Mepepelime ma̱ Bulu a̱ tyo ya̱
A̱za̱ a̱ Roma
Ucuɗuwu
1
A̱mu Bulu ɗa n ɗanai mepepelime ma nda.
A̱mu aagbashi e Yesu Kristi Zamawawa ɗa.
A̱sula̱ a ɗangwa mu ta̱ mo oꞌwo aajiya,
reve u lyungu mu n ꞌya̱wa̱ n yuwan alajiya a Alabari a Saꞌani a̱ yi.
2 Ɗe nu ujimu,
A̱sula̱ a yuwan ta̱ nzuwulai ma Alabari a Saꞌani a nda e ekere a ama̱sula̱ a̱ yi,
ununa a ɗanai a̱tsuma̱ a Aatagada a Akiza.
3-4 Alabari a Saꞌaniꞌi u ta yuwusan adanshi adama a Mawun ma̱ yi,
Yesu Kristi Zagbain tsu.
A matsan yi ta̱ vuma za na shi mawun ma tsukaya mo Mogono Da̱wuda.
Agba Ruhu na ri akiza roco ta̱ nu ucira na Yesu Mawun ma̱ A̱sula̱ ma ɗa,
adama a na u ꞌya̱sa̱n niyi o ukwa̱.
5 O ure wa̱ Kristi Zamawawa ɗa,
A̱sula̱ a ca numu ulinga u saꞌani wa aajiya.
Ulinga u nda adama o rono ama e iɗa suru a̱ usu a̱vu a̱ kuru ɗa.
N ta yuwusaan yi ulinga u nda.
6 A̱ɗu fo i ta̱ pe a̱tsuma̱ a ama a na Yesu Zamawawa ɗangwai.
7 N ta ɗanasaa ɗu aza a na a̱ ri a̱tsuma̱ a̱ a̱ba̱jini a̱ lyuci va̱ Roma mepepelime ma nda.
A̱sula̱ a ciga ɗu ta̱ a̱vu waru u ɗe ɗu yo oꞌwo ama a akiza a̱ yi.
Lyawa A̱sula̱ Dada tsu na̱ Yesu Zagbain Zamawawa ca ɗu isaꞌani na asuvu nden.
Bulu yuwain avasa a̱vu waru u godyo
8 Lyawa n fara damma n godyo ta̱ A̱sula̱ a̱tsuma̱ a ala e Yesu Zamawawa adama a̱ ɗu suru.
N ta yuwusan ne adama a na ama a ta yuwusan adanshi o ucawu wo okolo a̱ ɗu uba̱ta̱ suru.
9 A̱sula̱ e reve ta̱ a na n lyawai a yuwusaan ɗu avasa shi,
n ta yuwusaan yi a̱ga̱nda̱ no okolo a̱ va̱ suru waru n ta casu Alabari a Saꞌani adama a Mawun ma̱ yi.
10 Mantsa ma na maa yuwusan avasa biti,
n tsu pati ta̱ A̱sula̱ u lyawa mu m bura ɗu,
waru u to oꞌwo ne na̱ A̱sula̱ a̱ usu.
11 N ciga ta̱ me ene ɗu,
a̱vu n ca ɗu cuꞌun va abaꞌun a na Ruhu va̱ A̱sula̱ ca numu.
U ta kamba ɗu i kungwa nu ucira a̱tsuma̱ a Zagbain.
12 N ta dansa n ciga ta̱ tsu kambulai nu ucawu wo okolo a na tsu ri na̱ a̱yi.
Ucawu wo okolo a̱ ɗu u ta kamba mu,
ucawu wo okolo a̱ va̱ waru u ta kamba ɗu.
13 Nꞌutsa̱ n va̱,
n ciga ɗu ta̱ i reve na n tsu da̱na̱ ta̱ e ifoɓi i na maa bura ɗu.
Agba ili i ro i tsu gesheshe mu ta̱ kuci.
N ciga ta̱ n zuwa ama a̱ kuru Zamawawa a̱tsuma̱ a̱ Roma,
ununa n yuwain na akapi a Atakpaci.
14 Na̱ n ciga n ꞌyuwan n yuwaan ama suru a̱ga̱nda̱:
aza a na a̱ ri Nheleni na aza a na Nheleni n ɗa shi,
waru na aza a na a̱ ri nu urevu na aza a na e revei ili shi.
15 A̱yi ɗa i zuwai n ri no okolo n yuwaan ɗu alajiya a Alabari a Saꞌani a̱tsuma̱ a̱ Roma.
Ucira wa Alabari a Saꞌani
16 Maa uwwusa wono adama a Alabari a Saꞌani a̱ Kristi Zamawawa shi,
adama a na a̱yi ɗa ucira u na A̱sula̱ aa yuwusaan ulinga adama u wawa za na suru cayi okolo,
o ufaru aza a Israꞌila reve a̱ kuru na Atakpaci.
17 Alabari a Saꞌaniꞌi u to rocosu cine A̱sula̱ aa tarasa ama na̱ a̱ɓula̱ a̱ ma̱ka̱ka̱n ma̱ yi,
a̱yi ɗa o ure wu ucawu wo okolo diga o ufaru a̱ tyo o ukosu.
Una̱ta̱ ni ili i na Adanshi a̱ A̱sula̱ a dammai,
“A̱yi nda za na A̱sula̱ a tarasa za va̱ a̱ɓula̱ ɗa a̱ ma̱ka̱ka̱n ma̱ yi,
u ta̱ tsura̱ wuma o una̱ u na u cayi A̱sula̱ okolo.” a
Ama suru a nusan ta̱
18 A̱sula̱ za na ri zuva u to rocosu cine waa uwwusa upan wa ama adama a̱ cuꞌun vu nusu ni iwuya i na aa yuwusan suru.
E geshe ta̱ amayun ni iwuya i le.
19 A̱sula̱ a ta casu le a̱tsuma̱lima̱ adama a na e reve ta̱ ili i na i lobonoi na za biti ee reve a̱ tyo e ekere a̱ A̱sula̱,
adama a na A̱sula̱ o roco le ta̱ ili i ndolo suru a alanga e eteshe.
20 Ama aa gura ene ucira wa̱ A̱sula̱ u na u ri babu ukotu nu ure wa akiza u majiyan ma̱ yi shi.
Diga ana A̱sula̱ a yuwain uvaɗi,
ili i na u yuwain suru i roco ta̱ cine a̱yi u ri.
Adama o ndolo ama a̱ ri nu ure u mota̱a̱ shi.
21 Ko na e revei A̱sula̱,
a ꞌyuwan ta a ca yi tsugbain ana A̱sula̱ a amayun,
a̱vu waru a ꞌyuwan o godyoo yi.
Ana aa yuwan ne,
reve majiyan me le mo oꞌwo ili ye pere.
Okolo o tsulo tse le tsa shiwan ta̱ ni irumbu.
22 A ta majiyan a̱ ta̱ nu ugbozu,
reve gba o oꞌwo olo.
23 Aa yuwusaan A̱sula̱ a tsugbain za na ri wuma babu ukotu a̱ga̱nda̱ shi.
O una̱ u ndolo,
reve a uwa a yuwusaan a̱ma̱li a̱ga̱nda̱ a na a yuwain oroci a ama a na a̱a̱ da̱na̱ wuma babu ukotu shi,
oɓolo no oroci a̱ nnunu,
ni inama,
ni iyo.
24 Adama a na a yuwusain ne,
reve A̱sula̱ a lyawa le e eneshe.
Reve a yuwan ili i na a cigai a yuwan suru,
a̱vu maluwa me iwuya me le ma zuwa le e reme mayan ma̱ tsipere.
25 A ꞌyuwan ta̱ amayun a̱ A̱sula̱ a̱vu a̱ usu epen.
A yuwaan ta̱ ili i na A̱sula̱ a yuwain a̱ga̱nda̱,
ana a yuwaan za na yuwan nle a̱ga̱nda̱.
A̱yi ɗa za na a̱a̱ ushishi ica babu ukotu.
Ami.
26 Adama a na ama a yuwain ili i ndolo,
A̱sula̱ a lyawa le ta̱ a̱ kuru re wono na a cigai.
A̱ma̱ci a yuwusan tsipere na̱ a̱ma̱ci,
agba ne ɗa wu ntsayi shi.
27 Ali a ta yuwusan ne fo.
A lyawa ta̱ o vosun na̱ a̱ma̱ci reve e reme a uwwusa maluwa ma na oo von na ali na̱ a̱bunda̱ lon.
Reve a yuwan ili i wono va̱ni le,
ili i na i cina nle a̱yi ɗa oforo adama o tsulo tsa na a yuwain.
28 Ama a yuwan ta̱ majiyan ili ya̱ a̱ɓula̱ i ɗa shi a̱ da̱na̱ nu urevu wa amayun wa̱ A̱sula̱.
Ɗaɗa gba A̱sula̱ a lyawa nle a̱ ka̱ra̱i no okolo e iwuya i le,
a̱vu u lyawa le a yuwan ili i na yi ntsayi aa yuwan shi,
ko keꞌen.
29 A̱ ta̱ tapu na̱ cuꞌun vu unusu ni iwuya suru.
A ciga ta̱ o ɓolotowo aciyele ili biti.
A ta ꞌyuwusan ama.
A̱ ta̱ tapu na̱ tsushuꞌun.
A ciga ta̱ mona,
waru a ciga ta̱ a yuwan nla̱ngi va̱ni le.
A̱ ta̱ a̱ mpusunla̱i mu ugbozu.
A ta majiyan me iwuya a̱ tyo e ekere a ama.
A ta yuwusan idami.
30 A̱ ta̱ lungususa̱ ama ala.
A ta ꞌyuwusan A̱sula̱.
Aa casu ko vuma tsugbain shi.
A̱ ta̱ ꞌya̱sa̱sa̱n avangaci.
A ta cuwusa aciyele.
A ta yuwusan mpolo a yuwan iwuya e re saꞌavu.
Aa yuwusaan mbara n le tsutoni shi.
31 A ta yuwusan tsulo.
A̱ ta̱ bulusa̱ nzuwulai n le.
O tsu roco isaꞌani ko e ene iliyali yo ozo o ro shi.
32 E reve ta̱ na wila̱ wa̱ A̱sula̱ u dammai aza a na aa yuwusan nden n le ne tsunda,
wu ntsaa ta̱ a̱ kuwa̱.
Agba ili i ndolo i putsaa le a lyawa mayan me iwuya shi.
Hali a ta gbagbusa ozo o ro a yuwan ne fo.