama o ndolo u zuwa le ta̱ o oꞌwo gashi aza a na a̱ ri o uꞌwa wa ali adama a na a ꞌyuwain o toni.
Ica a̱ tyo uba̱ta̱ wa̱ A̱sula̱
33 Zane ɗa aa gura rito utsuru,
nu ugbozu,
nu urevu u na A̱sula̱ a̱ ri na̱ a̱yi?
Zane aa gura reve ili yo okolo a̱ yi?
Zane aa gura cuɗuwa ili i na u tsu yuwan?
34 Cine Adanshi a̱ A̱sula̱ a dammai,
“Zane revei okolo a̱ A̱sulazuva?
Zane aa gura ca yi a̱sa̱la̱?”
35 “Za ro ta̱ ni ili i na woo tono A̱sulazuva,
i na a ciga a ꞌyuwan u tsupa yi?” f
36 A̱sula̱ a yuwan ta̱ ili suru.
A̱yi ɗa za na tsu zuwa ili suru i lyuwa elime.
Ili suru i ta̱ lo adama a ca yi tsugbain.
Tsu ꞌyuwan tsu ciga tsu cuwa A̱sula̱ babu ukotu!
Ami.