Bulu ka̱mba̱to ta̱ ama a̱tsuma̱ a Malita gbaga
28
Ana tsu laꞌai,
a̱vu tsu uwwa a na tsu ta̱ e iɗa i memere ma̱ mini i na a̱ tsu ɗe Malita.
2 Ama a̱ lyuciꞌi a yuwaan tsu ta̱ isaꞌani lon.
Mantsa ma̱ mini na̱ mantsa mo uta̱nu ma ɗa ma̱ da̱na̱i,
a̱vu a kaɓatowo tsu akina,
tsa̱ra̱ tsu lyasuwa.
3 A̱vu Bulu zami ɗanga a zuwusa a akina,
reve yo ro na ri na̱ tsukono wu uta̱ pe a̱tsuma̱ a ɗangaꞌa adama o usuɗuwu,
a̱vu u ka̱ɗa̱ Bulu o ukere reve u kaɓa ɗe.
4 Ana ama a̱ lyuciꞌi e enei yoꞌo ukaɓu o ukere wa̱ yi,
a̱vu a dammulai va̱ni le,
“Vuma nda za mona ma ama ma ɗa!
Ye ene,
ko na u kuwa̱i a̱ mini shi,
amma suru na̱ ne a̱a̱ma̱li a ka o ugeꞌetosu wa amayun a ɗa a zuwai mpasa ma ama n kurusu yi,
u ta̱ gba a̱ kuwa̱.”
5 A̱vu Bulu za̱ka̱tsa̱ ekere a̱ yi reve u vari yoꞌo a akina,
agba wu uwwa mɓa̱la̱ shi.
6 Reve amaꞌa a̱ ka̱ra̱ a majiyan a na Bulu ta tsutsa ko u riya̱ a̱vu u kuwushi lo.
Amma ana a jimai,
agba e ene ili i fara na̱ a̱yi shi.
Reve a vadala majiyan me le,
a̱vu a damma,
“Ma̱sula̱ ma ɗa.”
7 Vuma na a̱ tsu ɗe Pubiliya ɗa da̱na̱i gwamna vi iɗa i memere ma̱ miniꞌi.
U da̱na̱ ta̱ ni iɗa lo zuzu a̱ ka̱nda̱ruwa̱.
A̱yi ɗa u ushi ntsu,
reve u ca tsu ucuꞌwatan o uꞌwa wa̱ yi hali rana taꞌatsu.
8 Dada va Pubiliya gba u da̱na̱ ta̱ ni ivuna̱ nu ucaruwu.
A̱vu Bulu uwa uba̱ta̱ u na u da̱na̱i.
Reve u kuruwa̱ yi ukere a yuwusaan yi avasa,
a̱vu gba vumaꞌa u ka̱mba̱ gbaga.
9 Ana vuma wo oꞌwoi gbaga,
reve ama e iɗa i memere ma̱ miniꞌi a̱ ka̱ra̱ a̱ ta̱wusa̱a̱ na ama e le a na a̱ ri nu ubanakun ya̱ Bulu a̱vu u ka̱mba̱to le gbaga.
10 Amaꞌa a ca tsu ta̱ tsugbain lon,
waru ana tsa̱a̱ ka̱ra̱ a ca tsu ta̱ ili biti i na tsu cigai.
Bulu rawa ta̱ a̱ lyuci va̱ Roma
11 Ana tsu yuwain woto taꞌatsu a Malita,
reve tsu teme mmalu a malaꞌa.
A̱vu tsu uwa a wantsun u na wi isawain e iɗa i memere ma̱ miniꞌi a mantsa ma na mmalu a wantsun n shi n yuwan shi.
Wantsun u lyuci wa Iskandariya u ɗa u da̱na̱i.
A aaci a wantsuꞌun,
iroci yu usheꞌen vu mpishe va̱ a̱ma̱li a na a̱ tsu ɗe Kasata na̱ Polu ɗa da̱na̱i ɗe.
12 Ana tsu rawai a̱ lyuci va Sirakusa,
tsu da̱nu ta̱ pe rana taꞌatsu.
13 Reve tsu uwa a wantsun a̱vu tsu lyawa Sirakusa,
a̱vu tsu ka̱ra̱ a̱ tyo uba̱ta̱ u na a̱ tsu ɗe Rigiyun.
Ana usana u tawai,
upepu u lapusa ta̱ a̱ tyosu ugana,
a̱vu tsu rawa a̱ lyuci va Putiyoli.
14 A̱tsuma̱ a̱ lyuci va Putiyoli tsu cina ta̱ pe a̱za̱ e Itoni,
reve a pati tsu tsi isawan pe ne ele.
Ana tsu yuwain ajuma a̱ ta̱ ne ele,
a̱vu tsu ka̱ra̱ a̱ tyo a̱ lyuci va̱ Roma.
15 Ana a̱za̱ e Itoni ya̱ Roma a uwwai a na tsu ta̱ lo o ure a̱ ta̱wa̱,
reve a̱ ta̱wa̱ a gaꞌaton tsu e Eden a Apiya.
Ozo o ro gba shi a gaꞌaton tsu ta̱ uba̱ta̱ u na a̱ tsu ɗe Cuꞌwatan Taꞌatsu.
Ana Bulu ene nle,
reve u godyoo A̱sula̱ reve u da̱shi tsura̱ ugbamu wo okolo.
Bulu yuwan ta̱ adanshi ɗe Roma
16 Ana tsu uwai a̱ lyuci va̱ Roma,
a lyawa ta̱ Bulu da̱na̱ a̱yi a̱ ndeꞌen oɓolo na̱ a̱soja a na a̱ pirishi yi.
17 Ana tsu yuwain rana taꞌatsu,
a̱vu Bulu ɗe azagbain a Israꞌila a̱tsuma̱ a̱ Roma.
Ana o ɓolotoi a̱vu u damma le,
“A̱ɗu a̱za̱ a̱ va̱,
ko na wo oꞌwoi n yuwaan ama a̱ tsu unusu shi,
n nusaan le uba̱ta̱ e ili ya agadu a nkaya n tsu shi.
Suru na̱ ne e reme mu ta̱ a̱ Urishelima,
a̱vu a ca mu e ekere a ama a̱ Roma ugutsuwu.
18 Ele gba a̱za̱ a̱ Roma e petelyuwe ta̱ adanshi a̱ va̱,
a̱vu a ciga a lyawa mu,
adama a na e reme mu nu unusu u na u rawai o una mu shi.
19 Amma ana aza a Israꞌila a̱ usu yi shi,
a̱yi ɗa i zuwai u reme numu m patiyi a̱ tyo na adanshi a̱ va̱ uba̱ta̱ wa Kaisa mogono,
ko na wo oꞌwoi n ciga n ꞌya̱wa̱ na ama a̱ tsu o ukobu wu ugeꞌetosu shi.
20 A̱yi ɗa i zuwai n zamiyi ure u na me ene ɗu,
tsa̱ra̱ tsu dammulai neꞌen,
ana wo oꞌwoi adama a vuma na aza a Israꞌila e indanasa uta̱wu wa̱ yi u ɗa a̱ nla̱ numu na akani a nda.”
21 Reve a̱ usu yi,
“A̱tsu tsu uwwa adanshi a̱ wu uba̱ta̱ wa aza a Israꞌila shi.
Tsu tsura̱ mpepelime n na a ɗanaa ntsu ɗe Yahuda shi.
Waru tsu uwwa adanshi o uwuyanu a̱ wu uba̱ta̱ wa aza a na a rawai shi.
22 Amma tsu ciga ta̱ tsu uwwa yo okolo a̱ wu.
Ili i na a̱tsu tsu revei a̱yi ɗa,
adama o ure wa̱ A̱sula̱ a saꞌavu a nda na ama suru a yuwusan adanshi a vanvama adama a̱ yi.”
23 Ana a zuwai urana u na a gaꞌan,
reve ama na̱ a̱bunda̱ gba a̱ ta̱wa̱ uba̱ta̱ u na u cuꞌwain.
Diga usana hali a̱ tyo ulivu u yuwusaan le ta̱ adanshi o tsugono tsa̱ A̱sula̱.
A̱vu u yuwan ulinga na atagada a̱ Wila̱ wa Musa na atagada a Ama̱sula̱,
tsa̱ra̱ u vadala le a̱ kuru Yesu.
24 Ozo o ro e le a̱ usu ta̱ ili i na u damma nle,
ozo o ro gba shi a ꞌyuwan ta̱ a na a ca okolo.
25 A̱vu a uwa mawasan va̱ni le,
reve a̱ ka̱ra̱ e beteꞌushe.
A̱ tyo o ukosu a̱vu Bulu damma,
“Ruhu va Akiza damma ta̱ mejege,
ana u yuwain adanshi na̱ nkaya n tsu o una̱ wa Ishaya vumava̱sula̱,
26 ‘Vu ꞌya̱wa̱ vu damma ama a̱ va̱,
“I ta uwwa adanshi a̱ va̱,
agba ya̱a̱ tsura̱ urevu wa̱ yi shi.
I te ene ili i na n yuwain,
agba ya̱a̱ da̱na̱ nu urevu wa̱ yi shi.
27 Suru nɗu i ta̱ no okolo ugbamu.
Atsuvu a̱ ɗu a ula ta̱,
esu a̱ ɗu waru a̱ tu upalu.
Yee ene shi,
waru yaa uwwa adanshi shi,
waru ya̱a̱ tsura̱ urevu shi.
Ni i shi a uwwa,
ana i vadala ta̱ a̱ tyo ya̱ꞌa̱ va̱,
waru n shi ta̱ ka̱mba̱to ɗu gbaga.” ’ a
28 “Adama a nda,
n ciga ta̱ i reve A̱sula̱ a̱ lyungu ta̱ na alabari e iwawi,
hali a̱ tyo e ekere a Atakpaci.
Ele gba a̱ ta̱ ushi.”
[
29 Ana Bulu dammai ne,
a̱vu aza a Israꞌila a̱ ꞌyon a lyawa uba̱ta̱ꞌa̱,
reve a̱ ka̱ra̱ a mawasan va̱ni le.]b