5 Na̱ tsu ri na̱ cuꞌun vu uzuwu wo okolo o ndolo,

woo rono tsu e iɗa shi.

Ili i nda i fara ta̱ adama a na A̱sula̱ a ca ntsu Ruhu va Akiza,

za na shitoyin okolo a̱ tsu ni icigi ya̱ yi.

6 Zamawawa kuwa̱ ta̱ adama a̱ tsu mantsa ma na tsu kuɗa̱i a kamba aciya̱tsu,

ko na tsu da̱na̱i a̱za̱ o unusu.

7 Ili yu usa̱n i ɗa nanza ciga u kuwa̱ adama u wawa nanza na a̱a̱ kurusu Wila̱.

Amma u ta gura oꞌwo u kuwa̱ adama u wawa wuma wu za na a yuwusaan ozo o ro isaꞌani kuci.

8 Amma A̱sula̱ o roco tsu ta̱ a̱ba̱jini e icigi ana u lyunguyi Zamawawa tsa̱ra̱ u kuwa̱ adama a̱ tsu a mantsa ma na tsu da̱na̱i a̱za̱ o unusu.

9 Gogo A̱sula̱ e te keceshe tsu a̱za̱ a̱ a̱ɓula̱ adama a mpasa mu Zamawawa,

waru tsu reve ta̱ u ta wawa tsu o upan wa̱ A̱sula̱.

10 Ko na tsu da̱na̱i nꞌyuwatan ma̱ A̱sula̱,

u ka̱mba̱to tsu ta̱ nꞌutsa̱ ma̱ yi,

adama a na Mawun ma̱ yi ma̱ kuwa̱i adama a̱ tsu.

Gogo a na tso oꞌwoi nꞌutsa̱ ma̱ A̱sula̱,

tsu reve ta̱ amayun a ɗa a na waa wawa tsu e ekere a wuma u Mawun ma̱ yi.

11 A̱yi ndolo ɗa goon shi,

amma tsu yuwan ta̱ ma̱za̱nga̱ adama e ili i na A̱sula̱ a yuwain e ekere a Zagbain tsu Yesu Zamawawa,

za na ka̱mba̱to ntsu nꞌutsa̱ ma̱ A̱sula̱.

12 Unusu u uwa ta̱ a̱tsuma̱ o uvaɗi adama e ili i na vuma ta̱ yuwain,

a̱vu unusuꞌu u ta̱wa̱a̱ nu ukwa̱.

A̱yi ɗa i zuwai ciga ꞌyuwan vuma suru kuwa̱ adama a na vuma suru yuwain unusu.

13 Unusu u ta̱ pa a̱tsuma̱ o uvaɗi kafu A̱sula̱ a ca Musa Wila̱.

A̱sula̱ aa cuwusan nu unusuꞌu shi a mantsa mo ndolo,

adama a na Wila̱ u da̱na̱ lo shi.

14 Amma diga a mantsa ma Ada̱mu a̱ tyo a mantsa ma Musa,

suru nle a̱ kuwa̱ ta̱,

ko na koto a̱ shi a ꞌyuwain a yuwan ili i na A̱sula̱ a damma nle a yuwan shi,

cine Ada̱mu yuwain.

E re ro Ada̱mu cuꞌun vu Zamawawa ɗa za na ta̱wa̱i na̱ a̱ca̱pa̱.

15 Amma ejereꞌe una̱ta̱ u ɗa a̱ ri shi,

adama a na uneꞌe wa̱ A̱sula̱ u ri tsu unusu wa Ada̱mu shi.

Amayun a ɗa ama na̱ a̱bunda̱ a̱ kuwa̱ ta̱ adama o unusu u vuma ta̱ ndolo.

Amma isaꞌani ya̱ A̱sula̱ i laꞌa ta̱ mgbain lon,

waru ama na̱ a̱bunda̱ a̱ tsura̱ ta̱ uneꞌe u wuma wa̱ A̱sula̱ adama e isaꞌani i vuma ta̱.

Vuma ndolo a̱yi ɗa Yesu Zamawawa.

16 Waru ili i na uneꞌe pere wa̱ A̱sula̱ u ta̱wa̱yi u tawa ta̱ koꞌo ni ili i na unusu u vuma ta̱ u ta̱wa̱yi.

Ana Ada̱mu yuwain unusu,

A̱sula̱ a̱ tsu geꞌeto ta̱ reve waru u ca a̱tsuma̱lima̱.

Amma A̱sula̱ a̱ usu tsu ta̱ adama o uneꞌe wi isaꞌani u na u cayi,

ko tsu yuwan unusu wa̱ a̱bunda̱.

17 Unusu u vuma ta̱ nda,

a̱yi Ada̱mu,

u ta̱wa̱a̱ ta̱ nu ukwa̱ a̱vu wo oꞌwo mogono e ekere a̱ tsu.

Amma ili i na Yesu Zamawawa yuwain laꞌa ta̱ ili i ndolo na̱ a̱bunda̱ lon.

A̱sula̱ a̱ ta̱ ni isaꞌani lon e ekere a̱ tsu,

waru u usu tsu ta̱ adama e Yesu.

Adama o ndolo tsu ta̱ tsura̱ wuma reve tsu lyuwa aci o unusu nu ukwa̱.

18 Unusu u ta̱ wa Ada̱mu u ta̱wa̱a̱ ta̱ na̱ a̱tsuma̱lima̱ o ukwa̱ a̱ tyo a ama suru.

Ne ɗa waru,

ili ya̱ a̱ɓula̱ i ta̱ i na Yesu Zamawawa yuwain u zuwa ta̱ ama suru o oꞌwo mejege e ekere a̱ A̱sula̱.

A̱yi ɗa u ta̱wa̱yi na̱ wuma wa amayun e ekere a ama suru.

19 Ada̱mu ꞌyuwan ta̱ o toni A̱sula̱,

ne ɗa u zuwai ama na̱ a̱bunda̱ o oꞌwoi a̱za̱ o unusu.

A̱vu Yesu Zamawawa yuwan tsutoni na̱ A̱sula̱,

waru u ta zuwa yi u ka̱mba̱to ama na̱ a̱bunda̱ a̱za̱ a̱ a̱ɓula̱ a̱ ma̱ka̱ka̱n ma̱ yi.

20 Amma A̱sula̱ a ca ta̱ Wila̱ adama ama suru e reve cine a̱ ri nu unusu.

Amma a na ama a lyuwusa elime a̱tsuma̱ o unusu,

A̱sula̱ waru a lyuwusa elime a̱tsuma̱ e isaꞌani ya̱ yi.

21 Unusu u ta yuwusan tsugono a aci a ama suru,

reve u ta̱wa̱a̱ le nu ukwa̱.

Ne ɗa waru gogo,

isaꞌani ya̱ A̱sula̱ yaa yuwusan tsugono,

waru u usu tsu ta̱ adama e Yesu Zagbain Zamawawa tsu.

A̱yi ili i nda i ɗa i ta̱wa̱a̱ ntsu na̱ wuma u babu ukotu.